Mga Halad nga Sinunog sing Bug-os
1 Ang GINOO nga didto sa Tolda sa Tilipunan nagtawag kay Moises kag ginhatagan sia sining masunod nga mga pagsulondan
2 nga pagatumanon sang mga Israelinhon kon sila magdulot sing mga halad. Ang bisan sin-o nga magdulot sing isa ka sapat subong nga halad, mahimo nga magdulot sia sang isa sang iya mga baka ukon isa sang iya mga karnero ukon mga kanding.
3 Kon magdulot sia sang isa sang iya mga baka subong isa ka halad nga sinunog, magdala sia sang isa ka toro nga baka nga wala sing depekto. Kinahanglan dalhon niya ini sa puwertahan sang Tolda nga Tilipunan agod mabaton ini sang GINOO.
4 Itungtong niya ang iya kamot sa ulo sang iya ginahalad, kag pagabatunon ini subong isa ka halad sa pagkuha sang iya mga sala.
5 Ihawon niya didto ang baka, kag ang mga pari nga kaliwat ni Aaron magahalad sang dugo sa GINOO, kag dayon iwisik ini sa apat ka kilid sang altar nga yara sa puwertahan sang tolda.
6 Iya dayon panitan ang sapat kag lasaon ini,
7 kag ang mga pari magabangdaybangday sang kahoy nga inuggatong sa altar kag dabukan ini.
8 Dayon ibutang nila ang mga hiniwa nga bahin sang sapat, lakip ang ulo kag ang sapay, sa kalayo.
9 Dayon hugasan sang tawo ang mga kasudlan kag ang mga tiil nga pangulihi, kag ang pari nga nagaalagad magasunog sang bug-os nga halad sa altar. Ang baho sining halad nga kalan-on mahamot sa GINOO.
10 Kon ang isa ka tawo magdulot sang isa sang iya mga karnero ukon mga kanding, kinahanglan isa ini ka lalaki nga wala sing depekto.
11 Iya ini ihawon sa naaminhan nga kilid sang altar, kag ang mga pari magawisik sang dugo sini sa apat ka kilid sang altar.
12 Sa tapos niya ini malasa, ang pari nga nagaalagad magabutang sang tanan nga bahin sini sa kalayo, lakip ang ulo kag ang mga sapay.
13 Kinahanglan hugasan sang tawo ang mga kasudlan kag ang mga tiil nga pangulihi, kag ang pari magadulot sang halad sa GINOO kag magasunog sang bug-os nga halad sa altar. Ang baho sining halad nga kalan-on mahamot sa GINOO.
14 Kon ang isa ka tawo magahalad sang isa ka pispis subong isa ka halad nga sinunog, kinahanglan isa ini ka pating ukon tukmo.
15 Dalhon ini sang pari sa altar, lubagon niya ang liog sini, kag sunogon ang ulo sini sa altar. Patuloon niya ang dugo sini sa kilid sang altar.
16 Kuhaon niya ang balunbalonan lakip ang sulod sini, kag ihaboy ini sa nasidlangan nga kilid sang altar sa diin ginabutang ang mga abo.
17 Uyatan niya ini sa mga pakpak kag pihakon ang iya lawas, nga indi mautas ang mga pakpak, kag sunugon ini sing bug-os sa altar. Ang baho sining halad nga kalan-on mahamot sa GINOO.
No comments:
Post a Comment