EXODO - Kapitulo 27

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

○○○○○

Ang Altar

(Ex. 38:1-7)

1 “Maghimo ka sing altar nga kahoy nga akasya. Kinahanglan kwadrado ini, pito kag tunga ka tapak ang kalabaon, pito kag tunga ka tapak ang kalaparon, kag apat kag tunga ka tapak 

ang kataason.

2 Himuan mo sing sungaysungay sa iya apat ka pamusod. Kinahanglan iunay ini sa altar kag haklapan sing saway.

3 Himuan mo man ang altar sing bulotangan sang abo nga nabulit sang tambok. Himuan mo man sing mga pala, mga labador, mga kaw-it, kag mga bulotangan sang baga. Himuon mo sa saway ang tanan nga mga gamit para sa altar.

4 Himuan mo man sing parilya nga saway ang altar. Butangan mo sang singsing ang apat ka pamusod sang parilya,

5 kag ibutang mo ini sa idalom sang sanipa sang altar, agod makalambot ini tubtob sa tungatonga sang altar.

6 Himuan mo ang altar sing yayungan nga akasya, kag haklapan mo ini sing saway.

7 Igulo mo ini sa singsing sa kada kilid sang altar kon ginadala ini.

8 Himuon mo ang altar nga guab sa sulod nga nahimo sa tapi. Himuon mo ini suno sa plano nga ginpakita sa imo sa bukid.

Ang Bungbong sa Sulod sang Tolda

(Ex. 38:9-20)

9 "Maghimo ka sing bungbong sa sulod sang Tolda. Sa nabagatnan nga bahin ang ibungbong mga kurtina nga mapino nga nagakunot-kunot nga lino, 50 ka yarda ang kalabaon sa isa ka kilid,

10 nga ginatukod sang 20 ka mga haligi nga saway, kag ini may 20 man nga sadsaran nga saway, kag ang mga haligi may mga kaw-it kag pikit nga pilak.

11 Subong man, sa naaminhan nga bahin, ang kurtina may 50 ya yarda ang kalabaon, nga ginatukoran sang 20 ka mga haligi nga saway, kag ini may 20 man nga sadsaran nga saway.

Ang mga haligi may mga kaw-it kag pikit nga pilak.

12 Ang kasangkaron sang kurtina nga bungbong sa nakatundan nga bahin mangin 25 ka yarda nga may 10 ka mga haligi kag 10 ka mga sadsaran.

13 Sa nasidlangan nga bahin, ang kasangkaron sang kurtirna nga bungbong mangin 75 ka tapak.

14 Ang kurtina sang isa ka kilid sang puwertahan manginpito kag tunga ka yarda, nga may tatlo ka mga haligi kag tatlo ka mga sadsaran,

15 kag sa pihak man nga kilid sang puwertahan ang kurtina manginpito kag tunga sa yarda, nga may tatlo ka mga haligi kag tatlo ka mga sadsaran.

16 Sa may puwertahan ang kurtina 10 ka yarda ang kalabaon nga nahimo sa delana nga asol, granate, pula, kag mapino nga nagakunotkunot nga lino nga nabordahan. Ginatukod ini sang apat ka mga haligi nga may apat ka mga sadsaran.

17 Ang tanan nga mga haligi sa palibot sang mga bungbong may mga pikit nga pilak, kag ang ila mga kaw-it pilak, kag ang ila nga sadsaran saway.

18 Ang nabungbongan nga duog 150 ka tapak ang kalabaon, 75 ka tapak ang kasangkaron, kag pito kag tunga ka tapak ang kataason. Ang mga kurtina pagahimuon sa mapino kag nagakunotkunot nga lino, kag ang mga sadsaran saway.

19 Ang tanan nga galamiton sa Tolda bisan ano ang ginagamitan, kag ang tanan nga mga palpal sang tolda sa duog nga nabung bongan, pagahimuon sa saway.

Ang Pagtatap sang Suga

(Lev. 24:1-4)

20 “Sugoon mo ang mga Israelinhon nga dalhan nila ikaw sang pinakapuraw nga lana nga olibo para sa suga, agod nga ang suga magasiga sing dayon.

21 Si Aaron kag ang iya mga kaanakan nga lalaki amo ang magabutang sini nga suga sa Tolda diin ang Ginoo magapakigkita sa iya mga tawo, sa gwa sang kurtina sa atubangan sang malapadlapad nga bato sang kasugtanan. Magapadayon ini sa pagsiga halin sa kasisidmon tubtob sa aga didto sa presensya sang Ginoo. Ini nga sugo pagatumanon sing dayon sang mga Israelinhon kag sang ila mga kaliwat. 

EXODO - Kapitulo 26 <<<   >>> EXODO - Kapitulo 28