●●●●●
Ang Pagkabalaan sang Dugo
1 Ang Ginoo nagsugo kay Moises
2 sa paghatag kay Aaron kag sa iya mga anak nga lalaki kag sa tanan nga mga tawo sang Israel sang masunod nga mga pagsulondan.
3-4 Ang isa ka Israelinhon nga mag-ihaw sing baka ukon karnero ukon kanding subong isa ka halad sa Ginoo sa iban nga duog luas sa puwertahan sang Tolda nga Tilipunan nakalapas sang kasugoan. Nagpaagay sia sing dugo kag indi na sia pagkabigon nga isa sang mga tawo sang Dios.
5 Ang buot silingon sini nga kasugoan amo nga ang mga tawo sang Israel karon, magadala sa Ginoo sang mga sapat nga ila anay ginapatay sa desierto. Ila na karon ini dalhon sa pari sa puwertahan sang Tolda nga Tilipunan kag ihawon nila ini subong mga halad sa paghiambit.
6 Ang pari magaula sang dugo sa mga kilid sang altar sa puwertahan sang Tolda kag sunogon niya ang sapay agod maggwa ang baho nga magalipay sa Ginoo.
7 Ang mga tawo sang Israel indi na maglapas sa GINOO paagi sa pag-ihaw sang mga sapat sa kawayanan subong mga halad sa mga kanding nga demonyo. Ang mga tawo sang Israel dapat magtuman sini nga pagsulondan sa tanan nga panahon nga palaabuton.
8 Ang bisan sin-o nga Israelinhon ukon dumoluong nga nagapuyo sa katilingban nga magdulot sang isa ka halad nga sinunog ukon bisan ano nga iban nga dulot
9 subong isa ka halad sa Ginoo bisan diin luas sa puwertahan sang Tolda nga Tilipunan, indi na pagkabigon nga isa sang mga tawo sang Dios.
10 Ang bisan sin-o nga Israelinhon ukon dumoluong nga nagapuyo sa katilingban nga magkaon sang karne nga yara pa ang dugo sa sini, ang Ginoo manginbatok sa iya kag indi na sia pagkabigon nga isa sang iya mga tawo.
11 Ang kabuhi sang tagsa ka nagakabuhi nga butang yara sa dugo, kag tungod sini ang Ginoo nagmando nga ang tanan nga dugo iula sa altar sa pagkuha sang mga sala sang mga tawo. Ang buhi nga dugo nagakuha sang mga sala.
12 Amo man ini ang kabangdanan nga ginsingganan sang Ginoo ang mga tawo sang Israel nga sila ukon ang bisan sin-o nga dumoluong nga nagapuyo upod sa ila indi magkaon sang bisan ano nga karne nga yara pa ang dugo sa sini.
13 Kon ang bisan sin-o nga Israelinhon ukon dumoluong nga nagapuyo sa katilingban makadakop sing sapat ukon pispis nga di-matinlo, iya iula ang dugo sini sa duta kag tabunan ini sang duta.
14 Ang kabuhi sang tagsa ka nagakabuhi nga butang yara sa dugo, kag tungod sini ginsingganan sang Ginoo ang mga tawo sang Israel nga indi sila magkaon sang bisan ano nga karne nga yara pa ang dugo sa sini, kag nga ang bisan sin-o nga magkaon sini indi na pagkabigon nga isa sang iya mga tawo.
15 Ang bisan sin-o nga Israelinhon ukon dumoluong nga magkaon sang karne sang sapat nga napatay ukon ginpatay sang mapintas nga mga sapat kinahanglan maglaba sang iya mga bayu, magpaligo, kag maghulat tubtob sa gab-i sa wala pa sia magmanginmatinlo.
16 Kon indi sia, kinahanglan magaantos sia sang bungahon sini.
No comments:
Post a Comment