●●●●●
Pagpaninlo sa Tapos Mag-ayo ang Balatian sa Panit
1 Ang Ginoo naghatag kay Moises
2 sining mga pagsulondan nahanungod sa pagpaninlo sa tapos ang isa ka tawo mag-ayo sa makalalaton nga balatian sa panit. Sa adlaw nga pagalawagon sia nga matinlo, dalhon sia sa pari,
3 kag ang pari magadala sa iya sa gwa sang kampamento kag magausisa sa iya. Kon ang balatian nag-ayo,
4 ang pari mapakuha sang duha ka pispis nga matinlo, upod ang isa ka pidaso sang kahoy nga sedro, isa ka pula nga panapton, kag isa ka bilog nga isopo.
5 Dayon ang pari magasugo nga ihawon ang isa sang mga pispis sa ibabaw sang yahong nga duta nga may unod nga tubig halin sa tuboran.
6 Kuhaon niya ang isa ka pispis kag itum-oy ini sa dugo sang pispis nga gin-ihaw upod sang kahoy nga sedro, sang mapula nga panapton, kag sang isopo.
7 Iya iwisik ang dugo sing makapito sa tawo nga pagatinluan sa iya balatian sa panit kag lawagon sia nga matinlo. Buy-an niya ang buhi nga pispis sa wayang.
8 Ang tawo magalaba sang iya mga bayu, magakiskis sang tanan niya nga buhok, kag magapaligo sia. Dayon manginmatinlo sia. Sarang sia makasulod sa kampamento, pero kinahanglan magpuyo sia sa gwa sang iya tolda sa sulod sang pito ka adlaw.
9 Sa ikapito nga adlaw, iya liwat kiskisan ang iya ulo, ang iya bungot, ang iya mga kilay, kag ang tanan nga bulbol sa iya lawas. Pagalabhan niya ang iya mga bayu kag magapaligo sia, dayon manginmatinlo sia.
10 Sa ikawalo nga adlaw magadala sia sing duha ka cordero kag isa ka cordera nga isa ka tuig ang edad, nga wala sing mga depekto, lima ka libra nga arina nga nasamuan sing lana sang olivo, kag isa ka tasa nga lana sang olivo.
11 Ang pari magadala sang amo nga tawo kag sang mga halad sa puwertahan sang Tolda nga Tilipunan.
12 Dayon ang pari magakuha sang isa ka cordero kag idulot ini subong nga halad nga bayad upod sa isa ka tasa nga lana. Ihalad niya ini subong isa ka pinasahi nga dulot sa Ginoo para sa pari.
13 Ihawon niya ang cordero sa duog nga ginaihawan sang mga sapat para sa mga halad tungod sa sala kag mga halad nga sinunog. Kinahanglan himuon niya ini tungod kay ang halad nga bayad, kaangay sang halad tungod sa sala, iya sang pari kag tama ka balaan.
14 Ang pari magakuha sang bahin sang dugo sang cordero kag ihamlit ini sa labit sang tuo nga dulonggan, sa kumalagko sang tuo nga kamot, kag sa kumalagko sang tuo nga tiil sang tawo nga pagalawagon nga matinlo.
15 Ang pari magakuha sang bahin sang lana sang olivo kag ibubo ini sa palad sang iya wala nga kamot,
16 itum-oy niya sa sini ang isa ka tudlo sang iya tuo nga kamot, kag iwisik sing makapito ang iban sini didto sa atubangan sang GINOO.
17 Magakuha sia sang bahin sang lana nga yara sa iya palad kag sang bahin sang dugo sang cordero kag ihamlit niya ini sa labit sang tuo nga dulonggan, sa kumalagko sang iya tuo nga kamot, kag sa kumalagko sang tuo nga tiil sang tawo nga pagalawagon nga matinlo.
18 Ibutang niya ang nabilin nga lana nga yara sa iya palad sa ulo sang amo nga tawo. Sa sini nga paagi himuon niya ang tulomanon sang pagpaninlo.
19 Dayon ang pari magadulot sang halad tungod sa sala kag magahimo sang tulomanon sa pagpaninlo. Sa tapos sini, ihawon niya ang sapat para sa halad nga sinunog
20 kag ihalad ini sa altar upod sa halad nga kalan-on. Sa sini nga paagi ang pari magahimo sang tulomanon sa pagpaninlo, kag ang amo nga tawo manginmatinlo.
21 Kon ang tawo imol kag indi sia makasarang sini nga mga dulot, magadala sia para sa iya pagpaninlo sing isa lamang ka bilog nga cordero nga lalaki subong iya halad nga bayad, isa ka pinasahi nga dulot sa Ginoo para sa pari. Magadala sia sing duha lamang ka libra nga arina nga nasamuan sing lana sang olivo para sa halad nga kalan-on kag isa ka tasa nga lana sang olivo.
22 Magadala man sia sing duha ka bilog nga pating ukon duha ka tukmo, ang isa para sa halad tungod sa sala kag ang isa para sa halad nga sinunog.
23 Sa ikawalo nga adlaw sang iya pagpaninlo, dalhon niya ini sa pari sa puwertahan sang Tolda nga Tilipunan.
24 Ang pari magakuha sang cordero kag sang lana sang olivo kag ihalad niya ini subong isa ka pinasahi nga dulot sa Ginoo para sa pari.
25 Ihawon niya ang cordero kag magakuha sing dugo kag ihamlit ini sa labit sang tuo nga dulonggan sang tawo, sa kumalagko sang iya tuo nga kamot, kag sa kumalagko sang iya tuo nga tiil.
26 Ang pari magabutang sing lana sa palad sang iya wala nga kamot
27 kag paagi sa isa ka tudlo sang iya tuo nga kamot iwisik niya sing makapito ang iban sini didto sa atubangan sang Ginoo.
28 Ibutang niya ang iban sang lana sa amo nga mga duog nga iya ginabutangan sang dugo: sa labit sang tuo nga dulonggan sang tawo, sa kumalagko sang iya tuo nga kamot, kag sa kumalagko sang iya tuo nga tiil.
29 Ibutang niya ang nabilin nga lana nga yara sa iya palad sa ulo sang tawo kag sa sini nga paagi himuon niya ang tulomanon sa pagpaninlo.
30 Dayon magadulot sia sang isa sang duha ka bilog nga pating ukon tukmo
31 subong nga halad para sa sala kag ang isa subong nga halad nga sinunog upod sa halad nga kalan-on. Sa sini nga paagi himuon sang pari ang tulomanon sang pagpaninlo.
32 Amo ini ang kasugoan para sa tawo nga may makalalaton nga balatian sa panit, pero indi makasarang sang kinaandan nga mga halad nga ginakinahanglan para sa iya pagpaninlo.
Mansa sang Balatian sa mga Pamalay
33 Ang Ginoo naghatag kay Moises kag kay Aaron
34 sang masunod nga mga pagsulondan nahanungod sang mga pamalay nga may mansa sang balatian nga nagalapta. (Pagahimuon ini sa tapos makasulod ang mga tawo sang Israel sa duta sang Canaan, nga ginhatag sang Ginoo sa ila subong ila panublion.)
35 Ang bisan sin-o nga makakita sing mansa sang balatian sa iya balay kinahanglan maglakat kag sugiran niya ang pari nahanungod sini.
36 Ang pari magasugo nga panguhaon ang tanan nga mga pagkabutang sa sulod sang balay sa wala pa sia magkadto sa pag-usisa sang mansa sang balatian, kay kon indi, ang tanan nga pagkabutang sa sulod sang balay pagakabigon nga di-matinlo. Dayon magakadto sia sa balay
37 kag usisaon niya ang mansa sang balatian. Kon may yara nga buloberde ukon mapulapula nga mga luhobluhob nga nagaut-ot sang dingding,
38 bayaan niya ang balay kag paserahan ini sa sulod sang pito ka adlaw.
39 Sa ikapito nga adlaw magabalik sia kag iya liwat ini usisaon. Kon ang mansa sang balatian naglapta,
40 magasugo sia nga ang mga bato sa diin makita ang mansa sang balatian pagakuhaon kag ihaboy sa di-matinlo nga duog sa gwa sang siyudad.
41 Sa tapos sini, iya pakiskisan ang tanan nga dingding sa sulod sang balay kag ang tanan nga ginkiskis ihaboy sa di-matinlo nga duog sa gwa sang siyudad.
42 Dayon magakuha sila sing bag-o nga mga bato nga ila igailis sa mga bato nga ginpanguha, kag bag-o nga lunang ang pagagamiton sa pagkapol sang mga dingding.
43 Kon ang mansa sang balatian magpahayag liwat sa balay sa tapos mapanguha ang mga bato, kag ang balay nakiskisan na kag nakapulan,
44 pagakadtuan ini sang pari kag tan-awon. Kon naglapta ini, ang balay di-matinlo.
45 Kinahanglan gub-on ini, kag ang iya mga bato, mga kahoy, kag ang mga ginkapol sini pagadalhon sa gwa sang siyudad sa di-matinlo nga duog.
46 Ang bisan sin-o nga magsulod sa amo nga balay samtang serado ini mangindi-matinlo tubtob sa gab-i.
47 Ang bisan sin-o nga maghigda ukon magkaon sa amo nga balay kinahanglan maglaba sang iya mga bayu.
48 Pero, kon sa pagtan-aw sang pari, ang mansa sang balatian wala na magpahayag Iiwat sa tapos makapulan ang amo nga balay, pagalawagon niya nga matinlo ang balay, kay nakuha na ang mansa sang balatian.
49 Agod manginmatinlo ang balay, magakuha sia sing duha ka bilog nga pispis, kahoy nga sedro, mapula nga panapton, kag isa ka bilog nga isopo.
50 Ihawon niya ang isa ka pispis sa ibabaw sang yahong nga duta nga may unod nga tubig halin sa tuboran.
51 Dayon kuhaon niya ang kahoy nga sedro, ang isopo, ang pula nga panapton, kag ang buhi nga pispis kag itum-oy ini sa dugo sang pispis nga gin-ihaw kag sa tubig nga tab-ang. Kag wisikan niya ang balay sing makapito.
52 Sa sini nga paagi pagatinluan niya ang balay paagi sa dugo sang pispis, sa tab-ang nga tubig, sa buhi nga pispis, sa kahoy nga sedro, sa isopo, kag sa pula nga panapton.
53 Dayon paluparon niya ang buhi nga pispis sa gwa sang siyudad pakadto sa kawayangan. Sa sini nga paagi himuon niya ang tulomanon sa pagpaninlo sang balay, kag manginmatinlo ini.
54 Amo ini ang mga kasugoan nahanungod sa makalalaton nga mga balatian sa panit;
55-56 sa mga arikis, mga hubag, ukon mga pagpalanghabal; kag mansa sang balatian sa mga bayu ukon mga pamalay.
57 Ini nga mga kasugoan nagahatag sing kinatuhay kon ano ang di-matinlo kag ang matinlo.
No comments:
Post a Comment