JOB - Kapitulo 1

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42

Si Job Gintilawan ni Satanas

1 Sang una anay may isa ka tawo nga ginhingalanan kay Job nga nagpuyo sa duta sang Uz. Nagsimba sia sa Dios sing matutom. Isa sia ka tawo nga matarong kag nagalikaw gid sa paghimo sang bisan ano nga malaut.

2 May pito sia ka mga anak nga lalaki kag tatlo ka mga anak nga babayi.

3 May mga karnero sia nga 7,000, mga kamelyo nga 3,000, mga kabakahan nga 1,000, kag mga asno nga 500. May madamo man sia nga mga suloguon, kag sia ang labing manggaranon nga tawo sa sidlangan.

4 Kinabatasan sang iya mga anak nga lalaki ang pagbulosbulos sa paghiwat sing punsyon, sa diin tanan sila nagakadto sa pagtambong kag ila man ginaagda ang ila tatlo ka mga utod nga babayi.

5 Sa tapos sang tagsa ka punsyon, si Job nagabugtaw sing aga pa gid sa madason nga adlaw kag nagadulot sing mga halad agod mapatawad ang mga sala sang iya mga kaanakan. Ginhimo niya ini pirme kay naghunahona sia nga basi ang isa sang iya mga kaanakan nagpakasala paagi sa pagpasipala sa Dios sing indi hungod.

6 Sang pag-abot sang adlaw nga ang mga anghel magaatubang sa GINOO, si Satanas didto man upod sa ila.

7 Ang GINOO nagpamangkot sa iya, “Diin ka maghalin?” Si Satanas nagsabat, “Naglagawlagaw ako pakadto pakari nga nagalibutlibot sa duta.”

8 Ang GINOO nagsiling, “Natalupangdan mo bala ang akon alagad nga si Job? Wala sing isa sa duta nga maayo kag matutom subong sa iya. Ginasimba niya ako kag nagalikaw gid sia sa paghimo sang bisan ano nga malaut.”

9 Nagsabat si Satanas, “Simbahon ka bala ni Job kon wala sia sing may makuha?

10 Gin-apinan mo sia kag ang iya panimalay kag ang tanan niya nga pagkabutang. Ginapauswag mo ang tanan nga iya ginahimo, kag ginhatagan mo sia sing madamo gid nga mga kasapatan nga nagpuno sang bug-os nga duta.

11 Abi kuhaa ini tanan nga mga butang sa iya kag tan-awon ta, kon indi ka niya pagpakamalauton sa imo atubangan.”

12 Ang GINOO nagsiling kay Satanas, “Sigi, ini tanan nga mga butang ginatugyan ko sa imo gahom, pero indi lang pag-anha si Job.” Gani naghalin si Satanas.

Nagakalamatay ang mga Kabataan ni Job kag Nalaglag ang Iya mga Pagkabutang

13 Isa ka adlaw sang nagakinaon kag nagaininom ang mga kabataan ni Job sa balay sang ila kamagulangan nga utod nga lalaki,

14 may manugbalita nga nagdalagan pakadto kay Job. Nagsiling sia, “Samtang nagaarado kami sa uma, kag ang mga asno nagahalab sa malapit lamang nga duog,

15 sa hinali lamang ginsalakay kami sang mga Sabeanhon kag ginkuha nila ang tanan nga mga kahayupan. Ginpamatay nila ang tanan mo nga mga suloguon, kag ako lang ang nakapalagyo sa pagsugid sa imo.”

16 Sa wala pa sia makatapos hambal, nag-abot ang isa ka suloguon kag nagsiling, “Naigo sang kilat ang mga karnero kag ang mga manugbantay kag nagkalamatay sila tanan. Ako lang ang naluwas sa pagsugid sa imo.”

17 Sa wala pa sia makatapos hambal, nag-abot ang isa ka suloguon kag nagsiling, “Ginsalakay kami sang tatlo ka guban sang mga Caldeanhon, ginpamatay nila ang tanan mo nga mga suloguon, gindala nila ang tanan nga mga kamelyo, kag ako lang ang nakapalagyo sa pagsugid sa imo.”

18 Sa wala pa sia makatapos hambal, nag-abot ang isa ka suloguon kag nagsiling, “Samtang nagakinaon kag nagaininom ang tanan mo nga mga kabataan sa balay sang imo kamagulangan nga anak nga lalaki,

19 nag-abot ang mabaskog nga buhawi halin sa desierto. Ginhakwat kag ginlampos sang buhawi ang balay kag nagkalamatay sila tanan kag ako lang ang naluwas sa pagsugid sa imo.”

20 Dayon nagtindog si Job kag gingisi niya ang iya bayu sa daku nga kasubo. Ginkiskisan niya ang iya ulo kag naghapa sa duta.

21 Nagsiling sia, “Natawo ako nga wala sing dala kag mapatay man nga wala gid sing dala. Ang GINOO nagahatag, kag sia man ang nagabawi. Dayawon ang iya ngalan!”

22 Wala sapayan sang tanan nga natabo, si Job wala magpakasala paagi sa pagbasol sa Dios.


UZ: Isa ka lugar nga indi gid mapat-od kon diin ini nayon.
SATANAS: Gamhanan nga tinuga nga ginkabig nga kaaway sang tawo.
SABEANHON: Isa ka tribo halin sa bagatnan nga nagalakat sa pagpang-ati.
CALDEANHON: Isa ka tribo halin sa aminhan nga nagalakat sa pagpang-ati.

ESTER - Kapitulo 10 <<<   >>> JOB - Kapitulo 2