●●●●●
Si Aaron Nagdulot sing mga Halad
1 Sa adlaw sa tapos ang pag-orden, gintawag ni Moises si Aaron kag ang iya mga anak nga lalaki kag ang mga pangulo sang Israel.
2 Ginsingganan niya si Aaron, "Magkuha ka sing isa ka torite nga baka kag isa ka karnero nga lalaki nga wala sing depekto kag ihalad ini sa Ginoo, ang torite nga baka para sa halad tungod sa sala kag ang karnero nga lalaki para sa halad nga sinunog.
3 Dayon singgana ang mga tawo sang Israel sa pagkuha sang isa ka toro nga kanding para sa halad tungod sa sala, kag isa ka tuig nga torite nga baka, kag isa ka tuig nga cordero nga wala sing depekto para sa halad nga sinunog,
4 kag isa ka toro nga baka kag isa ka karnero nga lalaki para sa halad sa paghiambit. Ihalad nila ini sa Ginoo upod sa halad nga kalan-on nga nasamuan sing lana. Kinahanglan himuon gid nila ini, kay ang Ginoo magapahayag sa ila karon nga adlaw."
5 Gindala nila sa atubangan sang Tolda nga Tilipunan ang tanan nga mga butang nga ginsugo ni Moises sa ila, kag ang bug-os nga katilingban nagtipon didto sa pagsimba sa Ginoo.
6 Si Moises nagsiling, “Ang Ginoo nagsugo sa inyo sa paghimo sini tanan, agod nga ang masilaw nga kapawa nga nagapahayag sang iya presensya magapakita sa inyo.”
7 Dayon nagsiling sia kay Aaron, "Kadto ka sa altar kag magdulot sang halad tungod sa sala kag sang halad nga sinunog sa pagkuha sang imo mga sala kag sang mga sala sang mga tawo. Idulot ini nga halad sa pagkuha sang mga sala sang mga tawo, suno sa ginsugo sang Ginoo."
8 Nagkadto si Aaron sa altar kag gin-ihaw niya ang torite nga baka nga para sa halad tungod sang iya kaugalingon nga sala.
9 Ang iya mga anak nga lalaki nagdala sa iya sang dugo, gintum-oy niya ang iya tudlo sa sini, ginhamlit niya ang iban sini sa mga sungaysongay nga yara sa mga pamusod sang altar, kag gin-ula niya ang nabilin nga dugo sa sadsaran sang altar.
10 Dayon ginsunog niya sa altar ang sapay, ang mga batubato, kag ang labing maayo nga bahin sang atay, suno sa ginsugo sang Ginoo kay Moises.
11 Pero ginsunog niya ang karne kag ang panit sa gwa sang kampamento.
12 Gin-ihaw niya ang sapat para sa iya kaugalingon nga halad nga sinunog. Ang iya mga anak nga lalaki nagdala sa iya sang dugo, kag gin-ula niya ini sa apat ka kilid sang altar.
13 Ginduhol nila sa iya ang ulo kag ang iban nga bahin sang sapat, kag ginsunog niya ini sa altar.
14 Dayon ginhugasan niya ang mga kasudlan kag ang pangulihi nga mga tiil kag ginsunog niya ini sa altar sa ibabaw sang iban nga mga halad nga sinunog.
15 Sa tapos sini, gindulot niya ang mga halad sang mga tawo. Ginkuha niya ang kanding nga ihalad tungod sang mga sala sang mga tawo, gin-ihaw niya ini, kag ginhalad, subong sang iya ginhimo sa iya kaugalingon nga halad tungod sa sala.
16 Gindala man niya ang sapat para sa halad nga sinunog kag ginhalad ini suno sa mga pagsulondan.
17 Gindulot niya ang halad nga kalan-on kag nagkuha sia sang isa ka hakop nga arina kag ginsunog ini sa altar. (Wala labot sini, may yara pa nga halad nga sinunog adlaw-adlaw.)
18 Gin-ihaw niya ang toro nga baka kag ang karnero nga lalaki subong isa ka halad sa paghiambit para sa mga tawo. Ang iya mga anak nga lalaki nagdala sa iya sang dugo kag gin-ula niya ini sa apat ka kilid sang altar.
19 Ginbutang ni Aaron ang tanan nga bahin sang sapay sang toro nga baka kag sang karnero nga lalaki
20 sa ibabaw sang mga dughan sang mga sapat, kag gindala niya ini tanan sa altar. Ginsunog niya ang sapay sa altar,
21 kag ginhalad niya ang mga dughan kag ang tuo nga pangulihi nga mga tiil subong isa ka pinasahi nga dulot sa Ginoo para sa mga pari, suno sa ginsugo ni Moises.
22 Sang makatapos si Aaron sang tanan nga mga halad, ginbayaw niya ang iya mga kamot sa ibabaw sang mga tawo kag ginbendisyunan niya sila, kag dayon nagpanaog sia.
23 Si Moises kag si Aaron nagsulod sa Tolda nga Tilipunan, kag sang paggwa nila ginbendisyunan nila ang mga tawo, kag ang masilaw nga kapawa nga nagapahayag sang presensya sang Ginoo nagpakita sa tanan nga mga tawo.
24 Sa hinali ang Ginoo nagpadala sing kalayo, kag nagsunog ini sang bug-os nga halad kag sang mga sapay sa altar. Sang makita ini sang mga tawo, nagsinggit sila tanan kag nagluhod sila nga ang ila mga guya nagaduot sa duta.
No comments:
Post a Comment