EXODO - Kapitulo 7

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

○○○○○

1 Ang Ginoo nagsiling kay Moises, "Tan-awa bala, himuon ko ikaw nga daw Dios sa kay Paraon, kag si Aaron nga imo utod magahambal sa iya subong imo propeta.

2 Sugiri si Aaron sang tanan nga ginsugo ko sa imo, kag sia magasiling sa kay Paraon nga tugotan niya ang mga Israelinhon sa paggwa sa iya pungsod.

3 Pero patig-ahon ko ang tagipusoon ni Paraon, kag bisan magahimo ako sing madamo nga mga milagro kag makatingala nga mga buhat sa Egipto,

4 indi magpamati sa inyo si Paraon. Dayon halitan ko ang duta sang Egipto, silutan ko sila sing tudotudo, kag pangulohan ko ang akon mga hangaway, ang akon tawo nga mga Israelinhon pagwa sa Egipto.

5 Ang mga Egiptohanon magakilala nga ako amo ang Ginoo, kon bayawon ko ang akon kamot batok sa ila, kag pagwaon ko ang mga Israelinhon sa ila pungsod."

6 Gintuman ni Moises kag ni Aaron ang ginsugo sang GINOO sa ila.

7 Ang edad ni Moises 80 ka tuig, kag ang edad ni Aaron 83 ka tuig, sang maghambal sila kay Paraon.

Ang Sungkod ni Aaron

8 Ang Ginoo nagsiling kay Moises kag kay Aaron,

9 "Kon si Paraon magsiling sa inyo, ‘Pamatud-i ninyo ini paagi sa paghimo sing milagro,' singgana si Aaron, 'Kuhaa ang imo sungkod kag ihaboy sa atubangan ni Paraon, kag mahimo ini nga man-og.'"

10 Si Moises kag si Aaron nagkadto kay Paraon, kag gintuman ang tanan nga ginsugo sang Ginoo sa ila. Ginhaboy ni Aaron ang iya sungkod sa atubangan ni Paraon kag sang iya mga opisyales, kag nahimo ini nga man-og.

11 Dayon gintawag ni Paraon ang iya mga mangin-alamon nga mga tawo kag mga salamangkero, kag paagi sa ila mga madyik naghimo sila sing amo 

man.

12 Ginhaboy niia ang ila mga sungkod sa duta kag nahimo ini nga mga man-og. Pero ang sungkod nga iya ni Aaron naghalunhon sang ila mga sungkod.

13 Si Paraon nagpatig-a sang iya tagipusoon, kag indi sia magpamati sa ila, subong sang ginsiling sang Ginoo.

Ang Dugo

14 Karon ang Ginoo nagsiling kay Moises, "Nagtig-a ang tagipusoon ni Paraon, kag indi gid niya pagpalakton ang mga tawo.

15 Lakat ka kag pakigkitai si Paraon pagkaaga, sa iya pagkadto sa Suba sang Nilo. Hulata sia sa pangpang sang suba. Dalha man ang sungkod nga nahimo nga man-og.

16 Singgana si Paraon, 'Ang Ginoo, ang Dios sang mga Hebreo, nagpadala sa akon sa pagsiling sa imo, "Palakta ang akon mga tawo, agod makasimba sila sa akon sa desierto." Pero tubtob karon indi ikaw magpamati.

17 Amo ini ang ginasiling sang Ginoo, "Makakilala ikaw nga ako amo ang Ginoo paagi sa akon pagahimuon.” Tan-awa bala, paagi sini nga sungkod hampakon ko ang tubig sang suba, kag mahimo ini nga dugo.

18 Ang mga isda magakalamatay, kag ang suba magabaho gid sa bagay nga ang mga Egiptohanon indi makainom sang iya sini tubig.’”

19 Ang GINOO nagsiling kay Moises, "Singgana si Aaron nga kuhaon niya ang iya sungkod kag ibayaw ini sa ibabaw sang tanan nga tubig sa Egipto, sa mga suba, sa mga kanal, kag sa mga punong. Ang tubig mahimo nga dugo, kag sa bug-os nga duta may dugo bisan pa sa mga sulodlan nga kahoy kag mga sulodlan nga bato.”

20 Gintuman ni Moises kag ni Aaron ang ginsugo sang Ginoo sa ila. Sa atubangan ni Paraon kag sang iya mga opisyales, ginbayaw ni Aaron ang iya sungkod kag ginhampak ang tubig sa suba, kag ang tanan nga tubig sini nahimo nga dugo.

21 Ang mga isda sa suba nagkalamatay, kag nagbaho gid ini sa bagay nga ang mga Egiptohanon indi makainom sa tubig sang suba. Kag may dugo sa bug-os nga Egipto.

22 Dayon ang mga salamangkero sang Egipto naghimo man sini paagi sa ila mga madyik, kag si Paraon nagpatig-a pa gid sang iya tagipusoon. Indi sia magpati kay Moises kag kay Aaron, subong sang ginsiling sang Ginoo.

23 Ginbayaan sila ni Paraon kag nagbalik sia sa iya palasyo nga wala nagasapak sini.

24 Ang tanan nga mga Egiptohanon nagkutkot, sa higad sang pangpang sang suba agod makainom, kay indi sila makainom sang tubig sa suba.

25 Nagligad ang, pito ka adlaw sa tapos nga ginhampak sang Ginoo ang suba.

EXODO - Kapitulo 6 <<<   >>> EXODO - Kapitulo 8