LEVITICO - Kapitulo 2

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Mga Halad nga Kalan-on 

1 Ang bisan sin-o nga magdulot sa GINOO sing halad nga kalan-on, kinahanglan iya anay ini galingon agod magpino. Butangan niya ini sing lana nga olivo kag insyenso,

2 kag dalhon niya ini sa mga pari nga kaliwat ni Aaron. Ang pari nga nagaalagad magakuha sing isa ka hakop nga arina kag lana lakip ang tanan nga insyenso kag sunogon niya ini sa altar subong isa ka tanda nga ini tanan nahalad sa GINOO. Ang baho sining halad nga kalan-on mahamot sa GINOO.

3 Ang nabilin sang halad nga kalan-on iya sang mga pari; labing balaan ini, tungod kay bahin ini sang kalan-on nga ginhalad sa GINOO.

4 Kon ang halad isa ka tinapay nga naluto sa horno, kinahanglan lutoon ini nga wala sing lebadora. Ayhan madamol ini nga tinapay nga nahimo sa arina nga nasamuan sing lana nga olivo ukon manipis nga tinapay nga nahibuan sing lana nga olivo.

5 Kon ang halad isa ka tinapay nga naluto sa sartin, kinahanglan nahimo ini sa arina nga nasamuan sing lana nga olivo, pero wala sing lebadora.

6 Pudpora ini kag buboi sing lana kon idulot mo ini subong isa ka halad.

7 Kon ang halad isa ka tinapay nga naluto sa kalaha, kinahanglan nahimo ini sa arina kag lana nga olivo.

8 Dalha ini subong isa ka halad sa GINOO kag dalha ini sa pari nga amo ang magadala sini sa altar.

9 Ang pari magakuha sang bahin sini subong isa ka tanda nga ini tanan nahalad sa GINOO, kag sunogon niya ini sa altar. Ang baho sining halad nga kalan-on mahamot sa GINOO.

10 Ang nabilin sang halad iya sang mga pari; labing balaan ini tungod kay bahin ini sang kalan-on nga ginahalad sa GINOO.

11 Wala sing halad nga kalan-on nga may lebadora nga inyo ihalad sa GINOO; indi gid kamo maggamit sing lebadora ukon dugos sa kalan-on nga ginahalad sa GINOO.

12 Ang halad sang nahauna nga patubas nga inyo ginaani sa tagsa ka tuig pagadalhon sa GINOO, pero indi ini pagsunogon sa altar.

13 Asini ang tagsa ka halad nga kalan-on, kay ang asin tanda sang kasugtanan sa tunga ninyo kag sa Dios. (Kinahanglan asinan ninyo ang tanan nga mga halad.)

14 Kon magdala kamo sa GINOO sang halad sang nahauna nga patubas sang uyas, magdulot kamo sang sinanlag nga uyas ukon ginaling nga kalan-on.

15 Butangi ini sing lana nga olivo kag insyenso.

16 Ang pari magasunog sang bahin sang ginaling nga kalan-on kag sang lana subong isa ka tanda, kag sang tanan man nga insyenso, subong isa ka halad nga kalan-on sa GINOO.

LEVITICO - Kapitulo 1 <<<   >>> LEVITICO - Kapitulo 3