●●●●●
Mga Kasugoan nahanungod sa Balatian sa Panit
1 Ang GINOO naghatag kay Moises kag kay Aaron sini nga mga pagsulondan.
2 Ang bisan sin-o nga may katol sa panit, isa ka hubag ukon pagpalanghabal nga mahimo nga isa ka balatian nga makalalaton, pagadalhon sia sa pari nga kaliwat ni Aaron.
3 Ang pari magausisa sang amo nga balatian, kag kon ang mga bulbol sa sini nagpalamuti kag daw lambot gid ini sa unod, makalalaton ini nga balatian sa panit. Sa tapos mausisa sang pari ang amo nga tawo, pagalawagon niya sia nga di-matinlo.
4 Pero kon ang pagpalanghabal maputi kag indi man lambot sa unod sa palibot sini kag ang mga bulbol wala man magputi, pagapainon sang pari ang amo nga tawo sa sulod sang pito ka adlaw.
5 Ang pari magausisa liwat sa iya sa ikapito nga adlaw kag kon, sa iya hunahona, ang balatian amo man gihapon kag wala man maglapta, iya na man sia painon sa sulod sang pito pa ka adlaw.
6 Ang pari magausisa naman sa iya sa ikapito nga adlaw kag kon ang balatian nagkupos na kag wala man maglapta pagalawagon niya sia nga matinlo; palanghabal lamang ini. Ang tawo magalaba sang iya mga bayu kag manginmatinlo sia.
7 Pero kon ang balatian maglapta sa tapos sia mausisa sang pari kag malawag nga matinlo sia, kinahanglan mag-atubang sia liwat sa pari.
8 Pagausisaon sia liwat sang pari, kag kon nagalapta ini, pagalawagon niya sia nga di-matinlo; isa ini ka balatian sa panit nga makalalaton.
9 Kon ang bisan sin-o may balatian sa panit nga makalalaton, pagadalhon sia sa pari,
10 nga amo ang magausisa sa iya. Kon may lamuti sa iya panit nga nagaputi kag tungod sini nagaputi ang mga bulbol kag puno ini sing nana,
11 isa ini ka balatian nga nagaliwat-liwat. Ang pari magalawag sa iya nga di-matinlo; indi na kinahanglan nga painon pa sia, kay maathag na nga di-matinlo sia.
12 Kon ang balatian sa panit naglapta na kag naglikop na ini halin sa iya ulo tubtob sa iya dapadapa,
13 pagausisaon sia liwat sang pari. Kon masapwan niya nga naglikop na ini sa bug-os niya nga lawas, pagalawagon niya ang tawo nga matinlo. Kon ang iya bug-os nga panit nagpalamuti, matinlo na sia.
14 Pero sa tion nga magpakita ang nagabuad-ad nga unod, di-matinlo sia.
15 Ang pari magausisa liwat sa iya, kag kon makita niya ang nagabuad-ad nga unod, pagalawagon niya sia nga di-matinlo. Ang nagabuad-ad nga unod nagakahulogan nga makalalaton ini nga balatian sa panit, kag ang tawo di-matinlo.
16 Pero kon ang palanghabal magkupos kag magpalamuti ini liwat, ang tawo magakadto sa pari,
17 nga magausisa liwat sa iya. Kon ang palanghabal nagputi, matinlo sia kag ang pari magalawag sa iya nga matinlo.
18 Kon ang bisan sin-o may hubag nga nag-ayo
19 kag sa ulihi nagpakita ang isa ka lamuti nga maputi ukon mapulapula sa duog sang hubag, magakadto sia sa pari.
20 Pagausisaon sia sang pari, kag kon nagalambot gid ini sa unod kag ang mga bulbol sa sini nga bahin nagputi, pagalawagon niya sia nga di-matinlo. Ini nga balatian sa panit makalalaton nga nagsugod sa isa ka hubag.
21 Pero kon makita sang pari nga nagausisa nga ang mga bulbol wala magputi kag hapaw man lang ini sa panit, kag nagkupos na ini, pagapainon sia sang pari sa sulod sang pito ka adlaw.
22 Kon maglapta ini, ang pari magalawag sa iya nga di-matinlo, kay may balatian sia nga makalalaton.
23 Pero kon wala man ini magbaylo kag wala man maglapta, pinalian lamang ini sang hubag, kag ang pari magalawag sa iya nga matinlo.
24 Kon may isa ka tawo nga napaso, kag ang iya unod nagpalamuti ukon nagpulapula,
25 pagausisaon sia sang pari. Kon ang mga bulbol sa sini nga bahin nagputi kag daw lambot gid ini sa unod, isa ini ka balatian sa panit nga makalalaton nga nagsugod sa paso kag ang pari magalawag sa iya nga di-matinio.
26 Pero kon ang mga bulbol sa sini nga bahin wala magputi kag hapaw man lang ini kag nagakupos na, pagapainon sia sang pari sa sulod sang pito ka adlaw.
27 Pagausisaon sia liwat sang pari sa ikapito nga adlaw, kag kon nagalapta ini, isa ini ka balatian sa panit nga makalalaton, kag ang pari magalawag sa iya nga di-matinlo.
28 Pero kon wala man ini magbaylo kag wala man maglapta, kag nagkupos na, isa lamang ini ka hubag. Ang pari magalawag sa iya nga matinlo, kay isa lamang ini ka pinalian sang paso.
29 Kon ang isa ka lalaki ukon babayi may palanghabal sa ulo ukon sa sag-ang,
30 ang pari magausisa sini. Kon nagalambot ini sa unod kag ang mga buhok sa sini nga bahin nagadalag kag nagalaka, isa ini ka balatian sa panit nga makalalaton, kag ang pari magalawag sa iya nga di-matinlo.
31 Kon sa pag-usisa sa iya sang pari, masapwan nga hapaw man lang ini, pero wala pa sing maayo nga buhok nga nagatubo sa sini, pagapainon sia sang pari sa sulod sang pito ka adlaw.
32 Pagausisaon liwat ini sang pari sa ikapito nga adlaw, kag kon wala ini maglapta kag wala man sing nagadalag nga mga buhok sa sini nga bahin, kag kon daw hapaw man lang ini,
32 Pagausisaon liwat ini sang pari sa ikapito nga adlaw, kag kon wala ini maglapta kag wala man sing nagadalag nga mga buhok sa sini nga bahin, kag kon daw hapaw man lang ini,
33 pagabarbasan sang amo nga tawo ang palibot sang bahin nga nagapalanghabal. Dayon pagapainon sia sang pari sa sulod naman sang pito ka adlaw.
34 Sa ikapito nga adlaw ang pari magausisa liwat sang iya balatian, kag kon wala ini maglapta, kag kon daw hapaw man lang ini, pagalawagon niya sia nga matinlo. Ang tawo magalaba sang iya mga bayu, kag manginmatinlo sia.
35 Pero kon ang balatian maglapta sa tapos malawag sia nga matinlo,
36 ang pari magausisa liwat sa iya. Kon ang balatian naglapta, indi na kinahanglan nga magpangita pa sia sang mga buhok nga nagadalag, kay maathag gid nga di-matinlo sia.
37 Pero, kon sa panghunahona sang pari, ang balatian wala maglapta kag ang maayo nga mga buhok nagatubo na sa sini, ang balatian nag-ayo na, kag ang pari magalawag sa iya nga matinlo.
38 Kon ang isa ka lalaki ukon babayi may nagapalamuti sa iya panit,
39 ang pari magausisa sa iya. Kon ang pagpalamuti malubog, isa lamang ini ka katikati nga nagbuswang sa panit, kag ang amo nga tawo matinlo.
40-41 Kon ang buhok sang isa ka tawo nagakaunot sa iya alimpudwan ukon sa iya agtang, wala ini nagakahulogan nga ang amo nga tawo di-matinlo.
42 Pero kon ang mapulapula nga hubag nagapahayag sa kalbo, isa ini ka balatian sa panit nga makalalaton.
43 Pagausisaon sia sang pari, kag kon may yara nga hubag nga mapulapula,
44 ang pari magalawag nga di-matinlo sia, tungod sang makalalaton nga balatian sa iya ulo.
45 Ang tawo nga may makalalaton nga balatian sa panit magsuksok sang gisi nga mga bayu, kag pabay-an niya ang iya buhok nga wala mahusay, tabunan niya ang iya guya halin sa baba paidalom, kag magsinggit, “Di-matinlo ako, di-matinlo ako!"
46 Magapabilin sia nga di-matinlo tubtob nga wala pa sia mag-ayo sa iya balatian kag kinahanglan magpuyo sia sa gwa sang kampamento nga malayo sa iban nga mga tawo.
Mga Kasugoan nahanungod sang Mansa sang Balatian
47 Kon may yara nga mansa sang balatiand sa bayu, bisan delana ukon lino,
48 ukon bisan ano nga lino ukon delana nga panapton, ukon sa panit ukon sa bisan ano nga nahimo sa panit,
49 kon ang mansa buloberdi ukon mapu- lapula, nagalapta ini nga mansa sang balatian, kag kinahanglan ipakita ini sa pari.
50 Ang pari magausisa sini kag magatago sini sing pain sa sulod sang pito ka adlaw.
51 Usisaon niya ini liwat sa ikapito nga adlaw, kag kon ang mansa sang balatian naglapta, ang butang nga namansahan di-matinlo.
52 Pagasunogon ini sang pari, tungod kay ini isa ka mansa sang balatian nga nagalapta nga kinahanglan sunogon sa kalayo.
53 Pero kon sa pag-usisa sang pari, makita niya nga ang mansa sang balatian wala maglapta sa amo nga butang,
54 pahugasan niya ini kag ipatago sing pain sa sulod sang pito naman ka adlaw.
55 Dayon iya ini usisaon, kag kon ang mansa sang balatian wala magbaylo ang kolor, bisan wala ini maglapta, sa gihapon di-matinlo ini; kinahanglan sunogon mo ini sa kalayo, bisan ang iya mansa yara sa atubangan ukon sa likod.
56 Pero kon sa pag-usisa sini liwat sang pari, ang mansa sang balatian napanas, iya ini gision sa panapton ukon sa panit.
57 Dayon, kon magpahayag liwat ang mansa sang balatian, nagalapta ini liwat, kag ang tag-iya magasunog sini nga butang.
58 Kon labhan niya ini nga butang kag ang mansa mapanas, labhan niya ini liwat, kag manginmatinlo ini.
59 Gani, amo ini ang kasugoan nahanungod sang mansa sang balatian sa bayu, bisan delana ini ukon lino, ukon sa lino ukon sa delana nga panapton, ukon sa bisan ano nga butang nga nahimo sa panit.
dMANSA SANG BALATIAN: Sa Hebreo, ang pulong para sa "balatian sa panit nga ginakangil-aran" kag ang "mansa sang balatian" pareho.
No comments:
Post a Comment