●●●●●
 |
| Ang di-matinlo nga mga sapat. (kapitulo 11) |
Ang mga Sapat nga Sarang Makaon
(Deut. 14:3-21)
1 Ang GINOO naghatag kay Moises kag kay Aaron sini nga mga pagsulondan
2 para sa mga tawo sang Israel. Sarang kamo makakaon sang bisan ano nga sapat
3 nga may nagapihak nga mga kuko kag nagapangusang man.
4-6 Indi kamo magkaon sang mga kamelyo, mga ilaga, ukon mga koneho. Kabigon sila nga di-matinlo, tungod kay wala nagapihak ang ila mga kuko bisan nga nagapangusang sila.
7 Indi kamo magkaon sang baboy. Kabigon sila nga di-matinlo; nagapihak ang ila mga kuko, pero wala sila nagapangusang.
8 Indi kamo magkaon sini nga mga sapat ukon magtandog sang ila patay nga mga lawas, kay di-matinlo sila.
9 Sarang kamo makakaon sang bisan ano nga isda nga may kapay kag mga himbis,
10 pero ang bisan ano nga nagapuyo sa tubig nga wala sing mga kapay kag himbis indi pagkaunon.
11 Ini nga mga tinuga kinahanglan kabigon nga di-matinlo. Indi kamo dapat magkaon sini ukon magtandog sang ila patay nga mga lawas.
12 Indi kamo magkaon sang bisan ano nga nagapuyo sa tubig nga wala sing mga kapay ukon himbis.
13-19 Indi kamo magkaon sining masunod nga mga pispis: mga agila, mga bukaw, mga dapay, mga falcon, mga pispis nga nagakaon sing unod, mga buwitre, mga uwak, mga ostrit, mga pispis nga nagapangdagit sing mga isda sa dagat, mga dugwak, mga tulabong, mga pelicano, mga somorgujo, mga abubilla, ukon mga kabog.
20 Ang tanan nga mga sapatsapat nga may pakpak di-matinlo,
21 luas lamang sa mga nagalumpatlumpat.
22 Sarang kamo makakaon sang mga apan, mga sirumsirom, ukon mga tibakla.
23 Pero ang iban nga magamay nga mga sapatsapat nga may mga pakpak kag nagasaog man pagakabigon nga di-matinlo.
24-28 Ang bisan sin-o nga makatandog sang patay nga mga lawas sang masunod nga mga sapat mangindi-matinlo tubtob sa gab-i: ang tanan nga mga sapat nga may kuko, luas lamang kon ang ila mga kuko nagapihak kag nagapangusang sila, kag ang tanan nga mga sapat nga may apat ka tiil nga may inugkaros. Ang bisan sin-o nga magdala sang ila patay nga mga lawas, kinahanglan maglaba sang iya mga bayu, pero mangindi-matinlo pa gihapon sia tubtob sa gab-i.
29-30 Ang mga giting, mga ilaga, kag ang mga halo kinahanglan kabigon nga di-matinlo.
31 Ang bisan sin-o nga makatandog sa ila ukon sang ila patay nga mga lawas mangindi-matinlo tubtob sa gab-i.
32 Kag ang matup-an sang ila patay nga mga lawas mangindi-matinlo: ang bisan ano nga gamit nga kahoy, panapton, panit, ukon sako, sa bisan ano man ini ginagamit. Itum-oy ini sa tubig, pero mangindi-matinlo ini tubtob sa gab-i.
33 Kag kon ang ila mga lawas mahulog sa isa ka banga, ang tanan nga unod sini mangindi-matinlo, kag kinahanglan buongon ninyo ang banga.
34 Ang bisan ano nga kalan-on nga sarang makaon, pero naulaan sang tubig gikan sa sini nga sulodlan, mangindi-matinlo, kag ang bisan ano nga sarang mainom sa sini nga sulodlan mangindi-matinlo.
35 Ang bisan ano nga mahulogan sang patay nga mga lawas mangindi-matinlo; ang dapog ukon pugon nga duta pagagub-on,
36 pero ang isa ka tuboran ukon bubon magapabilin nga matinlo, bisan nga ang iban nga butang nga makatandog sang ila patay nga lawas mangindi-matinlo.
37 Kon ang isa sini sa ila mahulog sa binhi nga inugtanom, ang binhi magapabilin nga matinlo.
38 Pero kon ang binhi nahulom sa tubig, kag mahulogan ini sang isa sa ila, ang binhi mangindi-matinlo.
39 Kon ang bisan ano nga sapat nga sarang makaon mapatay, ang bisan sin-o nga makatandog sini mangindi-matinlo tubtob sa gab-i.
40 Kag ang bisan sin-o nga magkaon sang bisan ano nga bahin sini nga sapat, kinahanglan maglaba sang iya mga bayu, pero magapabilin sia nga di-matinlo tubtob sa gab-i; ang bisan sin-o nga magdala sang patay nga lawas kinahanglan maglaba sang iya mga bayu, pero mangindi-matinlo gihapon sia tubtob sa gab-i.
41 Indi kamo magkaon sang bisan ano nga magamay nga sapat nga nagagiho sa duta,
42 bisan ang nagasaug sa iya tiyan ukon ang nagalakat sa iya apat ka tiil, ukon ang may madamo sing mga tiil.
43 Indi ninyo pagdagtai ang inyo kaugalingon paagi sa pagkaon sang bisan isa sini.
44 Ako amo ang Ginoo nga inyo Dios, kag dapat ninyo tipigan ang inyo kaugalingon nga manginbalaan, kay ako balaan.
45 Ako amo ang GINOO nga nagpagwa sa inyo sa Egipto agod ako mangin-inyo Dios. Kinahanglan magmanginbalaan kamo, kay ako balaan.
46 Gani, amo ini ang kasugoan nahanungod sa mga sapat, mga pispis, sa tanan nga mga butang nga nagapuyo sa tubig kag sa tanan nga mga butang nga nagagiho sa duta.
47 Butangan ninyo sing kinatuhay kon ano ang matinlo kag ang di-matinlo, kon ano ang mga sapat nga sarang makaon kag ang mga indi sarang makaon.
No comments:
Post a Comment