1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Mga Kasugoan nahanungod sa Balayran
1 “Kon ang tawo magkawat sang baka ukon karnero, kag iya ini ihawon ukon ibaligya, dapat sia magbayad sing lima ka bilog nga baka para sa isa ka baka, kag apat ka bilog nga karnero para sa isa ka karnero.
2-4 Dapat niya bayaran ini. Kon wala sia sing pagkabutang, ibaligya sia kag ibayad sa iya ginkawat. Kon ang kinawat nga hayop, baka, asno, ukon karnero, makita sa iya nga buhi, magabayad sia sing duha ka pilo. "Kon ang tawo madakpan nga nagapangawat sa balay kag ginpatay sia, ang nagpatay sa iya wala sing salabton sa pagpatay. Pero kon matabo ini sa tapos makabutlak ang adlaw, nakasala sia sa pagpatay.
5 "Kon ang tawo magpahalab sang iya mga hayop sa uma ukon sa talamnan sang ubas, kag kon makabuhi ang iya hayop kag maghalab sa uma sang iban, dapat niya bayaran sang pinakamaayo niya nga patubas sang iya uma ukon talamnan sang ubas.
6 "Kon may tawo nga magtutod, kag ang kalayo maglapta sa mga hilamon, kag makasunog sang tinumpi, ukon sang alanyon, ukon sang uma nga may tanom, ang nagsugod sang kalayo magabayad sang kapiyerdihan.
7 "Kon ang tawo maghatag sing kuwarta ukon malahalon nga pagkabutang sa isa ka tawo agod ipatago, kag kon kawaton ini sa balay sang nagtago, magbayad sing duha ka pilo ang makawat kon madakpan sia.
8 Kon ang makawat indi madakpan, ti ang tag-iya sang balay pagadalhon sa atubangan sang Dios agod mahibal-an kon bala ginkuha niya ang pagkabutang sang isa ka tawo ukon wala.
9 “Nahanungod sa mga pagkabutang nga ginaagawan, subong sang baka, asno, karnero, mga bayu, ukon bisan ano nga pagkabutang nga nadula, kon may duha ka tawo nga nagaangkon sini, sila nga duha pagadalhon sa Dios. Ang pagahukman sang Dios nga nakasala magabayad sing duha ka pilo sa isa ka tawo.
10 “Kon may tawo nga magpasagod sa isa ka tawo sing asno, baka, karnero ukon bisan ano nga hayop, kag mapatay ini, ukon masamad, ukon pagakawaton, kag wala sing saksi,
11 ang pagsumpa sa atubangan sang Ginoo amo ang magapat-od kon bala ginkuha niya ang pagkabutang sang isa ka tawo ukon wala. Kon ang hayop wala ginkawat, ang tag-iya magabaton sang kapiyerdihan kag ang nagsagod indi magbayad,
12 pero kon ang hayop ginkawat, magbayad sia sa tag-iya.
13 Kon ini ginpatay sang talunon nga mga hayop, dalhon niya ang lawas nga patay subong pamatuod, kag indi sia kinahanglan magbayad sing ginpatay sang talunon nga mga hayop.
14 "Kon may tawo nga maghulam sang isa ka hayop sa isa ka tawo, kag masamad ini ukon mapatay kag wala dira ang tag-iya, ang naghulam dapat magbayad para sa hayop.
15 Pero kon yara ang tag-iya, ang naghulam indi na kinahanglan magbayad. Kon ginaalkilahan ang hayop, ang kapiyerdihan nabayaran na sa alkila.
Mga Kasugoan nahanungod sa Moralidad kag Pagtuloohan
16 "Kon may tawo nga maghaylo sa isa ka ulay nga indi pa kalaslon, kag magpakighilawas sa iya, dapat sia magbayad sang ginapangayo para sa kasal kag pangasaw-on niya sia.
17 Pero kon ang iya amay indi gusto nga pangasaw-on sia, dapat sia magbayad sang kantidad suno sa nagakabagay para sa kalaslon nga ulay.
18 "Indi mo pagtugotan ang isa ka babayi nga manugbabaylan nga magkabuhi.
19 "Ang bisan sin-o nga magpakighilawas sa hayop pagapatyon sia.
20 "Ang bisan sin-o nga magdulot sing mga halad sa iban nga dios, luas sa Ginoo, pagapatyon.
21"Indi mo paghimuan sing malain ukon pagpiguson ang dumoluong, kay kamo nangindumoluong man sa duta sang Egipto.
22 Indi ninyo paghimuan sing malain ang bisan sin-o nga balo nga babayi ukon ang ilo.
23 Kon inyo sila himuan sing malain, kag magpangayo sing bulig sa akon, ako magasabat sa ila,
24 kag ako magakaakig gid sa inyo kag magapatay sa inyo sa inaway. Ang inyo mga asawa manginbalo, kag ang inyo mga kabataan mangin-ilo.
25 "Kon magpahulam ka sing kuwarta sa bisan kay sin-o sang akon mga tawo, ukon sa bisan kay sin-o nga imol kaupod ninyo, indi ka manginsubong sang manugpautang nga nagapasaka.
26 Kon kuhaon mo ang kunop sang isa ka tawo subong nga kalig-unan nga sia magabayad sa imo, iuli mo ini sa iya sa wala pa magtunod ang adlaw,
27 kay amo lamang ini ang iya kunop agod indi sia matugnawan. Ano bala ang iya gamiton sa pagtulog? Kon magpangayo sia sa akon sing bulig, ako magasabat sa iya kay ako maluloy-on.
28 "Indi mo pagpasipalahan ang Dios, kag indi mo pagpakamalauton ang pangulo sang imo mga tawo.
29 "Indi ka magdumili sa paghatag sa akon sing mga dulot gikan sa imo mga patubas, sang imo bino, kag sang imo lana. "Ihatag mo sa akon ang panganay sang imo mga anak nga lalaki.
30 Ihatag mo man ang panganay sang imo kabakahan kag sang imo mga karnero. Ang panganay nga lalaki magaupod sa iya iloy sing pito ka adlaw, kag sa ikawalo ka adlaw idulot mo ini sa akon.
31 "Manginbalaan kamo nga mga tawo sa akon, gani indi kamo magkaon sing karne sang bisan ano nga hayop nga ginpatay sa latagon sang mga hayop nga talunon. Ihatag mo ini sa mga ido.
No comments:
Post a Comment