●●●●●
Ang Adlaw sang Pagtubos
1 Ang GINOO naghambal kay Moises sa tapos mapatay ang duha ka anak nga lalaki ni Aaron nga nagkalamatay sang paghalad nila sa Ginoo sang di-balaan nga kalayo.
2 Nagsiling sia, "Singgana ang imo utod nga si Aaron nga sa nagakaigo lamang nga tion magsulod sia sa kurtina pakadto sa Labing Balaan nga Duog, kay didto ako nagapahayag sa isa ka panganod sa ibabaw sang takop sang Kaban sang Kasugtanan. Kon maglapas sia sini, mapatay sia.
3 Makasulod lamang sia sa Labing Balaan nga Duog sa tapos na sia makadala sang torite nga baka para sa halad tungod sa sala kag isa ka karnero nga lalaki para sa halad nga sinunog.”
4 Dayon ang Ginoo naghatag sang masunod nga mga pagsulondan. Sa wala pa magsulod si Aaron sa Labing Balaan nga Duog, kinahanglan magpaligo sia kag magsuksok sang mga bayu sang pari: ang sutana nga lino kag ang mga karsonsilyo, ang paha, kag ang turbante.
5 Ang katilingban sang Israel magahatag kay Aaron sing duha ka toro nga kanding para sa halad tungod sa sala kag isa ka karnero nga lalaki para sa halad nga sinunog.
6 Magadulot sia sing isa ka toro nga baka subong isa ka halad sa pagkuha sang iya kaugalingon nga mga sala kag sang mga sala sang iya panimalay.
7 Dayon dalhon niya ang duha ka kanding sa puwertahan sang Tolda nga Tilipunan.
8 Didto magapagabutgabot sia, nga nagagamit sang duha ka bilog nga bato, ang isa namarkahan sang "para sa Ginoo" kag ang isa sang "para kay Azazel."e
9 Ihalad ni Aaron ang kanding nga napilian para sa Ginoo kag idulot niya subong isa ka halad tungod sa sala.
10 Ang kanding nga napilian para kay Azazel pagadalhon nga buhi sa atubangan sang Ginoo kag ipadala sa desierto pakadto kay Azazel, agod makuha ang mga sala sang mga tawo.
11 Kon idulot ni Aaron ang toro nga baka subong halad tungod sa sala para sa iya kaugalingon kag sa iya panimalay,
12 magakuha sia sing insensaryo nga puno sing baga halin sa altar kag duha ka hakop sang mapino nga insyenso kag dalhon niya ini sa Labing Balaan nga Duog.
13 Didto sa atubangan sang Ginoo, iya ibutang ang insyenso sa kalayo, kag ang aso sang insyenso magalikop sang takop sang Kaban sang Kasugtanan agod nga indi niya makita ini kag mapatay.
14 Magakuha sia sing dugo sang toro nga baka kag paagi sa iya tudlo iwisik niya ini sa atubangan sang takop, kag dayon iwisik niya sing makapito sa atubangan sang Kaban sang Kasugtanan.
15 Sa tapos sini, ihawon niya ang kanding para sa halad tungod sa sala para sa mga tawo, dalhon niya ang dugo sini sa sulod sang Labing Balaan nga Duog, kag iwisik niya ini sa takop kag dayon sa atubangan sang Kaban sang Kasugtanan, subong sang iya ginhimo sa dugo sang toro nga baka.
16 Sa sini nga paagi himuon niya ang tulomanon sa pagtinlo sang Labing Balaan nga Duog gikan sa pagkamalaut sang mga tawo sang Israel kag sa tanan nila nga mga sala. Kinahanglan himuon man niya ini sa Tolda nga Tilipunan, kay nagatindog ini sa tunga sang kampamento nga di-matinlo.
17 Kinahanglan nga wala sing isa nga yara sa Tolda nga Tilipunan, halin sa tion nga nagsulod si Aaron sa Labing Balaan nga Duog sa paghimo sang tulomanon sa pagpaninlo tubtob sa iya pagwa. Sa tapos niya mahimo ang tulomanon para sa iya kaugalingon, sa iya panimalay, kag sa bug-os nga katilingban,
18 kinahanglan maggwa sia pakadto sa altar para sa mga halad nga sinunog kag tinluan niya ini. Kinahanglan magkuha sia sing dugo sang toro nga baka kag sang dugo sang kanding kag ihamlit ini sa bug-os nga sungaysongay nga yara sa mga pamusod sang altar.
19 Paagi sa iya tudlo iwisik niya sing makapito ang iban nga dugo sa altar. Sa sini nga paagi tinluan niya ini gikan sa mga sala sang mga tawo sang Israel kag pakabalaanon ini.
Ang Kanding nga Magadala sang Sala
20 Sa tapos mahimo ni Aaron ang tulomanon sa pagtinlo sang Labing Balaan nga Duog, ang iban nga bahin sang Tolda nga Tilipunan, kag ang altar, iya dalhon ang buhi nga kanding sa atubangan sang Ginoo.
21 Itungtong niya ang iya duha ka kamot sa ulo sang kanding kag sa ibabaw sini ituad niya ang tanan nga kalautan, mga sala, kag ang mga pagrebelde sang mga tawo sang Israel, kag ibutang ini tanan sa ulo sang kanding. Dayon tabugon ang kanding pakadto sa desierto sang isa ka tawo nga gintugyanan sa paghimo sini.
22 Ang kanding magadala palayo sang tanan nga mga sala nila pakadto sa duta nga wala sing may nagapuyo.
 |
| Ang kanding magadala palayo sang tanan nga mga sala nila. (16:22) |
23 Dayon magasulod si Aaron sa Tolda nga Tilipunan, ubahon niya ang mga bayu sang pari nga iya ginsuksok sa wala pa sia magsulod sa Labing Balaan nga Duog, kag iya ini ibilin didto.
24 Kinahanglan magpaligo sia sa isa ka balaan nga duog kag isuksok niya ang iya kaugalingon nga bayu. Sa tapos sini, magagwa sia kag idulot niya ang halad nga sinunog sa pagkuha sang iya kaugalingon nga mga sala kag sang mga sala sang mga tawo.
25 Sunogon niya sa altar ang sapay sang sapat para sa halad tungod sa sala.
26 Ang tawo nga nagtabog sang kanding pakadto sa desierto sa kay Azazel kinahanglan maglaba sang iya mga bayu kag magpaligo sa wala pa sia magbalik sa kampamento.
27 Ang toro nga baka kag ang kanding nga gingamit nga halad para sa sala, nga ang ila dugo gindala sa sulod sang Labing Balaan nga Duog sa pagkuha sang sala, pagadalhon sa gwa sang kampamento kag sunogon. Ang panit, ang karne, kag ang mga kasudlan pagasunogon.
28 Ang nagasunog sini kinahanglan maglaba sang iya mga bayu kag magpaligo sa wala pa sia magbalik sa kampamento.
Ang Pagtuman sang Adlaw sang Pagtubos
29 Ang masunod nga mga pagsulondan kinahanglan tumanon sa tanan nga panahon nga palaabuton. Sa ikanapulo nga adlaw sang ikapito nga bulan ang mga Israelinhon kag ang mga dumoluong nga nagapuyo upod sa ila kinahanglan magpuasa kag indi mag-obra.
30 Sa sini nga adlaw himuon nila ang tulomanon sa pagtinlo sa ila gikan sa ila mga sala, agod nga manginmatinlo sila.
31 Ini nga adlaw manginlabi ka balaan nga adlaw sa diin magapuasa sila kag indi gid maghimo sang bisan ano nga obra. Ini nga mga kasugoan pagatumanon nila sa tanan nga panahon nga palaabuton.
32 Ang Pinakamataas nga Pari nga gin-ordinan sing nagakaigo kag ginhalad sa pagbulos sa iya amay, amo ang maghimo sang tulomanon sa pagpaninlo. Magasuksok sia sang mga bayu sang pari
33 kag magahimo sia sang tulomanon sa pagtinlo sang Labing Balaan nga Duog, ang iban nga bahin sang Tolda nga Tilipunan, ang altar, ang mga pari, kag ang tanan nga mga tawo sang katilingban.
34 Ini nga mga pagsulondan kinahanglan tumanon sa tanan nga panahon nga palaabuton. Ini nga tulomanon pagahimuon sing makaisa kada tuig sa pagtinlo sang mga tawo sang Israel gikan sa tanan nila nga mga sala. Gintuman ni Moisesf ang ginsugo sang GINOO sa iya.
eAZAZEL: Ang kahulogan sining Hebreo nga pulong wala mahibal-i; ayhan ngalan ini sang isa ka demonyo sa desierto.
fMoises: ukon Aaron.
No comments:
Post a Comment