♤♤♤♤♤
Ang Kaugalingon nga mga Tawo sang GINOO
(Ex. 34:11-16)
1 "Ang Ginoo nga inyo Dios magadala sa inyo sa duta nga inyo panag- iyahan, kag iya tabugon ang madamo nga mga pungsod gikan sini. Samtang nagapasulod kamo, tabugon ninyo ang pito ka mga pungsod nga dalagku kag gamhanan pa sa inyo: ang mga Hethanon, mga Gergasnon, mga Amornon, mga Canaanhon, mga Pereznon, mga Hebhanon kag mga Jebusnon.
2 Kon ang Ginoo nga inyo Dios magtugyan sini nga mga tawo sa inyo gahom kag malutos sila, pamatyon ninyo sila tanan. Indi kamo maghimo sing kasugtanan sa ila ukon magkaluoy sa ila.
3 Indi kamo magpangasawa sa ila, kag indi ninyo pag-ipaasawa ang inyo mga anak sa ila,
4 kay ipahilayo nila ang inyo kaanakan sa GINOO sa pagsimba sa iban nga mga dios. Dayon ang Ginoo magakaakig sa inyo kag sa gilayon pamatyon niya kamo.
5 Amo ini ang inyo himuon sa sini nga mga tawo: Panggub-on ninyo ang ila mga altar, tumbahon ninyo ang ila bato nga haligi nga balaan, pudlon ninyo ang ila balaan nga mga haligi, kag sunogon ninyo ang ila mga diosdios.
6 Himoa ninyo ini kay iya kamo sang Ginoo nga inyo Dios. Gikan sa tanan nga mga tawo sa duta, ginpili niya kamo nga mangin-iya kaugalingon nga pinasahi nga mga duta.
7 "Ang Ginoo wala maghigugma kag magpili sa inyo tungod kay madamo kamo sang sa iban nga mga katawuhan. Kon sa bagay kamo ang pinakadiutay nga pungsod sa duta.
8 Pero ang Ginoo naghigugma sa inyo kag luyag niya tumanon ang saad nga ginhimo niya sa inyo mga katigulangan. Gani ginluwas niya kamo paagi sa iya daku nga gahom kag ginluwas niya kamo gikan sa pag-ulipon sa inyo sang hari sang Egipto.
9 Dumdoma nga ang GINOO nga inyo Dios amo lamang ang Dios, kag masaligan sia. Tumanon niya ang iya kasugtanan sa inyo kag ipakita niya ang iya malig-on nga paghigugma sa linibo nga mga kaliwatan nga nagahigugma sa iya kag nagatuman sa iya mga sugo,
10 pero silutan niya ang mga nagadumot sa iya.
11 Gani tumana ninyo ang gintudlo sa inyo. Tumana ang tanan nga mga kasugoan nga akon ginhatag sa inyo karon nga adlaw.
Ang mga Kaayuhan gikan sa Pagtuman
(Deut. 28:1-14)
12 “Kon magpamati kamo sa sini nga mga sugo kag magtuman sini sing matutom, dayon ang Ginoo nga inyo Dios magapadayon sa pagtuman sang iya kasugtanan sa inyo kag magapakita sa inyo sang iya malig-on nga gugma suno sa iya ginsaad sa inyo mga katigulangan.
13 Sia magahigugma kag magabendisyon sa inyo, agod magadamo kamo kag magabata kamo sing madamo. Sia magapauswag sang inyo mga uma, agod may trigo kamo, bino, kag lana sang olibo. Pauswagon niya kamo paagi sa paghatag sa inyo sang madamo nga mga kabakahan kag mga karnero. Ihatag niya sa inyo ini tanan nga mga kaayuhan sa duta nga iya ginsaad sa inyo mga katigulangan nga ihatag sa inyo.
14 Wala sing mga tawo sa kalibutan nga ginhatagan sing madamo nga kaayuhan subong sang sa inyo. Wala sing isa sa inyo nga manginbaw-as, ukon sa inyo mga baka nga manginmatsura.
15 Ang GINOO magaapin sa inyo sa tanan nga mga masakit. Indi niya kamo pagpamasakiton sadtong mga makahaladlok nga balatian nga inyo inagihan sa Egipto, pero ihatag niya ini sa inyo mga kaaway.
16 Laglaga ninyo ang tagsa ka pungsod nga gintugyan sang Ginoo nga inyo Dios sa inyo gahom, kag indi sila pagkaluoyi. Indi kamo magsimba sa ila mga dios, kay ini manginsiod sa inyo.
17 "Indi kamo magsiling sa inyo kaugalingon nga ini nga mga tawo madamo pa sa inyo kag indi kamo makasarang sa pagtabog sa ila.
18 Indi kamo magkahadlok sa ila. Dumdoma ninyo ang ginhimo sang Ginoo nga inyo Dios sa hari sang Egipto kag sa tanan niya nga mga tawo.
19 Dumdoma ninyo ang makahaladlok nga mga kalalat-an nga nakita sang inyo kaugalingon nga mga mata, ang mga milagro kag mga kalatingalahan, kag ang daku nga gahom kag kusog nga paagi sini ginluwas kamo sang Ginoo nga inyo Dios. Pamatyon niya ini tanan nga mga tawo nga inyo karon ginakahadlukan, subong sang iya pagpamatay sang mga Egiptohanon.
20 Sia magapahadlok sa ila, kag magapamatay sang mga nagapalagyo sa ila palanaguan.
21 Indi kamo magkahadlok sa sini nga mga tawo. Ang Ginoo nga inyo Dios kaupod ninyo. Gamhanan sia nga Dios kag dapat kahadlukan.
22 Tabugon niya ang mga kapungsoran sing amat-amat samtang nagapasulod kamo, pero indi ninyo sila mapapas sa gilayon. Kon inyo ini himuon, ang mga sapat nga talunon magadamo kag manginkatalagman ini sa inyo.
23 Ang Ginoo magatugyan sang inyo mga kaaway sa inyo gahom kag magapasalasala sa ila tubtob sila malaglag.
24 Itugyan niya sa inyo gahom ang ila mga hari. Pamatyon ninyo sila, kag indi na sila pagdumdomon. Wala sing may makadaog sa inyo; pamatyon ninyo ang tagsatagsa.
25 Sunoga ninyo ang ila mga diosdios. Indi kamo maghandom sang ila pilak ukon bulawan, kag indi ninyo pagkuhaon para sa inyo kaugalingon. Kon himuon ninyo ini, manginsiod ini sa inyo, kay ang Ginoo nagadumot sang mga nagasimba sa mga diosdios.
26 Indi kamo magdala sing bisan ano nga mga diosdios sa inyo mga balay, kag pakamalauton man kamo pareho sang sa ila. Kinahanglan dumtan ninyo kag kangil-aran ini nga mga diosdios kay ini sila ginpakamalaut sang Ginoo.
No comments:
Post a Comment