LEVITICO - Kapitulo 3

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Mga Halad sa Paghiambit

1 Ang bisan sin-o nga magdulot sang isa sang iya mga baka subong isa ka dulot sa paghiambit, kinahanglan isa ini ka toro nga baka ukon isa ka bakiya nga wala sing depekto.

2 Itungtong niya ang iya kamot sa ulo sang sapat kag ihawon ini sa puwertahan sang Tolda nga Tilipunan. Ang mga pari nga kaliwat ni Aaron magawisik sang dugo sa apat ka kilid sang altar

3 kag magahalad sang masunod nga mga bahin sang sapat subong isa ka halad nga kalan-on sa Ginoo: ang tanan nga sapay nga yara sa kasudlan,

4 ang mga batubato kag ang sapay nga yara sa ila, kag ang labing maayo nga bahin sang atay.

5 Ang mga pari magasunog sini tanan sa altar upod sa mga halad nga sinunog. Ang baho sining halad nga kalan-on mahamot sa Ginoo.

6 Kon ang isa ka karnero ukon kanding gamiton subong isa ka halad sa paghiambit, ayhan isa ini ka lalaki ukon babayi, pero kinahanglan wala ini sing depekto.

7 Kon ang isa ka tawo maghalad sing karnero,

8 itungtong niya ang iya kamot sa ulo sini kag iya ihawon ini sa atubangan sang Tolda nga Tilipunan. Ang mga pari magawisik sang dugo sini sa apat ka kilid sang altar,

9 kag magahalad sang masunod nga mga bahin sang sapat subong isa ka halad nga kalan-on sa Ginoo: ang sapay, ang bug-os nga ikog nga matambok nga gin-utod sing suop, ang tanan nga sapay nga nagaputos sang mga kasudlan,

10 ang mga batubato kag ang tambok nga yara sa ila, kag ang labing maayo nga bahin sang atay.

11 Ang pari nga nagaalagad magasunog sini tanan sa altar subong isa ka halad nga kalan-on sa Ginoo.

12 Kon ang isa ka tawo maghalad sing kanding,

13 itungtong niya ang iya kamot sa ulo sini kag iya ihawon ini sa atubangan sang Tolda nga Tilipunan. Ang mga pari magawisik sang dugo sini sa apat ka kilid sang altar

14 kag magahalad sang masunod nga mga bahin subong isa ka halad nga kalan-on sa Ginoo: ang tanan nga sapay nga yara sa mga kasudlan,

15 ang mga batubato kag ang sapay nga yara sa ila, kag ang labing maayo nga bahin sang atay.

16 Ang pari magasunog sini tanan sa altar subong isa ka halad nga kalan-on nga mahamot sa Ginoo. Ang tanan nga sapay iya sang Ginoo.

17 Wala sing Israelinhon nga magkaon sing sapay ukon dugo; amo ini ang isa ka pagsulondan nga pagatumanon sa walay katapusan sang tanan nga mga Israelinhon, bisan diin sila nagapuyo.

LEVITICO - Kapitulo 2 <<<   >>> LEVITICO - Kapitulo 4