Si Haring Joacas sang Israel
1 Sa ika-23 nga tuig sang paggahom ni Joas nga anak nga lalaki ni Ocozias subong hari sang Juda, si Joacas nga anak nga lalaki ni Jehu nanginhari sang Israel, kag naggahom sia sa Samaria sa sulod sang 17 ka tuig.
2 Kaangay kay Haring Jeroboam nga nauna sa iya, nagpakasala sia sa Ginoo, kag gindala niya ang Israel sa pagpakasala. Wala gid siya magbiya sa malaut niya nga mga pagginawi.
3 Gani ang Ginoo naakig sa Israel, kag gintugotan niya si Haring Hazael sang Siria kag ang iya anak nga lalaki nga si Benhadad sa paglutos sa Israel sa tagsa ka pagsalakay sa ila.
4 Dayon si Joacas nagpangamuyo sa Ginoo, kag ang Ginoo nga nakakita kon daw ano ang pagpigos sang hari sang Siria sa mga Israelinhon, nagsabat sa iya pangamuyo.
5 Ang Ginoo nagpadala sing isa ka pangulo sa Israel, nga naghilway sa ila sa mga Sirianhon, kag gani ang mga Israelinhon nagpuyo sing malinong subong sang una.
6 Pero wala nila gihapon ginsikway ang mga sala nga ginhimo nila sa pagpangulo ni Jeroboam nga hari sa Israel, kundi nagpadayonm sila sa paghimo sini; kag ang larawan sang diosa nga si Ashera nagpabilin sa Samaria.
7 Si Joacas wala sing nabilin nga mga hangaway luas sa 50 ka mga manugkabayo, napulo ka mga karuwahi, kag 10,000 nga mga soldado nga nagalakat lang, kay ang hari sang Siria naglaglag sang nabilin kag gintasak sila kaangay sang yab-ok.
8 Ang tanan nga mga ginhimo ni Joacas, kag ang tanan nga bantog nga mga hinimuan niya nasulat sa Maragtas sang mga Hari sa Israel.
9 Napatay sia kag ginlubong sa Samaria, kag ang iya anak nga lalaki nga si Jehoas nagbulos sa iya subong hari.
Si Haring Jehoas sang Israel
10 Sa ika-37 nga tuig sang paggahom ni Joas nga hari sang Juda, si Jehoas nga anak nga lalaki ni Joacas nanginhari sa Israel, kag naggahom sia sa Samaria sa sulod sang 16 ka tuig.
11 Nagpakasala man sia batok sa Ginoo kag nagsunod sa malaut nga pagginawi ni Haring Jeroboam, nga nagdala sang Israel sa pagpakasala.
12 Ang iban pa gid nga hinimuan ni Jehoas, lakip ang iya kaisog batok sa pag-away kay Haring Amasias sang Juda ginsulat sa Maragtas sang mga Hari sa Israel.
13 Si Joacas napatay kag ginlubong sa lulobngan sang mga hari sa Samaria, kag ang iya anak nga lalaki nga si Jeroboam II nagbulos sa iya subong hari.
Ang Pagkapatay ni Eliseo
14 Si Eliseo nga propeta nagbalatian sang grabe kag sang tagumatayon sia, si Haring Jehoas sang Israel nagduaw sa iya. Naghibi sia kag nagsiling, "O amay ko! amay ko! Ikaw nangingamhanan nga manug-apin sang Israel!"
15 Si Eliseo nagsugo sa iya, “Kuha ka sing pana kag mga baslay." Nagkuha si Jehoas sini,
16 kag si Eliseo nagsiling sa iya nga maghanda sa pagpana. Gintuman ini sang hari, kag si Eliseo nagbutang sang iya kamot sa kamot sang hari.
17 Dayon, sa pagtuman sang mga sugo sang propeta, gin-abrihan niya ang bintana nga nagaatubang sa Siria. Nagsugo si Eliseo, "Magpana ka!" Sa tapos nga makapana ang hari, ang propeta nagsiling, "Ikaw amo ang pana sang Ginoo, nga paagi sini dag-on niya ang Siria. Magapakig-away ka sa Siria sa Apek tubtob nga lutoson mo sila.”
18 Dayon si Eliseo nagsugo sa hari sa pagkuha pa gid sang iban nga mga baslay kag itibsok sa duta. Gintibsok ini sang hari sa duta sing tatlo ka beses kag dayon nag-untat.
19 Naakig si Eliseo sini, kag nagsiling sia sa hari, “Kuntani gintibsok mo ini sing lima ukon anom ka beses, kag dayon may bug-os ikaw nga pagdaog sa mga Sirianhon; pero karon lutoson mo lang sila sing tatlo ka beses."
20 Napatay si Eliseo kag ginlubong. Sa tagsa ka tuig ginagubat sang mga Moabnon ang duta sang Israel.
21 Sang isa ka tion, sa tion sang paglubong, nakita nila ang mga nagapanggubat, kag ginhaboy sang mga tawo ang bangkay sa lulobngan ni Eliseo kag nagpalagyo.n Sang pagduot sang bangkay sa mga tul-an ni Eliseo, ang tawo nabuhi kag nagtindog.
Ang Inaway sa Tunga sang Israel kag Siria
22 Sa bug-os nga panahon sang paghari ni Joacas si Haring Hazael sang Siria nagpigos sa Israel,
23 pero ang Ginoo nagmaayo kag nagkaluoy sa ila. Tungod sang iya kasugtanan kay Abraham, kay Isaac kag kay Jacob ginbuligan niya silakag indi luyag nga maglaglag sa ila. Wala gid niya ginsikway ang iya mga tawo.
24 Sang pagkapatay ni Hazael nga hari sang Siria, ang iya anak nga lalaki nga si Benhadad nanginhari.
25 Dayon si Haring Jehoas sang Israel naglutos kay Benhadad sing makatlo, kag ginbawi niya ang mga siyudad nga gin-agaw anay ni Benhadad sa tion sang paggahom ni Joacas, nga amay ni Jehoas.
mSa iban nga dumaan nga pagbadbad nagpadayon sila; sa Hebreo nagpadayon sia.
nAng isa ka dumaan nga pagbadbad kag nagpalagyo; sa Hebreo kag nagpalagyo sia.
No comments:
Post a Comment