●●●●●
Mga Halad tungod sang mga Balayran
1 Amo ini ang mga pagsulondan para sa mga halad tungod sang mga balayran. Tama ini ka balaan nga halad.
2 Ang sapat para sa sini nga halad pagaihawon sa naaminhan nga kilid sang altar, sa diin ginaihaw ang mga sapat para sa mga halad nga sinunog, kag ang dugo sini iwisik sa apat ka kilid sang altar.
3 Pagakuhaon ang tanan nga sapay sini kag ihalad sa altar: ang matambok nga ikog, ang sapay nga nagaputos sang mga kasudlan,
4 ang mga batubato kag ang sapay nga yara sa ila, kag ang labing maayo nga bahin sang atay.
5 Ang pari magasunog sang tanan nga sapay sa altar subong isa ka halad nga kalan-on sa GINOO. Isa ini ka bayad nga halad.
6 Ang bisan sin-o nga lalaki sa mga panimalay sang pari sarang makakaon sini. Kinahanglan kaunon ini sa isa ka balaan nga duog kay tama ini ka balaan.
7 May isa lamang ka pagsulondan para sa halad tungod sa sala kag sa bayad nga halad: ang karne iya sang pari nga nagadulot sang halad.
8 Ang panit sang sapat nga ginadulot subong isa ka halad nga sinunog iya sang pari nga nagadulot sang halad.
9 Ang tagsa ka halad nga kalan-on nga ginluto sa horno ukon ginluto sa kalaha ukon sa sartin, iya sang pari nga naghalad sini sa Dios.
10 Pero ang tanan nga mga halad nga kalan-on nga wala maluto, nasamuan sing lana ukon mamala, iya sang tanan nga mga pari nga kaliwat ni Aaron, kag kinahanglan partidahon nila ini sing palareho.
Mga Halad sa Paghiambit
11 Amo ini ang mga pagsulondan para sa mga halad sa paghiambit nga ginadulot sa Ginoo.
12 Kon ang isa ka tawo maghimo sini subong isa ka halad sa pagpasalamat sa Dios, magadulot sia upod sa sapat nga pagaihalad sing halad nga tinapay nga wala sing lebadora: ayhan madamol nga mga tinapay nga nahimo sa arina nga nasamuan sing lana sang olivo ukon manipis nga tinapay nga mga nahibuan sing lana sang olivo ukon kalan-unon nga nahimo sa arina nga nasamuan sing lana.
13 Wala labot sini, magadulot sia sing mga tinapay nga naluto nga wala sing lebadora.
14 Idulot niya ang isa ka bahin sang tagsa ka sahi sang tinapay subong isa ka pinasahi nga bahin sa Ginoo; mangin-iya ini sang pari nga nagakuha sang dugo sang sapat kag nagawisik sini sa altar.
15 Ang karne sang sapat dapat kaunon sa adlaw nga ginhalad ini; wala sing bahin sini nga ibilin tubtob sa madason nga aga.
16 Kon ang isa ka tawo magdala sang isa ka halad sa paghiambit subong nga pagtuman sang isa ka panaad ukon subong iya kaugalingon nga halad nga kinabubot-on, indi kinahanglan nga kaunon ini tanan sa adlaw nga ginhalad ini. Kon may mabilin, sarang ini makaon sa madason nga adlaw.
17 Kon may mabilin pa nga karne sa ikatlo nga adlaw kinahanglan sunogon ini.
18 Kon may mabilin nga kaunon sa ikatlo nga adlaw, ang Dios indi magbaton sang halad sang amo nga tawo. Ang halad manginwalay pulos, kundi kabigon nga di-matinlo, kag ang bisan sin-o nga magkaon sini magaantos sang silot.
19 Kon ang karne matandog sang bisan ano nga di-matinlo, indi ini dapat kaunon, kundi pagasunogon. Ang bisan sin-o nga matinlo sarang makakaon sini,
20 pero ang bisan sin-o nga di-matinlo nga magkaon sini, indi na pagkabigon nga isa sang mga tawo sang Dios.
21 Ang bisan sin-o man nga magkaon sang karne sini nga halad sa tapos sia makatandog sang bisan ano nga di-matinlo, tawo ukon sapat, indi na pagkabigon nga isa sang mga tawo sang Dios.
22 Ang Ginoo naghatag kay Moises sang masunod nga mga pagsulondan
23 para sa mga tawo sang Israel. Wala sing sapay sang baka, sang karnero, ukon sang mga kanding nga pagakaunon.
24 Ang sapay sang sapat nga napatay, ukon ginpatay sang talunon nga sapat indi dapat kaunon, pero sarang ini magamit sa iban nga tinutoyo.
25 Ang bisan sin-o nga magkaon sang sapay sang sapat nga ginahalad subong isa ka halad nga kalan-on sa Ginoo, indi na pagkabigon nga isa sang mga tawo sang Dios.
26 Bisan diin nagapuyo ang mga Israelinhon, indi gid sila magkaon sang dugo sang mga pispis ukon mga sapat.
27 Ang bisan sin-o nga maglapas sini nga kasugoan indi na pagkabigon nga isa sang mga tawo sang Dios.
28 Ang Ginoo naghatag kay Moises sang masunod nga mga pagsulondan
29 para sa mga tawo sang Israel. Ang bisan sin-o nga magdulot sang isa ka halad sa paghiambit, kinahanglan magdala sang bahin sini subong isa ka pinasahi nga dulot sa Ginoo,
30 nga nagadala sini sa iya kaugalingon nga mga kamot subong isa ka halad nga kalan-on. Dalhon niya ang sapay sang sapat upod sang dughan sini, kag ihalad ini subong isa ka pinasahi nga dulot sa Ginoo.
31 Ang pari magasunog sang sapay sa altar, pero ang dughan iya sang mga pari.
32 Ang pangulihi nga tuo nga till sang sapat ihatag subong pinasahi nga bahin
33 sang pari nga nagadulot sang dugo kag sang sapay subong halad sa paghiambit.
34 Ang dughan sang sapat isa ka pinasahi nga dulot kag ang pangulihi nga tuo nga tiil isa ka pinasahi nga bahin nga ginkuha sang Ginoo gikan sa mga tawo sang Israel kag ginhatag sa mga pari. Amo ini ang dapat ihatag sang mga tawo sang Israel sa mga pari sa tanan nga panahon nga palaabuton.
35 Amo ini ang bahin sang kalan-on nga ginhalad sa Ginoo nga ginhatag kay Aaron kag sa iya mga anak nga lalaki sa adlaw nga gin-ordinan sila subong mga pari.
36 Sadto nga adlaw, ang Ginoo nagsugo sa mga tawo sang Israel sa paghatag sa mga pari sini nga bahin sang halad. Amo ini ang pagsulondan nga dapat tumanon sang mga tawo sang Israel sa tanan nga panahon.
37 Gani, amo ini ang mga pagsulondan para sa mga halad nga sinunog, mga halad nga kalan-on, mga halad tungod sa sala, mga halad tungod sa balayran, mga halad sa pag-orden, kag mga halad sa paghiambit.
38 Ang Ginoo naghatag sini nga mga sugo kay Moises sa bukid sang Sinai, didto sa desierto, sa adlaw nga ginsingganan niya ang mga tawo sang Israel sa paghimo sang ila mga halad.
No comments:
Post a Comment