EXODO - Kapitulo 6

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

○○○○○

1 Dayon ang Ginoo nagsiling kay Moises, "Karon makita mo ang akon himuon kay Paraon. Piliton ko sia sa pagpalakat sa ila. Matuod gid nga mapilitan sia sa pagpagwa sa ila sa iya duta.”

Gintawag liwat si Moises

2 Ang Dios nagsiling kay Moises, “Ako amo ang Ginoo.

3 Nagpakita ako kay Abraham, kay Isaac, kag kay Jacob, subong Makagagahom nga Dios. Wala ako magpakilala sa ila paagi sa akon ngalan, ang Ginoo.^g

4 Naghimo man ako sang akon kasugtanan sa ila, nga nagasaad sa paghatag sa ila sang duta sang Canaan, ang duta nga ila ginpuy-an subong mga dumoluong.

5 Karon nabatian ko ang mga panghakroy sang mga Israelinhon nga gin-ulipon sang mga Egiptohanon, kag nadumdoman ko ang akon kasugtanan.

6 Gani, dapat mo isiling sa mga Israelinhon, 'Ako amo ang Ginoo: hilwayon ko kamo sa mabudlay nga mga trabaho nga ginapaobra sa inyo sang mga Egiptohanon. Luwason ko kamo sa ila pag-ulipon sa inyo. Luwason ko kamo sa akon nauntay nga butkon nga nagadala sang makakulogmat nga silot.

7 Mangin-akon kamo kaugalingon nga mga tawo, kag ako mangin-inyo Dios. Mahibaluan ninyo nga ako amo ang Ginoo nga inyo Dios, nga nagahilway sa inyo sa mabudlay nga mga trabaho nga ginapaobra sa inyo sang mga Egiptohanon.

8 Dal-on ko kamo sa duta nga akon ginsumpa nga ihatag kay Abraham, kay Isaac kag kay Jacob. lhatag ko ini sa inyo subong inyo kaugalingon nga panublion. Ako amo ang Ginoo.' "

9 Ginsugid ini ni Moises sa mga Israelinhon, pero indi sila magpamati sa iya, kay nadulaan na sila sing paglaom tungod sang mapintas nga pag-ulipon sa ila.

10 Dayon ang Ginoo nagsiling kay Moises,

11 "Lakat kag isiling kay Paraon nga hari sang Egipto, nga dapat niya pagwaon ang mga Israelinhon sa iya duta.”

12 Pero si Moises nagsiling sa Ginoo. "Kon ang mga Israelinhon indi gani magpamati sa akon, ano ang pagpamati ni Paraon sa akon? Indi ako maayo nga manughambal.”

13 Ang Ginoo nagmando kay Moises kag kay Aaron sa pagsiling sa mga Israelinhon kag kay Paraon nga hari sang Egipto, nga ginsugo sila sa pagpagwa sang mga Israelinhon gikan sa duta sang Egipto.

Ang Lista sang Katigulangan ni Moises kag ni Aaron

14 Amo ini ang mga pangulo sang ila mga panimalay: ang mga anak nga lalaki ni Ruben, nga panganay ni Israel amo sanday Hanoc, Palu, Hezron, kag Carmi; ini sila amo ang mga kabaranggayan ni Ruben.

15 Ang mga anak nga lalaki ni Simeon amo sanday Hemuel, Jamin, Ohad, Hakin, Sobar, kag Saul nga anak sang Canaanhon nga babayi; ini sila amo ang mga kabaranggayan ni Simeon.

16 Amo ini ang mga ngalan sang mga anak nga lalaki ni Levi, kag ang ila kaliwatan: si Gerson, si Coat, kag si Merari. Si Levi nagkabuhi sing 137 ka tuig.

17 Ang mga anak nga lalaki ni Gerson amo si Libni, si Simi, kag ang ila mga kabaranggayan.

18 Ang mga anak nga lalaki ni Coat, amo sanday Amram, Izar, Hebron, kag Uziel. Si Coat nagkabuhi sing 133 ka tuig.

19 Ang mga anak nga lalaki ni Merari amo si Mali kag si Musi. Amo ini ang mga kabaranggayan ni Levi, kag ang ila mga kaliwatan.

20 Si Amram nagpangasawa kay Hocabed nga utod sang iya amay, kag sia nagbata kay Aaron kag kay Moises. Si Amram nagkabuhi sing 137 ka tuig.

21 Ang mga anak nga lalaki ni Izar amo sanday Core, Nepeg kag Zikri.

22 Ang mga anak nga lalaki ni Uziel amo sanday Misael, Elsapan, kag Sitri.

23 Si Aaron nagpangasawa kay Eliseba, ang anak nga babayi ni Aminadab kag utod ni Nason. Ang anak nanday Aaron kag Eliseba amo sanday Nadab, Abiu, Eleazar, kag Itamar.

24 Ang mga anak nga lalaki ni Core amo sanday Asir, Elcana, kag Abiasap; ini sila amo ang kabaranggayan sang mga Corinhon.

25 Si Eleazar nga anak nga lalaki ni Aaron, nagpangasawa sang isa sang mga anak nga babayi ni Putiel, nga nag-anak kay Pines. Amo ini ang mga pangulo sang panimalay ni Levi suno sa iya mga kabaranggayan.

26 Si Aaron kag si Moises amo ang ginsingganan sang GINOO, "Pagwaa ang mga Israelinhon gikan sa duta sang Egipto nga nagrupogrupo."

27 Ini nga Moises kag Aaron amo ang nagsiling kay Paraon, nga hari sang Egipto, sa paghilway sang mga Israelinhon.

Ang Mando sang GINOO kay Moises kag kay Aaron

28 Sang paghambal sang Ginoo kay Moises didto sa Egipto

29 nagsiling sia, "Ako amo ang Ginoo. Singgana si Paraon nga hari sang Egipto, sang tanan nga ginsiling ko sa imo."

30 Pero nagsabat si Moises sa Ginoo, “Nakahibalo ka nga indi ako maayo nga manughambal. Indi gid sia magpamati sa akon!"

^gANG GINOO: Tan-awa ang 3:14. Ang Ginoo sa Hebreo nga teksto Yahweh. Sa iban nga pagbadbad ginagamit ang Jehova. Sa sini nga pagbadbad ang GINOO amo ang ginagmit sa pagsunod sang kalabanan nga paggamit sa Eninglis nga amo ang LORD.

EXODO - Kapitulo 5 <<<   >>> EXODO - Kapitulo 7