□□□□□
Ang Pagbutang sang mga Suga
1 Ang Ginoo nagsiling kay Moises,
2 "Singgana si Aaron nga kon magpamutang sia sang pito ka mga suga sa mga kandileruhan, ipahamtang niya ini agod ang sanag sang mga suga magakadto sa atubangan."
3 Gintuman ini ni Aaron kag ginpahamtang niya ang mga suga nga nagaatubang sa atubangan sang kandileruhan.
4 Halin sa ibabaw paidalom, nahimo ini sa pinapa nga bulawan, suno sa sulondan nga ginpakita sang Ginoo kay Moises.
Ang Pagpaninlo kag Paghalad sang mga Levita
5 Ang Ginoo nagsiling kay Moises,
6 “Paina ang mga Levita sa iban nga mga tawo sang Israel, kag tinloi sila
7 sa sining masunod nga paagi: wisiki sila sang tubig nga ginagamit sa pagpaninlo kag pakiskisi sa ila ang ila bug-os nga lawas, kag palabhi sa ila ang ila mga bayo. Dayon manginmatinlo sila.
8 Dayon magakuha sila sang isa ka torite nga baka kag ang ginakinahanglan nga halad nga kalan-on nga nahimo sa arina nga nasamoan sing lana sang olivo; kag magakuha ka sing isa pa ka toro nga baka para sa halad tungod sa sala.
9 Dayon tipona ang bug-os nga katilingban sang Israel kag ihalad mo ang mga Levita sa atubangan sang Tolda nga Tilipunan.
10 Ang mga tawo sang Israel magabutang sang ila mga kamot sa mga ulo sang mga Levita,
11 kag dayon si Aaron magahalad sang mga Levita sa akon subong isa ka pinasahi nga dulot halin sa mga Israelinhon, agod nga makaalagad sila sa akon.
12 Dayon ang mga Levita magabutang sang ila mga kamot sa mga ulo sang duha ka toro nga baka; ang isa ihalad subong isa ka halad tungod sa sala kag ang isa subong isa ka halad nga sinunog, agod mahimo ang tulumanon sa pagpaninlo para sa mga Levita.
13 "Ihalad sa akon ang mga Levita subong isa ka pinasahi nga dulot sa akon, kag itugyan mo kay Aaron kag sa iya mga anak nga lalaki ang pagdumala sa ila.
14 Sa sini nga paagi paina ang mga Levita sa iban nga mga Israelinhon, agod nga sila mangin-akon.
15 Sa tapos mo matinloan kag mahalad ang mga Levita, mangintakos na sila sa pag-alagad sa Tolda nga Tilipunan.
16 Gin-angkon ko sila sa baylo sang tanan nga mga panganay nga mga anak nga lalaki sang mga Israelinhon kag sila mangin-akon lamang.
17 Sang pagpamatay ko sang tanan nga mga panganay sang Egipto, ginpakabalaan ko agod mangin-akon kaugalingon ang panganay nga anak nga lalaki sang tagsa ka panimalay nga Israelinhon kag ang panganay sang tagsa ka sapat.
18 Karon ginakuha ko ang mga Levita sa baylo sang tanan nga mga panganay sang mga Israelinhon,
19 kag ginatugyan ko ang mga Levita sa kay Aaron kag sa iya mga anak nga lalaki, subong isa ka pinasahi nga dulot halin sa mga Israelinhon, sa pag-alagad sa Tolda nga Tilipunan para sa mga tawo sang Israel kag sa pag-apin sa mga Israelinhon gikan sa kalalat-an nga magaabot sa ila kon magpalapit sila sa Balaan nga Duog.”
20 Gani, si Moises, si Aaron, kag ang tanan nga mga tawo sang Israel naghalad sang mga Levita, suno sa ginsugo sang Ginoo kay Moises.
21 Ang mga Levita nagpaninlo sang ila kaugalingon kag naglaba sang ila mga bayo, kag ginhalad sila ni Aaron subong isa ka pinasahi nga dulot sa Ginoo. Iya man ginhimo ang tulumanon sa pagpaninlo para sa ila.
22 Ang mga tawo nagtuman sang tanan nga ginsugo sang Ginoo kay Moises nahanungod sang mga Levita. Gani, ang mga Levita nangin-takos sa pag-alagad sa Tolda nga Tilipunan sa pagdumala ni Aaron kag sang iya mga anak nga lalaki.
23 Ang Ginoo nagsiling kay Moises,
24 "Ang tagsa ka Levita, halin sa nagaedad sing 25 ka tuig magatuman sang iya mga katungdanan sa Tolda nga Tilipunan,
25 kag sa iya pag-edad sing 50 ka tuig magapahuway sia.
26 Sa tapos sini, sarang sia makabulig sa iya kapareho nga mga Levita sa pagtuman sang ila mga katungdanan sa Tolda, pero indi sia dapat maghimo sang bisan ano nga pag-alagdan sa iya lamang kaugalingon. Amo ini ang imo pagpatuman sang mga katungdanan sang mga Levita."
No comments:
Post a Comment