NUMEROS - Kapitulo 13

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang mga Espiya

(Deut 1:19-33)

1 Ang Ginoo nagsiling kay Moises,

2 “Magpili ka sing isa sa mga pangulo gikan sa tagsatagsa sang 12 ka mga tribo kag ipadala sila subong mga espiya sa pag-usisa sang duta sang Canaan, nga akon ginahatag sa mga Israelinhon."

3-15 Gintuman ini ni Moises kag halin sa desierto sang Paran nagpadala sia sing mga pangulo nga amo ang masunod:

Tribo                     Pangulo

Ruben                  Samua nga anak ni Zacur

Simeon                Safat nga anak ni Hori

Juda                     Caleb nga anak ni Jefone

Isacar                   Igal nga anak ni Jose

Efraim                 Hosea nga anak ni Nun

Benjamin            Palti nga anak ni Rafu

Zabulon              Gadiel nga anak ni Sodi

Manases            Gadi nga anak ni Susi

Dan                     Amiel nga anak ni Gemali

Aser                    Seteur nga anak ni Micael

Neftali                Nahabi nga anak ni Vapsi

Gad                     Gevel nga anak ni Maqui

16 Amo ini ang mga espiya nga ginpadala ni Moises sa pag-usisa sang duta. Gin-ilisan niya ang ngalan ni Hosea nga anak ni Nun sa kay Josue.

17 Sang pagdala ni Moises sa ila, ginsingganan niya sila, "Magpakadto kamo sa aminhan halin diri pakadto sa nabagatnan nga bahin sang duta sang Canaan kag dayon pakadto kamo sa kabakuloran.

18 Usisaa ninyo kon ano nga sahi sang pungsod ini, kon pila ang mga tawo nga nagapuyo didto, kag kon daw ano kabakod sa ila.

19 Usisaa ninyo kon bala ang duta maayo ukon malain kag kon bala ang mga tawo nagapuyo sa mga banwa nga wala sing pader ukon sa mga siyudad nga napamakuran.

20 Usisaa ninyo kon bala ang duta maayo tamnan ukon ang duta may mga kakahoyan. Kag pat-ura ninyo nga may dala kamo nga mga bunga sang mga kahoy nga nagatubo didto." (Panahon gid yadto nga nagahimugasa ang mga ubas.)

21 Gani ang mga tawo nagpakadto sa naaminhan kag gin-usisa nila ang duta halin sa desierto sang Zin sa nabagatnan pakadto sa Rehob, malapit sa salamputan sang Hamat sa aminhan.

22 Nagkadto sila sing una sa nabagatnan nga bahin sang duta kag nakaabot sila sa Hebron, sa diin nagapuyo ang mga kabaranggayan nanday Ahiman, Sesai, kag Talmai, ang mga kaliwat sang mga higante nga ginatawag mga Anakim. (Ang Hebron ginpasad sing pito ka tuig sa wala pa ang Zoan sa Egipto.)

23 Nakaabot sila sa kapatagan sa Escol kag didto nag-ipo sang isa ka sanga nga may isa ka pungpong sang mga ubas nga tama ka bug-at sa bagay nga duha ka tawo ang kinahanglan magyayong sini. Nagdala man sila sing mga granada kag mga higos.

Duha ka tawo ang kinahanglan magyayong sini. (13:23)

24 (Yadto nga duog ginhingalan nga Kapatagan sang Escol^j tungod sang pinungpong nga ubas nga gin-ipo sang mga Israelinhon didto.)

25 Sa tapos nila mausisa ang duta sa sulod sang 40 ka adlaw, ang mga espiya nagbalik

26 kanday Moises, Aaron, kag sa bug-os nga katilingban sang Israel sa Cades sa desierto sang Paran. Ginsugid nila ang ila nakita kag ginpakita nila ang prutas nga ila gindala.

27 Ginsugiran nila si Moises, "Gin-usisa namon ang duta kag nasapwan namon ini nga maayo kag mapatubason; kag yari ang iban sang iya mga prutas.

28 Pero ang mga tawo nga nagapuyo didto tama ka gamhanan kag ang ila mga siyudad tama ka dalagku kag napamakuran sing maayo. Ang malain pa gid kay nakita namon ang mga kaliwat sang mga higante didto.

29 Ang mga Amaleknon nagapuyo sa nabagatnan nga bahin sang duta; ang mga Hethanon, ang mga Jebusnon, kag ang mga Amornon nagapuyo sa kabakuloran; kag ang mga Canaanhon nagapuyo sa ubay sang dagat sang Mediteraneo kag sa ubay sang suba sang Jordan.”

30 Ginpahipos ni Caleb ang mga tawo nga nagreklamo batok kay^k Moises, kag nagsiling sia, "Kinahanglan salakayon naton karon kag agawon ang duta; masarangan naton ang pag-agaw sini."

31 Pero ang mga tawo nga nag-upod kay Caleb nagsiling, "Indi kita makasarang sa pagsalakay; ang mga tawo didto tama ka gamhanan sang sa aton.”

32 Gani ginpalapnag nila ang binutig nga sugid sa mga Israelinhon nahanungod sang duta nga ila gin-usisa. Nagsiling sila, "Ang duta indi makapatubas sing tuman nga kalan-on para sa mga tawo nga nagapuyo didto. Ang tagsatagsa nga nakita namon tama ka taas

33 kag nakita pa gani namon didto ang mga higante, ang mga kaliwat ni Anak. Daw pareho lang kami ka gagmay sang mga tibakla, kag amo ina ang ila pagtan-aw sa amon."

^jESCOL: Ini nga ngalan sa Hebreo nagakahulogan "pinungpong sang ubas."
^knagreklamo batok kay; ukon nagtipon sa palibot ini.

NUMEROS - Kapitulo 12 <<<   >>> NUMEROS - Kapitulo 14