1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang mga Israelinhon sa Bukid sang Sinai
1 Sa nahauna nga adlaw sang ikatlo nga bulan sa tapos ang mga Israelinhon makahalin sa Egipto, nag-abot sila sa desierto sang Sinai.
2 Naghalin sila sa Refidim, kag nagkadto sa desierto sang Sinai, sa diin naghimo sila sang ila kampamento sa atubangan sang bukid.
3 Dayon nagtaklad si Moises sa bukid sa pagpakigkita sa Dios. Ang Ginoo nagtawag sa iya gikan sa bukid, kag nagsiling, "Amo ini ang isiling mo sa mga kaliwat ni Jacob nga mga Israelinhon,
4 ‘Nakita ninyo kon ano ang ginhimo ko sa mga Egiptohanon, kag kon daw ano ang pagdala ko sa inyo subong sang isa ka agila nga nagadala sang iya mga buto sa ibabaw sang iya mga pakpak, kag gindala ko kamo sa akon.
5 Karon, kon magtuman kamo sa akon kag sa akon mga sugo, mangin-akon kamo kaugalingon nga mga tawo. Ang bug-os nga duta akon, pero kamo mangin-akon kaugalingon nga pinili.
6 Kamo mangin-isa ka pungsod sang mga tawo nga magaalagad sa akon subong mga pari, isa ka pungsod nga nahalad sa akon lamang.' Amo ini ang isiling mo sa mga Israelinhon."
7 Gani si Moises naglakat kag ginpatawag sing tingob ang mga pangulo sang mga tawo kag ginsugid sa ila ang tanan nga mga butang nga ginsugo sang Ginoo sa iya.
8 Dayon ang tanan nga mga tawo nagsabat, "Tumanon namon ang tanan nga ginsugo sang Ginoo." Ginsugid ni Moises sa Ginoo ang sabat sang mga tawo.
9 Ang Ginoo nagsiling kay Moises, "Magakadto ako sa imo paagi sa madamol nga panganod, agod ang mga tawo makabati sa akon nga nagahambal sa imo kag magapati pirme sa imo." Ginsugid ni Moises sa Ginoo ang sabat sang mga tawo.
10 Ang Ginoo nagsiling kay Moises, “Kadtoi ang mga tawo kag pahandaa sila sa pagsimba karon nga adlaw kag sa buas. Kinahanglan labhan nila ang ila mga bayu,
11 kag maghanda pa gid sila para sa isa ka buas. Sa sina nga adlaw, Ako, ang Ginoo, magapanaog pakadto sa Bukid sang Sinai, sa diin ang tanan nga mga tawo makakita sa akon.
12 Kinahanglan butangan mo sing mga dulonan ang mga tawo sa palibot sang bukid, kag singgana sila, 'Andam kamo nga indi magtaklad sa bukid ukon magtindog sa kunsaran sini. Ang bisan sin-o nga makatandog sini pagapatyon.
13 Dapat sia batuhon ukon panaon, nga wala sing isa nga makatandog sa iya. Amo ini ang himuon sa tawo ukon sa sapat, kinahanglan patyon sila.' Kon patunogon ang budyong nga sungay sang karnero, ang mga tawo magataklad sa bukid.”
14 Nagdulhog si Moises gikan sa bukid pakadto sa mga tawo kag ginpahanda sila sa pagsimba. Ginlabhan nila ang ila mga bayu,
15 kag nagsiling si Moises sa ila, "Maghanda kamo sa isa ka buas, indi kamo magtandog sa bisan kay sin-o nga babayi.”
16 Sang pagkaaga sang ikatlo ka adlaw may daguob kag kilat sa bukid, may madamol nga gal-om, kag may matunog nga huni sang budyong nga sungay sang karnero. Ang tanan nga mga tawo sa kampamento nagkurog sa kahadlok.
17 Gintuytoyan ni Moises ang mga tawo sa paggwa sa kampamento sa pagpakigkita sa Dios, kag nagtindog sila sa kunsaran sang bukid.
18 Ang bug-os nga Bukid sang Sinai natabunan sang aso, kay ang Ginoo nagpanaog sa sini nga bukid paagi sa kalayo. Ang aso nagtub-ok subong sang aso halin sa simboryo, kag ang tanan nga mga tawo nagkulorog gid.
19 Ang tunog sang budyong nga sungay sang karnero nagtudo pa gid. Naghambal si Moises, kag ang Dios nagsabat sa iya sa daguob.
 |
| Ang Dios nagsabat sa iya sa daguob. (19:19) |
20 Ang Ginoo nagpanaog sa putokputokan sang Bukid sang Sinai. Gintawag niya si Moises sa pagkadto sa putokputokan sang bukid kag si Moises nagtaklad.
21 Ang GINOO nagsiling kay Moises, "Dulhog ka kag paandami ang mga tawo nga indi sila maglakbang sa mga dulonan sa pagtulok sa akon, kay basi madamo sa ila ang magakalamatay.
22 Bisan ang mga pari nga magpalapit sa akon, kinahanglan magpakabalaan sila sang ila kaugalingon, kay kon indi silutan ko sila.”
23 Si Moises nagsiling sa Ginoo, "Ang mga tawo indi makataklad kay ikaw nagpaandam sa amon nga nagasiling, 'Butangi sing mga dulonan ang bukid kag pakabalaana ini.'"
24 Ang Ginoo nagsiling sa iya, "Dulhog ka, kag dalha si Aaron sa pagtaklad upod sa imo. Pero ang mga pari kag ang mga tawo indi dapat maglakbang sa mga dulonan pataklad pakadto sa akon, kay kon maglakbang sila silutan ko sila.”
25 Si Moises nagdulhog sa mga tawo kag ginsugiran sila.
No comments:
Post a Comment