1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Mga Halad para sa Santuaryo
(Ex. 35:4-9)
1 Ang Ginoo nagsiling kay Moises,
2 “Singgana ang mga Israelinhon nga maghalad sila sa akon. Batunon mo para sa akon ang dulot nga ginahatag sing kinabubot-on sang tagsa ka tawo.
3 Amo ini ang mga dulot nga imo batunon: bulawan, pilak kag saway,
4 delana nga asol, granate, kag pula, lino nga manipis, panapton nga nahimo sa bulbol sang kanding,
5 panit sang karnero nga lalaki nga nalugom sa pula, mapino nga panit, kahoy nga akasya,
6 lana para sa mga suga, mga pahumot para sa lana nga inughaplas, kag para sa mahumot nga insyenso,
7 kornalina nga malahalon nga mga bato, kag malahalon nga mga bato nga inugtampok sa bestidora,s kag sa pictoral sang pinakamataas nga pari.
8 Himuan nila ako sing santuaryo, agod ako magpuyo upod sa ila.
9 Himuon mo ang santuaryo kag ang tanan niya nga mga kasangkapan suno sa plano nga ipakita ko sa imo.
Ang Kaban sang Kasugtanan
(Ex. 37:1-9)
10 “Maghimo sila sing kaban nga akasya, 45 ka pulgada ang kalabaon, 27 ka pulgada ang kasangkaron, kag 27 ka pulgada ang kataason.
11 Haklapan mo ini sing puraw nga bulawan sa sulod kag sa gwa. Himuan mo ini sing molde nga bulawan sa palibot.
12 Himuan mo sing apat ka dalagku nga mga singsing nga bulawan, kag itakod mo ini sa iya apat ka tiil, duha ka bilog sa tagsa ka kilid.
13 Maghimo ka sing yayungan nga akasya kag haklapan mo ini sing bulawan.
14 Igulo mo ang yayungan sa mga singsing sa tagsa ka kilid sang kaban, sa pagdala sini.
15 Ibilin ang mga yayungan sa mga singsing, kag indi paghusloon.
16 Isulod mo sa kaban ang duha ka malapadlapad nga bato sang kasugtanan nga ihatag ko sa imo.
17 "Magahimo ka sing takop nga puraw nga bulawan, 45 ka pulgada ang kalabaon kag 27 ka pulgada ang kasangkaron.
18 Sa duha ka punta sining takop maghimo ka sing duha ka kerubin nga sinalsal nga bulawan,
19 isa sa tagsa ka punta. Himoa ninyo sila nga unay sa takop.
20 Himuon ninyo nga ang mga pakpak sang kerubin magahumlad sa ibabaw sang takop, agod nga malandungan nila ini. Nagaatubangay sila nga ang tagsatagsa nagatamod sa takop.
21 Itungtong mo ang takop sa ibabaw sang kaban, kag sa sulod sang kaban ibutang mo ang duha ka malapadlapad nga bato sang kasugtanan nga ihatag ko sa imo.
22 Magapakigkita ako sa imo didto. Gikan sa ibabaw sang takop kag sa tunga sang duha ka kerubin nga yara sa ibabaw sang kaban, ihatag ko sa imo ang tanan nga mga sugo para sa mga tawo sang Israel.
Ang Lamisa para sa Tinapay nga Nahalad sa Dios
(Ex. 37:10-16)
23 “Maghimo ka sing lamisa nga akasya, 36 ka pulgada ang kalabaon, 18 ka pulgada ang kalaparon, kag 27 ka pulgada ang kataason.
24 Haklapan mo ini sang puraw nga bulawan kag himuan mo sing molde nga bulawan sa palibot.
25 Himuan mo sing sanipa nga apat ka pulgada ang kalaparon sa palibot kag himuan mo sing molde nga bulawan ang palibot sang sanipa.
26 Himuan mo sing apat ka dalagku nga mga singsing nga bulawan kag itakod mo ini sa apat ka pamusod sa diin yara ang mga tiil.
27 Itakod mo ang mga singsing nga guloan sang mga yayungan malapit sa sanipa.
28 Himuon mo ining mga yayungan sa kahoy nga akasya, kag haklapan mo ini sing bulawan.
29 Maghimo ka sing mga pinggan, mga tasa, mga tibod, kag mga yahong nga gamiton para sa mga halad nga ilimnon. Ini tanan himuon mo sa puraw nga bulawan.
30 Kag sa ibabaw sang lamisa sa atubangan ko ibutang mo pirme ang tinapay nga nahalad sa akon.
Ang Kandilerohan
(Ex. 37:17-24)
31 "Maghimo ka sing kandilerohan nga puraw nga bulawan. Himuon mo ang iya tiil kag ang iya lawas sa pinapa nga bulawan. Magaunay ang iya adorno nga mga bulak lakip ang mga bukol kag ang mga nagabuskad na.
32 Anom ka mga sanga ang magagaway sa magtimbang nga kilid, tag-tatlo kada kilid.
33 Ang tagsa ka anom ka mga sanga may tatlo ka adorno nga mga bulak nga ang iya korte kaangay sang mga bulak sang almendro, ang iban bukol pa kag ang iban buskad na.
34 Ang lawas sang kandilerohan may apat ka adorno nga mga bulak nga ang iya korte kaangay sang mga bulak sang almendro, ang iban bukol pa, kag ang iban buskad na.
35 May isa ka bukol sa idalom sang tagsa ka paris sang tatlo ka paris nga mga sanga.
36 Ang mga bukol kag ang mga sanga unay sa kandilerohan, kag nahimo ini sa puraw kag pinapa nga bulawan.
37 Maghimo ka sing pito ka mga suga para sa kandilerohan kag ibutang mo ini sa mataas nga makasilak sa atubangan.
38 Himoa ang iya inugpalong kag inugsalod nga puraw nga bulawan.
39 Gamiton mo ang 100 ka libra nga puraw nga bulawan sa paghimo sang kandilerohan kag sang tanan nga mga gamit sini.
40 Himoa ini suno gid sa plano nga ginpakita sa imo sa bukid.
sBESTIDORA: Tan-awa ang Lista sang mga Pulong.
No comments:
Post a Comment