♤♤♤♤♤
Ang Maayo nga Duta nga Pagapanag-iyahan
1 "Magmatutom kamo sa pagtuman sang tanan nga ginsugo ko sa inyo karon nga adlaw, agod nga magkabuhi kamo, magdamo, kag magapanag-iya sang duta nga ginsaad sang Ginoo sa inyo mga katigulangan.
2 Dumdoma ninyo kon daw ano ang pagtuytoy sang Ginoo nga inyo Dios sa inyo malawig nga pagpanglakaton sa desierto sa sulod sang nagligad nga 40 ka tuig. Ginpadalhan niya kamo sing mga kabudlayan sa pagtilaw sa inyo, agod iya mahibaluan kon ano ang yara sa inyo tagipusoon kag kon inyo tumanon ang iya mga sugo.
3 Ginpagutoman niya kamo, dayon ginhatagan niya kamo sing mana nga kaunon, isa ka sahi sang kalan-on nga wala pa gid ninyo matilawi kag sang inyo mga katigulangan halin sang una. Ginhimo niya ini sa pagtudlo sa inyo nga indi lamang sa pagkaon mabuhi ang tawo kundi nagakinahanglan man sia sang pulong sang Dios.
4 Ang inyo mga bayu wala maggabok kag ang inyo mga tiil wala magbanog sa sulod sang 40 ka tuig.
5 Dumdoma nga ang Ginoo nga inyo Dios nagasabdong kag nagasilot sa inyo kaangay sang pagdisiplina sang isa ka amay sa iya mga kabataan.
6 Gani tumana ang ginasugo sang Ginoo sa inyo: magkabuhi kamo suno sa iya mga kasugoan, kag tahura ninyo sia.
7 Ang Ginoo nga inyo Dios nagadala sa inyo sa isa ka maayo nga duta—isa ka duta nga may mga suba kag mga sapa, kag mga tuboran nga nagaibwal pakadto sa kapatagan kag mga kabakuloran;
8 isa ka duta nga nagapatubas sang trigo kag sebada, ubas, higos, granada, olibo kag dugos.
9 Didto indi kamo paggutomon ukon mawad-an sang bisan ano. Ang iya sini mga bato may mga salsalon, kag sarang ikaw makamina sing saway halin sa iya bakulod.
10 Yara ang tanan nga luyag ninyo kaunon, kag magapasalamat kamo sa Ginoo nga inyo Dios tungod sang maayo nga duta nga iya ginhatag sa inyo.
Paandam batok sa Pagkalimot sa GINOO
11 "Mag-andam kamo nga indi magkalimot sa Ginoo nga inyo Dios, kag indi kamo magkalipat sa pagtuman sang tanan niya nga mga kasugoan nga akon ginhatag sa inyo karon nga adlaw.
12 Kon bugana ang inyo kalan-on, kag nakapatindog na kamo sing maayo nga mga balay nga inyo pagapuy-an,
13 kon magdamo ang inyo mga kabakahan kag mga karnero, ang inyo mga pilak kag mga bulawan, kag ang tanan ninyo nga mga pagkabutang,
14 mag-andam kamo nga indi kamo magpabugal kag magkalimot sa Ginoo nga inyo Dios nga nagpagwa sa inyo gikan sa Egipto sa diin gin-ulipon kamo.
15 Gintuytoyan niya kamo sa malapad kag makahaladlok nga desierto nga may dalitan nga mga man-og kag mga iwiiwi. Sa mamala kag kigas nga duta ginpailig niya ang tubig gikan sa bato bantiling.
16 Didto sa desierto ginhatagan niya kamo sing mana nga kaunon, isa ka sahi sang kalan-on nga wala gid matilawi sang inyo mga katigulangan. Nagpadala sia sing mga kabudlayan sa pagtilaw sa inyo, agod nga sa ulihi hatagan niya kamo sing maayo nga mga butang.
17 Gani, indi kamo magpanghunahona nga nagmanggaranon kamo paagi sa inyo kaugalingon nga gahom kag kusog.
18 Dumdoma ninyo nga ang Ginoo nga inyo Dios naghatag sa inyo sing gahom nga magmanggaranon. Ginhimo niya ini kay matutom sia sa pagtuman sang kasugtanan nga ginhimo niya sa inyo mga katigulangan, kag matutom sia gihapon sa kasugtanan tubtob karon.
19 Indi kamo magkalimot sa Ginoo nga inyo Dios kag magsimba kag mag-alagad sa iban nga mga dios. Kon himuon ninyo ini, nagapaandam ako sa inyo karon nga adlaw nga pat-od gid nga malaglag kamo.
20 Kon indi kamo magtuman sa Ginoo, pagalaglagon kamo kaangay sadtong mga pungsod nga iya pagalaglagon samtang kamo nagapasulod sa duta.
No comments:
Post a Comment