●●●●●
Mga Halad tungod sa mga Sala nga Indi Hungod
1 Ang Ginoo nagsugo kay Moises
2 nga singganon ang mga tawo sang Israel nga ang bisan sin-o nga nakasala kag nakalapas sing indi hungod sang mga sugo sang Ginoo, kinahanglan tumanon niya ang masunod nga mga pagsulondan.
3 Kon ang nakasala amo ang Pinakamataas nga Pari kag tungod sini nadalahig niya ang mga tawo, magahalad sia sang isa ka torite nga baka nga wala sing depekto kag ihalad niya ini sa GINOO tungod sang iya sala.
4 Dalhon niya ang torite nga baka sa puwertahan sang Tolda nga Tilipunan, itungtong niya ang iya kamot sa ulo sini kag ihawon niya ini didto sa atubangan sang Ginoo.
 |
| Dalhon niya ang torite nga baka. (4:4) |
5 Dayon ang Pinakamataas nga Pari magakuha sang dugo sang torite nga baka kag dalhon niya ini sa sulod sang tolda.
6 Itum-oy niya sing makapito ang iya tudlo sa dugo kag iwisik ini sa atubangan sang balaan nga kurtina.
7 Dayon ihamlit niya ang bahin sang dugo sa mga sungaysongay sa mga pamusod sang altar nga ginasunogan sang insyenso sa Tolda nga Tilipunan. Iula niya ang nabilin nga dugo sa sadsaran sang altar nga ginasunogan sang mga halad, nga yara sa puwertahan sang Tolda.
8 Kuhaon niya sa sining torite nga baka ang tanan nga tambok, ang mga sapay sa mga kasudlan,
9 ang mga batubato kag ang sapay nga yara sa ila, kag ang labing maayo nga bahin sang atay.
10 Ang pari magakuha sini nga sapay kag magasunog sini sa altar nga ginasunogan sang mga halad, subong sang ginahimo niya sa sapay halin sa sapat nga ginaihaw para sa halad sa paghiambit.
11 Pero kuhaon niya ang panit sini, ang tanan nga unod, ang ulo, ang mga tiil, ang mga kasudlan, lakip ang mga perpilya,
12 kag dalhon niya ini tanan sa gwa sang kampamento sa duog nga matinlo nga ginaulaan sang abo, kag sunogon ini didto sa ibabaw sang nagakalayo nga gatong.
13 Kon ang nakasala amo ang bug-os nga katilingban sang Israel kag nakalapas sila sing indi hungod sang isa sang mga sugo sang Ginoo,
14 sa tapos mahibal-an ini nga sala, ang katilingban magadala sang isa ka torite nga baka subong isa ka halad tungod sa sala. Dalhon nila ini sa Tolda nga Tilipunan;
15 ang mga pangulo sang katilingban magatungtong sang ila mga kamot sa ulo sini, kag ihawon ini didto.
16 Ang Pinakamataas nga Pari magadala sang bahin sang dugo sang torite nga baka sa sulod sang Tolda nga Tilipunan
17 itum-oy niya sing makapito ang iya tudlo sa dugo kag iwisik ini sa atubangan sang kurtina.
18 lpalhit niya ang bahin sang dugo sa mga sungaysongay sa mga pamusod sang altar nga ginasunogan sang insyenso sa sulod sang Tolda nga Tilipunan, kag ang nabilin nga dugo iula niya sa sadsaran sang altar nga ginasunogan sang mga halad, nga yara sa puwertahan sang Tolda.
19 Dayon kuhaon niya ang tanan nga sapay kag sunogon ini sa altar.
20 Ang iya himuon sa sining torite nga baka pareho man sang ginahimo niya sa torite nga baka nga halad tungod sa sala, kag sa sini nga paagi magahalad sia tungod sang sala sang mga tawo, kag pagapatawaron sila.
21 Dayon dalhon niya ang torite nga baka sa gwa sang kampamento kag sunogon ini, subong sang iya pagsunog sang torite nga baka nga ginhalad tungod sang iya kaugalingon nga sala. Amo ini ang halad nga magakuha sang sala sang katilingban.
22 Kon ang nakasala amo ang isa ka pangulo kag nakalapas sia sing indi hungod sang isa sang mga sugo sang Ginoo,
23 sa tapos sia mapatalupangod sang iya sala, magadala sia sing isa ka toro nga kanding nga wala sing depekto, subong iya halad.
24 Itungtong niya ang iya kamot sa ulo sini kag ihawon niya ini sa naaminhan nga kilid sang altar, sa diin ginaihaw ang mga sapat para sa mga halad nga sinunog. Amo ini ang halad sa pagkuha sang sala.
25 Itum-oy sang pari ang iya tudlo sa dugo sang sapat, ihamlit niya ini sa mga sungaysongay sa mga pamusod sang altar, kag iula niya ang nabilin nga dugo sini sa sadsaran sang altar.
26 Dayon sunogon niya ang tanan nga sapay sini sa altar, subong sang iya pagsunog sang sapay sang mga sapat nga ginaihaw para sa mga halad sa paghiambit. Sa sini nga paagi ang pari magadulot sing halad para sa sala sang pangulo, kag pagapatawaron sia.
27 Kon ang nakasala amo ang isa ka kinaandan nga tawo kag nakalapas sia sing indi hungod sang isa sang mga sugo sang Ginoo,
28 sa tapos sia mapatalupangod sang iya sala, magadala sia sang isa ka kanding nga babayi nga wala sing depekto subong iya halad.
29 ltungtong niya ang iya kamot sa ulo sini kag ihawon niya ini sa naaminhan nga kilid sang altar, sa diin ginaihaw ang mga sapat para sa mga halad nga sinunog.
30 Itum-oy sang pari ang iya tudlo sa dugo sang sapat, ihamlit ini sa mga sungaysongay sa mga pamusod sang altar, kag iula niya ang nabilin nga dugo sa sadsaran sang altar.
31 Dayon kuhaon niya ang tanan nga sapay sini, subong sang pagkuha sang sapay sa tanan nga mga sapat nga ginaihaw para sa mga halad sa paghiambit, kag sunogon niya ini sa altar subong isa ka mahamot nga dulot sa GINOO. Sa sini nga paagi ang pari magadulot sing halad para sa sala sang amo nga tawo, kag pagapatawaron sia.
32 Kon ang isa ka tawo magdala sing karnero subong isa ka halad tungod sa sala, kinahanglan isa ini ka babayi nga wala sing depekto.
33 Itungtong niya ang iya kamot sa ulo sini kag ihawon ini sa naaminhan nga kilid sang altar, sa diin ginaihaw ang mga sapat para sa mga halad nga sinunog.
34 Itum-oy sang pari ang iya tudlo sa dugo sang sapat, ihamlit ini sa mga sungaysongay sa mga pamusod sang altar, kag iula niya ang nabilin nga dugo sa sadsaran sang altar.
35 Dayon kuhaon niya ang tanan nga sapay sini, subong sang pagkuha sang sapay sa karnero nga ginaihaw para sa mga halad sa paghiambit, kag sunogon ini sa altar upod sa mga halad nga kalan-on nga gindulot sa Ginoo. Sa sini nga paagi ang pari magadulot sing halad para sa sala sang amo nga tawo, kag pagapatawaron sia.
No comments:
Post a Comment