1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Mana kag ang mga Pitaw
1 Ang tanan nga mga pumoluyo sang Israel naghalin sa Elim, kag sa ika-15 nga adlaw sang ikaduha nga bulan sa tapos makagwa sila sa duta sang Egipto nag-abot sila sa desierto sang Sin nga yara sa gin-utlan sang Elim kag sang Sinai.
2 Nagreklamo sila tanan kay Moises kag kay Aaron didto sa desierto
3 kag nagsiling sa ila, "Maayo pa kuntani nga ginpamatay kami sang Ginoo didto sa Egipto. Didto makapungko kami sa luyo sang mga kaldero nga puno sang linuto nga mga karne kag makapagusto kami sing kaon. Pero inyo kami gindala sa sini nga desierto agod pagutoman tubtob magkalamatay kami.”
4 Ang Ginoo nagsiling kay Moises, "Karon paulanon ko sa inyo ang tinapay halin sa langit. Ang mga tawo magagwa kag magapanguha kada adlaw sing tinapay nga ila kinahanglanon sa sina nga adlaw. Sa sini nga paagi akon sila nga tilawan kon ila tumanon ang akon mga sugo.
5 Sa ikaanom ka adlaw, magpanguha sila sing tinapay para sa duha ka adlaw, kag amanon nila ini."
6 Gani si Moises kag si Aaron nagsiling sa tanan nga mga Israelinhon, "Sa sini nga kahapunanon makilala ninyo nga ang Ginoo amo ang nagpagwa sa inyo gikan sa Egipto,
7 kag pagkaaga makita ninyo ang himaya sang Ginoo. Nabatian niya ang tanan ninyo nga mga reklamo batok sa iya, kay sin-o bala kami nga magreklamo kamo sa amon?"
8 Dayon si Moises nagsiling, "Ang Ginoo amo ang magahatag sa inyo sing sud-an nga inyo kaunon sa kahapunanon, kag tinapay pagkaaga nga makapagusto kamo sing kaon, kay nabatian niya ang inyo madamo nga mga reklamo batok sa iya. Sin-o gid man kami? Ang inyo mga reklamo indi batok sa amon, kundi batok sa Ginoo.”
9 Si Moises nagsiling kay Aaron, "Singgana ang tanan nga mga pumoluyo nga magkari sila kag magtindog sa atubangan sang Ginoo, kay nabatian niya ang ila mga reklamo.”
10 Sang paghambal ni Aaron sa tanan nga mga pumoluyo, nagliso sila kag naglantaw sa desierto kag sa gilayon nagpakita ang himaya sang Ginoo sa isa ka panganod.
11 Ang GINOO nagsiling kay Moises,
12 “Nabatian ko ang mga reklamo sang mga Israelinhon. Amo ini ang isiling mo sa ila, 'Sa kahapunanon may sud-an kamo nga kaunon, kag pagkaaga makapagusto kamo sing pagkaon sang tinapay. Dayon makilal-an ninyo nga Ako, ang Ginoo, amo ang inyo Dios.' "
13 Sa kahapunanon nag-abot ang mga pitaw kag nagpuno sang kampamento kag sang pagkaaga may madamol nga tun-og sa palibot sang ila kampamento.
14 Sang magmala na ang tun-og, may nakita sa desierto nga manipis kag malapadlapad nga butang, nga pareho ka pino sang ginaling nga yelo.
15 Sang makita ini sang mga Israelinhon wala sila makakilala kon ano yadto kag nagpinamangkutay sila, "Ano bala ini? " Nagsabat si Moises sa ila, “Ini amo ang tinapay nga ginhatag sang Ginoo nga manginkalan-on ninyo.
16 Ang GINOO nagsugo nga ang tagsatagsa sa inyo magkuha suno sa iya kinahanglanon, duha ka salmon sa tagsa ka tawo. Ang tagsa sa inyo magkuha suno sa kinahanglanon sang tanan nga yara sa iya tolda."
17 Gintuman ini sang mga Israelinhon—ang iban nagkuha sing madamo, ang iban diutay.
18 Sang ginsukob nila ini, ang nagkuha sing madamo wala man sing sobra, kag ang nagkuha sing diutay wala man sing kulang. Ang tagsatagsa nagkuha suno sa iya kinahanglanon.
19 Si Moises nagsiling sa ila, "Wala sing isa nga magtigana sini tubtob sa aga."
20 Pero ang iban sa ila wala magpati kay Moises, kag nagtigana sang iban sini para sa masunod nga adlaw. Sang pagkaaga napuno ini sing ulod kag nagpan-os gani naakig si Moises sa ila.
21 Nagapanguha sila sini agaaga, ang tagsatagsa sa ila suno sa ila kinahanglanon, pero kon mag-init na ang adlaw nagakatunaw ini.
22 Sa ikan-om nga adlaw nagpanguha sila sing tinapay para sa duha ka adlaw, apat ka salmon para sa isa ka tawo. Ang tanan nga mga pangulo sang pumoluyo nagkadto kag nagsugid kay Moises nahanungod sini,
23 kag nagsiling si Moises sa ila, "Amo ini ang ginsugo sang Ginoo, ‘Buas amo ang adlaw nga inugpahuway, isa ka balaan nga adlaw nga nahalad sa Ginoo. Lutoa ninyo ang tinapay nga inyo lulotuon, kag lagaa ninyo ang karne nga inyo Ialagaon. Ang nabilin inyo itigana para sa masunod nga adlaw.'"
24 Suno sa ginsugo ni Moises, gintigana nila ang nabilin sa masunod nga adlaw kag wala ini magpan-os ukon maulori.
25 Nagsiling si Moises, "Kauna ninyo ini karon nga adlaw, kay karon ngaadlaw amo ang adlaw nga inugpahuway nga nahalad sa Ginoo, kag indi kamo makakita sing pagkaon sa latagon.
26 Magpanguha kamo sini sa sulod sang anom ka adlaw, pero sa ikapito nga adlaw, nga amo ang adlaw nga inugpahuway, wala kamo sing makuha.”
27 Sa ikapito nga adlaw, ang iban nga mga tawo naggwa kag nagpanguha sang pagkaon, pero wala sila sing may nakita.
28 Dayon ang Ginoo nagsiling kay Moises, "Tubtob pa bala san-o ang inyo di-pagtuman sang akon mga sugo kag mga kasugoan?
29 Dumdoma ninyo nga Ako, ang Ginoo, naghatag sa inyo sang adlaw nga inugpahuway. Gani, sa ikan-om nga adlaw ginhatagan ko kamo sang pagkaon para sa duha ka adlaw. Sa ikapito nga adlaw, ang tagsatagsa magpabilin sa duog sa diin sia. Wala sing isa nga maghalin sa iya balay."
30 Gani ang mga tawo wala mag-obra sa ikapito nga adlaw.
31 Ang mga Israelinhon naghingalan sini nga kalan-on nga mana.m Kaangay ini sang liso sang kalabantos. Maputi kag matam-is ini subong sang manipis nga tinapay nga may dugos.
32 Nagsiling si Moises, "Amo ini ang ginsugo sang Ginoo, 'Pun-a ninyo sini ang isa ka sulodlan, nga inyo taguon para sa inyo mga kaliwat, kag ila makita ang kalan-on nga akon ginhatag sa inyo sa desierto sang pagpagwa ko sa inyo sa Egipto.'"
33 Si Moises nagsiling kay Aaron, "Kuha ka sing tibod, sudlan mo sing duha ka salmon nga mana, kag ibutang mo ini sa atubangan sang Ginoo agod taguon para sa inyo mga kaliwat."
34 Suno sa ginsugo sang Ginoo kay Moises ginbutang ini ni Aaron sa atubangan sang Kaban sang Kasugtanan, agod matago ini.
35 Ang mga Israelinhon nagkaon sing mana sa sulod sang 40 ka tuig tubtob nakaabot sila sa pungsod nga may mga pumoluyo. Nagkaon sila sing mana tubtob nakaabot sila sa dulonan sang duta sang Canaan.
36 (Duha ka salamon ukon isa ka parti sang tatlo ka bahin sang isa ka gantang.)
mMANA: Ini nga pulong kon ihambal sa Hebreo daw pareho sang Hebreo nga pulong nga kon sayuron "ano ini." (Tan-awa ang ber. 15).
No comments:
Post a Comment