JOSUE - Kapitulo 3

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang mga Israelinhon Nagtabok sa Jordan

1 Aga pa gid nagbangon si Josue kag ang tanan nga mga tawo sang Israel. Naghalin sila sa kampamento sang Sitim, kag nagkadto sila sa Jordan. Naghimo anay sila sang ila kampamento didto, sa wala pa sila magtabok.
2 Sa tapos ang tatlo ka adlaw, ang mga pangulo naglibot sa kampamento
3 kag ginsingganan ang mga tawo, "Kon makita ninyo ang mga pari nga nagadala sang Kaban sang Kasugtanan sang Ginoo nga inyo Dios, panghimos kamo kag sundon ini.
4 Dayon mahibaluan ninyo kon diin kamo maagi, kay wala pa ninyo maagyi ini nga dalan. Pero indi kamo magpalapit sa Kaban sang Kasugtanan. Mag-antad kamo sing mga tunga sa kilometro sa ulihi sini."
5 Ginsingganan ni Josue ang mga tawo, "Ihalad ang inyo mga kaugalingon sa Ginoo, kay buas ang GINOO magahimo sing dalagku nga mga butang sa tunga ninyo."
6 Dayon ginsingganan ni Josue ang mga pari, "Hakwata ninyo ang Kaban sang Kasugtanan, kag maglakat kamo nga nagauna sa mga tawo." Kag gintuman nila ang ginsiling ni Josue.
7 Dayon nagsiling ang Ginoo sa kay Josue, "Sa akon pagahimuon karon nga adlaw, ang tanan nga tawo sang Israel magapadungog sa imo subong isa ka gamhanan nga tawo, kag mahibaluan nila nga ako nagaupod sa imo subong nga ako nag-upod kay Moises.
8 Mandoi ang mga pari nga nagadala sang Kaban sang Kasugtanan, ‘Kon mag-abot kamo sa Suba sang Jordan, magdulog kamo sa bibi sang tubig nga malapit sa pang-pang.'''
9 Karon si Josue nagsiling sa mga tawo, "Kari kamo, kag pamatii ang ginasiling sang Ginoo nga inyo Dios.
10 Karon nga adlaw inyo mahibaluan nga ang Dios nga buhi kaupod ninyo. Samtang nagaabanse kamo, tabugon niya ang mga Canaanhon, ang mga Hethanon, ang mga Hebhanon, ang mga Paresnon, ang mga Gergesnon, ang mga Amornon, kag ang mga Hebusnon.
11 Ang Kaban sang Kasugtanan sang Ginoo sang bug-os nga duta, nagatabok sa Jordan nga nagauna sa inyo.
12 Karon pili ka sing dose ka mga tawo, isa sa tagsa ka tribo sang Israel.
13 Kon ang mga pari nga nagadala sang Kaban sang Kasugtanan sang Ginoo sang bug-os nga duta, mag-ubog sang ila mga tiil sa tubig, ang Suba sang Jordan magauntat sa pag-ilig, kag ang tubig nga nagailig halin sa ilaya magapunong sa isa ka duog."
14 Tig-alani sadto nga tion, kag nagabaha ang suba. Gani ang mga tawo naghalin sa kampamento sa pagtabok sa Jordan. Nag-una ang mga pari, nga nagadala sang Kaban sang Kasugtanan.
15 Sang pag-abot nila sa bibi sang Jordan kag gin-ubog ang ila mga tiil sa tubig,
16 nag-untat sa pag-ilig ang tubig, kag nagpunong ini sing malawig pa ilaya sa Adam, ang siyudad sa luyo sang Saretan. Ang ilig pa ilawod pakadto sa Dagat nga Patay nag-untat gid sing bug-os, kag ang mga tawo nagtabok sa duog nga malapit sa Jerico.
17 Samtang nagatabok sila nga nagalakat sa mamala nga duta, ang mga pari nga nagadala sang Kaban sang Kasugtanan sang Ginoo nagtindog sa mamala nga duta sa tunga sang Jordan, tubtob nakatabok ang tanan nga mga tawo. 

JOSUE - Kapitulo 2 <<<   >>> JOSUE - Kapitulo 4