1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Pagpatindog kag ang Paghalad sang Tolda nga Tilipunan
1 Ang Ginoo nagsiling kay Moises,
2 "Sa nahauna nga adlaw sang nahauna nga bulan, patindugon mo ang puloy-an, ang Tolda nga Tilipunan.
3 Ibutang mo ang kaban nga nasudlan sang malapad nga bato sang kasugtanan sa sulod sini, kag lipnan mo ang kaban sang kurtina.
4 Dalhon mo ang lamisa sa sulod kag ibutang mo ang tanan nga kasangkapan sa sini. Ipasulod mo man ang kandilerohan kag butangan mo ini sang mga suga.
5 Ibutang mo ang altar nga bulawan nga pagasunogan sang insyenso sa atubangan sang kaban nga ginasudlan sang malapadlapad nga bato sang kasugtanan, kag itakod ang kurtina sa puwertahan sang Tolda.
6 Ibutang mo ang altar nga pagasunogan sang mga halad sa atubangan sang Tolda nga Tilipunan.
7 Ibutang mo ang labador sa ulot sang Tolda nga Tilipunan kag sang altar, kag butangan mo ini sing tubig.
8 Ibutang mo ang bungbong palibot kag itakod ang kurtina sa puwertahan sang bungbong.
9 “Dayon kuha ka sing lana nga inughaplas kag haplasan ang Tolda kag ang tanan nga yara dira. Sa sini nga paagi ihalad mo ini kag ang tanan niya nga kasangkapan kag ini manginbalaan.
10 Dayon haplasan mo ang altar nga ginasunogan sang mga halad kag ang tanan niya nga mga kasangkapan. Ihalad mo ini sa sini nga paagi kag manginbalaan gid ini.
11 Haplasan mo ang labador kag iya sini tulongtongan, kag ihalad mo ini sa sini nga paagi.
12 ''Dalhon mo si Aaron kag ang iya mga anak nga lalaki sa puwertahan sang Tolda nga Tilipunan, kag papanghinawa sila sa tubig.
13 Ipasuksok mo ang balaan nga mga bayu kay Aaron, haplasan mo sia, kag sa sini nga paagi konsagrahan mo agod makaalagad sia sa akon subong nga pari.
14 Dalhon mo palapit ang iya mga anak nga lalaki kag pasuksokan mo sila sang ila mga tunika.
15 Dayon haplasan mo sila, subong sang paghaplas mo sa ila amay, agod makaalagad sila sa akon subong mga pari. Sa tapos mo sila mahaplasan manginpari sila sa walay katubtoban."
16 Ginhimo ni Moises ang tanan suno sa ginsugo sang Ginoo sa iya.
17 Gani sa nahauna nga adlaw sang nahauna nga bulan sang ikaduha nga tuig sa tapos sila makagwa sa Egipto ang Tolda nga Tilipunan ginpatindog.
18 Ginpatindog ni Moises ang Tolda nga Tilipunan. Ginpahamtang niya ang iya mga sadsaran, ginbutang ang iya dingding nga mga tapi, gin-angot ang iya mga baral, kag ginpatindog ang iya mga haligi.
19 Ginhumlad niya ang atop sa ibabaw sang Tolda, kag gintaklap niya ang inugsampaw sa atop suno sa ginsugo sang Ginoo sa iya.
20 Dayon ginkuha niya ang mga malapadlapad nga bato sang kasugtanan kag ginsulod ini sa kaban. Gingulo niya ang mga yayungan sa mga dalagku nga mga sulosingsing sang kaban, kag ginbutang ang takop sa ibabaw sini.
21 Dayon ginbutang niya ang kaban sa sulod sang Tolda nga Tilipunan, kag gintakod niya ang nagalipod nga kurtina. Sa sini nga paagi ginlipnan niya ang kaban nga nasudlan sang malapadlapad nga bato sang kasugtanan, suno sa ginsugo sang Ginoo sa iya.
22 Ginbutang niya ang lamisa sa sulod sang Tolda nga Tilipunan, sa naaminhan nga bahin sang tolda nga puloy-an sa gwa sang kurtina,
23 kag ginbutangan niya ini sang tinapay nga nahalad sa Ginoo, suno sa ginsugo sang Ginoo sa iya.
24 Ginbutang niya ang kandilerohan sa sulod sang Tolda nga Tilipunan sa atubangan sang lamisa, sa nabagatnan nga bahin sang Tolda.
25 Ginbutang niya ang mga suga sa ibabaw sini sa atubangan sang Ginoo, suno sa ginsugo sang Ginoo sa iya.
26 Ginbutang niya ang bulawan nga altar sa sulod sang Tolda nga Tilipunan, sa atubangan sang kurtina.
27 Sa ibabaw sini ginsunog niya ang insyenso nga mahamot, suno sa ginsugo sang Ginoo sa iya.
28 Gintakod niya ang kurtina sa puwertahan sang Tolda.
29 Ginbutang niya ang altar nga ginasunogan sang mga halad sa puwertahan sang Tolda nga Tilipunan. Sa ibabaw sini nagdulot sia sing halad nga ginasunog sing bug-os kag ang halad nga kalan-on suno sa ginsugo sang Ginoo sa iya.
30 Ginbutang niya ang labador sa ulot sang Tolda kag sang altar, kag ginsudlan niya sang tubig nga hilinawan.
31 Sanday Moises, Aaron, kag ang iya mga anak nga lalaki nagpanghinaw sang ila mga kamot kag sang ila mga tiil.
32 Kon magsulod sila sa Tolda nga Tilipunan ukon magkadto sa altar, nagapanghinaw sila, suno sa ginsugo sang Ginoo kay Moises.
33 Gintakod niya ang mga bungbong palibot sa Tolda kag sa altar, kag gintakod niya ang kurtina sa puwertahan sang bungbong. Gani natapos ni Moises ang tanan nga bulohaton.
Ang Panganod sa Ibabaw sang Tolda nga Tilipunan
(Num. 9:15-23)
34 Ang panganod nagtabon sang Tolda nga Tilipunan kag ang himaya sang Ginoo nagpuno sa sini.
35 Si Moises indi makasulod sa Tolda nga Tilipunan kay ang panganod nagpabilin sa ibabaw sini, kag ang himaya sang Ginoo nagpuno sa sini.
36 Kon magsaylo ang mga Israelinhon halin sa isa ka kampamento pakadto sa isa, nagahalin lamang sila kon ang panganod maghayaw sa ibabaw sang Tolda nga Tilipunan.
37 Kon indi maghayaw ang panganod, wala sila nagahalin sa ila kampamento, kundi naghulat sila tubtob sa adlaw nga ang panganod maghayaw.
38 Ang panganod nga nagapakita sang presensya sang Ginoo nagapabilin sa ibabaw sang Tolda nga Tilipunan kon adlaw, kag kon gab-i may kalayo nga nagadabdab, nga makita sang mga tawo sang Israel sa tanan nga tion sang ila pagsaylusaylo halin sa isa ka kampamento pakadto sa isa.
No comments:
Post a Comment