1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Paghalad sang Panganay
1 Ang Ginoo nagsiling kay Moises,
2 "Ihalad sa akon ang tanan nga mga panganay nga lalaki. Ang tagsa ka panganay sa Israel, tawo ukon hayop mangin-akon.”
Ang Piesta sang Tinapay nga wala sing Lebadora
3 Si Moises nagsiling sa mga tawo, “Dumdoma ninyo ini nga adlaw nga amo ang adlaw sang inyo paghalin sa Egipto, sa diin gin-ulipon kamo, kay ang Ginoo nagpagwa sa inyo paagi sa iya daku nga gahom. Wala sing tinapay nga may lebadora nga pagakaunon.
4 Sa sini nga adlaw sa bulan sang Abib amo ang paggwa ninyo sa Egipto.
5 Ang Ginoo nagsumpa sa inyo mga katigulangan sa paghatag sa inyo sang duta sang mga Canaanhon, mga Hethanon, mga Amornon, nga Hebhanon, kag mga Jebusnon. Ini nga duta maayo kag mapatubason. Kon madala na kamo sang Ginoo sa sadto nga duta, himoa ninyo ini nga seremoniya sa amo nga bulan.
6 Sa sulod sang pito ka adlaw magkaon kamo sang tinapay nga wala sing lebadora, kag sa ikapito ka adlaw maghiwat kamo sing piesta para sa Ginoo.
7 Ang tinapay nga wala sing lebadora pagakaunon sa sulod sang pito ka adlaw, kag wala sing tinapay nga may lebadora ukon lebadora nga makita sa inyo bug-os nga duta.
8 Sa amo nga adlaw amo ini ang isugid ninyo sa inyo mga anak nga lalaki, 'Ini tanan ginahimo sa pagsaulog sang ginhimo sang Ginoo sa akon sang paghalin ko sa Egipto.'
9 Ini nga seremoniya manginkaangay sang marka sa inyo mga kamot ukon handumanan sa inyo nga mga agtang sa pagpahanumdom sa inyo, agod magpadayon kamo sa pagsugid sang kasugoan sang GINOO, kay ang Ginoo nagpagwa sa inyo halin sa Egipto paagi sa iya daku nga gahom.
10 Himoa ninyo ini nga seremoniya sa tagsa ka tuig sa natalana nga tion.”
Ang Panganay
11 "Ang Ginoo magadala sa inyo sa duta sang mga Canaanhon, nga ginsumpa niya nga ihatag sa inyo kag sa inyo mga katigulangan. Kon mahatag na niya ini sa inyo,
12 dapat ninyo ihalad ang tagsa ka panganay nga lalaki sa Ginoo, kag ang tagsa ka panganay nga lalaki sang inyo mga hayop iya sang GINOO.
13 Pero bayluhan ninyo ang tagsa ka panganay nga lalaki sang asno paagi sa paghalad sang kordero agod mangin-inyo ini liwat. Kon indi ninyo ini pagbayluhan, dapat ninyo balion ang iya liog. Ang tagsa ka panganay ninyo nga lalaki dapat ninyo bayluhan agod mangin-inyo liwat.
14 Kon sa ulihi ang inyo mga kabataan magpamangkot kon ano ang kahulogan sini, magsabat kamo, ‘Ang Ginoo nagpagwa sa amon sa Egipto, sa diin gin-ulipon kami, paagi sa iya daku nga gahom.
15 Sang ginpatig-a ni Paraon ang iya tagipusoon kag indi magpalakat sa amon, ang GINOO nagpamatay sang tagsa ka panganay nga lalaki sa mga tawo kag sa mga kahayupan sa duta sang Egipto. Amo ini ang kabangdanan nga ginahalad ko ang tagsa ka panganay nga lalaki sa Ginoo, pero ginabayluhan ko ang panganay ko nga anak nga lalaki agod mangin-akon liwat.'
16 Ini nga seremoniya nagapahanumdom sa inyo, kaangay sang isa ka marka sa inyo kamot, ukon sang isa ka tanda sa inyo agtang, kay ang Ginoo nagpagwa sa aton sa Egipto paagi sa iya daku nga gahom.”
Ang Haligi nga Panganod kag Haligi nga Kalayo
17 Sang ginpalakat ni Paraon ang mga tawo, ang Dios wala magpaagi sa ila sa dalan pakadto sa baybayon sang Filistia, bisan ini amo ang laktod nga dalan. Ang Dios nagsiling, “Indi ako luyag nga ang mga tawo magbaylo sang ila hunahona, kag magbalik sa Egipto kon makita nila ang inaway nga ila atubangon."
18 Sa baylo, ang Ginoo nagpalibutlibot sa ila sa desierto pakadto sa Mapula nga Dagat.j Ang mga Israelinhon lupit sa hinganiban.
19 Gindala ni Moises ang mga tul-an ni Jose, suno sa ginpasumpa anay ni Jose nga himuon sang mga Israelinhon. Si Jose sadto anay nagsiling, "Ang Dios gid magabulig sa inyo! Dapat ninyo dal-on ang akon mga tul-an gikan sa sini nga duog."
20 Naghalin sila sa Sucot, nagdulog kag nagpatindog sang ila mga tolda sa Etam, sa higad sang desierto.
21 Kon adlaw, ang Ginoo nagauna sa ila sa dagway sang haligi nga panganod nga nagatuytoy sa ila dalan, kag kon gab-i ang Ginoo nagauna sa ila sa dagway sang haligi nga kalayo sa pag-iwag sa ila, agod makalakat sila sa adlaw kag sa gab-i.
22 Ang haligi nga panganod kag ang haligi nga kalayo nagauna sa ila pirme sa adlaw kag sa gab-i.
jMAPULA NGA DAGAT: Tan-awa ang 10:19.
No comments:
Post a Comment