1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang mga Panday para sa Tolda nga Puloy-an sang Dios
(Ex. 25:30-36)
1 Ang Ginoo nagsiling kay Moises,
2 “Ginpili ko si Besalel, nga anak nga lalaki ni Uri, nga anak ni Hur, sang tribo ni Juda.
3 Ginpuno ko sia sang akon gahom,x agod nga manginsampaton sia, may abilidad, kag makahibalo sang tanan nga sari sang bulohaton:
4 sa pagplano sing matahom nga desinyo nga himo sa bulawan, pilak kag saway,
5 sa paglagari sang malahalon nga mga bato nga inugtampok, sa paggutib sang kahoy, kag sang tanan nga sari sang matahom nga bulohaton.
6 Ginpili ko si Oholiab ang anak ni Ahisamac, sang tribo ni Dan sa pag-obra upod sa iya. Ginhatagan ko sing abilidad ang tanan nga sampaton nga mga panday, agod nga ila mahimo ang tanan nga ginsugo ko sa imo nga himuon:
7 ang Tolda nga Tilipunan, ang kaban nga nasudlan sang malapadlapad nga mga bato sang kasugtanan, ang tabon nga yara sa ibabaw sini, ang tanan nga mga gamit sang tolda,
8 ang lamisa kag ang tanan nga kasangkapan sini, ang kandilerohan nga puraw nga bulawan kag ang tanan nga kasangkapan sini, ang altar nga ginasunogan sang insyenso,
9 ang altar nga ginahalaran sang mga halad nga sinunog kag ang tanan nga mga kasangkapan sini, ang labador kag ang iya tulongtongan,
10 ang malahalon kag balaan nga mga bayu ni Aaron nga pari kag sang iya mga anak nga lalaki nga pagagamiton sa ila pag-alagad,
11 ang lana nga inughaplas, kag ang insyenso nga mahamot para sa balaan nga duog. Sa paghimo sini tanan, pagahimuon nila ini suno sa akon ginsugo sa imo."
Ang Adlaw nga Inugpahuway
12 Ang Ginoo nagsiling kay Moises,
13 “Singgana ang mga tawo sang Israel, ‘Magpahuway kamo sa akon adlaw nga inugpahuway, kay ini tanda sa tunga ko kag sa inyo, kag sa inyo mga kaliwat, sa pagpakita nga ako, ang Ginoo, naghimo sa inyo nga akon kaugalingon nga mga tawo.
14 Gani magpahuway kamo sa adlaw nga inugpahuway, kay ini ginpakabalaan para sa inyo. Ang bisan sin-o nga wala nagapakabalaan sini nga adlaw, pagapatyon. Ang bisan sin-o nga nagaobra sa adlaw nga inugpahuway pagaseparahon sa iya mga himata.
15 Mag-obra ka sa sulod sang anom ka adlaw, pero sa ikapito amo ang adlaw nga ang tanan nga mga tawo dapat gid magpahuway, balaan para sa Ginoo. Ang bisan sin-o nga mag-obra sa sina nga adlaw pagapatyon.
16 Ang mga tawo sang Israel dapat magpahuway sa adlaw nga inugpahuway. Ang tanan nga mga kaliwatan sa ulihi, dapat magtuman sini, subong isa ka dayon nga kasugtanan.
17 Mangintanda ini nga wala sing katapusan sa tunga nakon kag sang mga tawo sang Israel, kay ako, ang Ginoo nagtuga sang langit kag duta sa sulod sang anom ka adlaw, kag sa ikapito nga adlaw nag-untat ako sa pag-obra kag nagpahuway.’”
18 Sa tapos makahambal ang Dios sa kay Moises sa Bukid sang Sinai, ginhatag niya ang duha ka malapadlapad nga bato sang kasugtanan, nga ginsulatan sang tudlo sang Dios.
xgahom; ukon espiritu.
No comments:
Post a Comment