1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Paghimo sang Altar
(Ex. 27:1-8)
1 Naghimo sia sing altar para sunogan sang halad gikan sa kahoy nga akasya. Kwadrado ini, pito kag tunga ka tapak ang kalabaon, pito kag tunga ka tapak ang kasangkaron, kag apat kag tunga ka tapak ang kataason.
2 Naghimo sia sing mga sungaysongay sa apat ka mga pamusod nga unay sa altar. Ginhaklapan niya ini tanan sing saway.
3 Ginhimo niya ang tanan nga mga kasangkapan para sa altar: ang mga bulotangan sang abo, ang mga pala, ang mga labador, ang mga kaw-it kag ang mga bulotangan sang baga. Ginhimo niya ang tanan nga mga gamit sa saway.
4 Naghimo sia sing parilyahan para sa altar, nga nahimo sa saway, kag ginbutang sa idalom sang sanipa sang altar, agod nga makalambot ini sa tungatonga sang altar.
5 Naghimo sia sing apat ka dalagku nga mga sulosingsing kag gintakod ini sa apat ka pamusod sang saway nga parilyahan nga guloan sang mga yayungan.
6 Naghimo sia sing mga yayungan gikan sa kahoy nga akasya, kag ginhaklapan niya ini sing saway.
7 Kag gingulo ini sa dalagku nga mga sulosingsing sa tagsa ka kilid sang altar, sa pagdala sini. Ginhimo niya ang altar nga guab sa sulod kag nahimo ini sa mga tapi.
Ang Paghimo sang Palanghinawan nga Labador
(Ex. 30:18)
8 Naghimo sia sing palanghinawan nga labador nga saway, kag sang iya tulongtongan nga saway gikan sa mga espeho sang mga babayi nga nag-alagad sa puwertahan sang Tolda nga Tilipunan.
Ang Bungbong sa Sulod sang Tolda nga Tilipunan
(Ex. 27:9-19)
9 Naghimo sia sang bungbong. Ang mga kurtina sa nabagatnan nga bahin nahimo sa mapino nga nagakunotkunot nga lino, 50 ka yarda ang kalabaon.
10 Ang 20 ka mga haligi kag 20 ka mga sadsaran saway, nga ang mga kaw-it yara sa haligi, kag ang mga pikit pilak.
11 Sa naaminhan nga bahin ang mga kurtina may 50 ka yarda ang kalabaon, nga natakod sa 20 ka mga haligi, nga may 20 ka mga sadsaran nga saway, nga may mga kaw-it sa haligi kag ang ila mga pikit pilak.
12 Sa nakatundan nga bahin ang mga kurtina 25 ka yarda ang kalabaon, nga natukod sa napulo ka mga haligi nga may napulo ka mga sadsaran, nga may mga kaw-it sa mga haligi kag ang ila mga pikit pilak.
13 Ang nasidlangan nga bahin, 75 ka tapak ang kasangkaron.
14 Sa isa ka bahin sang puwertahan may mga kurtina, pito kag tunga ka yarda ang kasangkaron, nga may tatlo ka mga haligi kag tatlo ka mga sadsaran.
15 Amo man ini sa pihak nga bahin, gani sa duha ka kilid sang puwertahan pasulod sa nabungbongan, may mga kurtina nga pito kag tunga ka yarda ang kasangkaron, nga may tatlo ka mga haligi kag tatlo ka mga sadsaran.
16 Ang tanan nga mga kurtina sa palibot nahimo sa mapino nga nagakunotkunot nga lino.
17 Ang mga sadsaran sang mga haligi nahimo sa saway, kag ang mga kaw-it, kag ang mga pikit, kag ang mga taklap sa uloulo pilak. Ang tanan nga mga haligi sang bungbong may mga pikit nga pilak.
18 Ang kurtina sa puwertahan sang bungbong nabordahan. Nahimo ini sa delana nga asol, granate, kag pula kag mapino nga nagakunotkunot nga lino. Napulo ka yarda ang kalabaon sini, kag duha ka yarda kag tunga ang kataason, subong sang mga kurtina sa palibot.
19 Natakod ini sa apat ka mga haligi nga natungtong sa apat ka sadsaran nga saway. Ang ila mga kaw-it, ang mga taklap sa uloulo kag ang mga pikit pilak.
20 Ang tanan nga mga palpal para sa Tolda nga Tilipunan kag para sa bungbong palibot nahimo sa saway.
Ang Metal sa Santuaryo
21 Amo ini ang kadamuon sang mga metal nga gingamit sa Tolda nga Tilipunan, nga ginsudlan sang malapadlapad nga bato sang kasugtanan. Ginlista ini suno sa sugo ni Moises kag ginhimo sang mga Levita, nga nag-obra sa idalom sang pagdumala ni Itamar, ang anak nga lalaki ni Aaron nga pari.
22 Si Besalel, nga anak nga lalaki ni Uri, nga anak nga lalaki ni Hur sang tribo ni Juda, naghimo sang tanan nga ginsugo sang Ginoo kay Moises.
23 Ang iya kabulig, amo si Oholiab nga anak nga lalaki ni Ahisamak, sang tribo ni Dan, nga isa ka manuggrabar, manugborda, manughabol sang delana nga asol, granate, kag pula, kag sang mapino nga lino.
24 Ang tanan nga bulawan nga gingamit sa pag-obra sang santuaryo (ini nga bulawan ginhalad sa Ginoo) nagabug-at sing 2,930 ka libras suno sa talaksan sang templo.
25 Ang pilak nga naisipan gikan sa katilingban nagabug-at sing 10,070 ka libras, suno sa talaksan sang templo.
26 Ini nga kadamuon suno gid sa ginbayad sang tanan nga mga tawo nga nalista sa sensos, nga ang tagsatagsa nagbayad sang ginkinahanglan sa ila, suno sa talaksan sang templo. Ang kadamuon sang mga tawo nga nalista halin sa 20 ka tuig ang edad pa ibabaw 603,550 tanan.
27 Ang 10,000 ka libras nga pilak gingamit sa paghimo sing mga sadsaran sang santuaryo kag sang kurtina: 10,800 ka libras para sa 100 ka mga sadsaran, kon sayuron 108 ka libras para sa isa ka sadsaran.
28 Ang nabilin nga 70 ka libras nga pilak, ginhimo niya nga mga kaw-it sang mga haligi, nga taklap sa uloulo, kag mga pikit.
29 Ang saway nga ginhalad sa Ginoo nagabug-at sing 8,896 ka libras.
30 Gikan sa sini ginhimo niya ang mga sadsaran para sa puwertahan sang Tolda nga Tilipunan, ang saway nga altar lakip ang iya saway nga parilyahan, kag ang tanan nga mga kasangkapan para sa altar,
31 ang mga sadsaran para sa bungbong palibot, kag para sa puwertahan, kag ang tanan nga mga palpal para sa Tolda nga Tilipunan kag sa bungbong palibot.
No comments:
Post a Comment