1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Pagtabok sa Mapula nga Dagat
1 Ang Ginoo nagsiling kay Moises,
2 “Singgana ang mga Israelinhon sa pagbalik kag maghimo sang ila kampamento sa atubang sang Pi-hahirot, sa gin-utlan sang Migdol kag sang dagat, sa atubang sang Baal-zepon. Dira kamo magpatindog sang inyo mga tolda sa ubay sang dagat.
3 Magahunahona si Paraon nga ang mga Israelinhon nagadalangdalang palibot sa duta kag indi makagwa sa desierto.
4 Patig-ahon ko ang tagipusoon ni Paraon, kag pagalagson niya kamo kag ang akon pagdaog kay Paraon kag sa iya mga hangaway magahatag sa akon sing kadungganan. Ang mga Egiptohanon magakilala nga ako amo ang Ginoo." Ang mga lsraelinhon naghimo suno sa ginsiling sa ila.
5 Sang masugiran si Paraon nga hari sang Egipto, nga ang mga Israelinhon nagpalagyo, sia kag ang iya mga opisyaIes nagbasol sang ila kaugalingon nahanungod sa mga lsraelinhon kag nagsiling, "Ano man ining aton ginhimo? Ngaa gintugotan naton ining mga Israelinhon sa pagpalagyo halin sa ila pagpaulipon sa aton?”
6 Gin-aman ni Paraon ang iya karuwahi sa inaway kag ang iya mga hangaway.
7 Gindala niya ang 600 ka labing maayo nga mga karuwahi kag ang iban pa gid nga mga karuwahi nag-upod man, nga may mga opisyales nga nagaupod sa ila tanan.
8 Ginpatig-a sang Ginoo ang tagipusoon ni Paraon kag ginlagas niya ang mga Israelinhon, nga naglakat sa idalom sang pag-apin sang Ginoo.k
9 Ang mga Egiptohanon, upod sa ila tanan nga mga kabayo, mga karuwahi ni Paraon, mga soldado nga nagasakay sa karuwahi, kag mga hangaway, naglagas sa ila kag nalambot sila sa ila gindulogan malapit sa dagat, sang Pihahirot sa atubangan sang Baal-sepon.
10 Sang nagahinampot si Paraon, nakita sang mga Israelinhon ang mga Egiptohanon nga nagapadulong sa ila. Hinadlukan gid sila kag nagsinggit sa Ginoo.
11 Nagsiling sila kay Moises, "Gindala mo bala kami diri sa desierto agod mapatay bangod kay wala sing lulobngan sa Egipto? Tan-awa bala kon ano ang ginhimo mo sa pagpagwa sa amon sa Egipto!
12 Indi bala nga nagsiling kami sang una sang wala pa kami makahalin nga amo gid ini ang matabo? Nagsiling kami, 'Pabay-i lang kami, nga magpaulipon sa mga Egiptohanon.' Mas maayo pa nga magpaulipon kami sang sa mapatay kami diri sa desierto.”
13 Nagsabat si Moises sa mga tawo, "Indi kamo magkahadlok! Magpakalig-on kamo, kag tan-awa ninyo kon ano ang himuon sang Ginoo sa pagluwas sa inyo karon nga adlaw: ang mga Egiptohanon nga inyo makita karon indi na gid ninyo makita liwat.
14 Ang Ginoo magapakig-away para sa inyo, kag magpahimuyong lang kamo.”
15 Ang GINOO nagsiling kay Moises, “Ngaa bala nagapanawag ka sa akon? Singgana ang mga Israelinhon nga magpadayon sila sa paglakat.
16 Ibayaw ang imo sungkod, kag untaya ang imo kamot sa ibabaw sang dagat sa pagpihak sini, agod nga ang mga Israelinhon makatabok sa dagat nga nagaagi sa mamala nga duta.
17 Patig-ahon ko ang mga tagipusoon sang mga Egiptohanon agod lagson nila ang mga Israelinhon, kag ang akon pagdaog kay Paraon, sa tanan niya nga mga hangaway, sa iya mga karuwahi, kag sa iya mga soldado nga nagasakay sa kabayo magapadungog sa akon.
18 Ang mga Egiptohanon magakilala nga ako amo ang GINOO, kon magdaog ako sa ila.”
 |
| "Ang mga Egiptohanon magakilala nga ako amo ang GINOO." (14:18) |
19 Ang anghel sang Dios, nga nagauna sa mga hangaway sang Israel, nagsaylo sa ulihi nila. Ang haligi nga panganod nga nagauna sa ila nagsaylo man kag nagpabilin sa ulihi nila.
20 Nag-ulot ini sa mga hangaway sang mga Egiptohanon kag sa mga hangaway sang mga Israelinhon. May panganod kag kadudolman; nagligad ang gab-i, kag ang mga hangaway sang mga Israelinhon kag sang mga Egiptohanon indi makapalapit sa isa kag isa sa bug-os nga gab-i.
21 Gin-untay ni Moises ang iya kamot sa ibabaw sang dagat kag ang GINOO nagpahawa sang tubig paagi sa mabaskog nga paghuyop sang salatan sa bug-os nga gab-i, kag ang dagat nanginmamala nga duta. Ang dagat napihak,
22 kag ang mga Israelinhon nag-agi sa mamala nga duta, nga ang tubig nahimo nga daw pader sa ila wala kag sa ila tuo.
23 Ang mga Egiptohanon, upod ang tanan nga mga kabayo ni Paraon, ang iya mga karuwahi, kag ang iya mga soldado nga nagasakay sa kabayo nag-agi sa tunga sang dagat nga napihak.
24 Sang kaagahon ang GINOO nagtulok gikan sa haligi nga kalayo kag panganod sa mga hangaway sang mga Egiptohanon kag nagpasalangisag sa ila.
25 Ginpauntat niya ang pagtiyog sang mga kariton sang ila mga karuwahi, sa bagay nga ginbudlayan gid sila sa pagpalakat, kag ang mga Egiptohanon nagsiling, “Malagyo kita sa mga Israelinhon, kay ang GINOO nagapakig-away para sa ila batok sa aton.”
26 Ang GINOO nagsiling kay Moises, “Untaya ang imo kamot sa ibabaw sang dagat, kag ang tubig magauli sa mga Egiptohanon kag sa ila mga karuwahi kag sa ila mga soldado nga nagasakay sa kabayo.”
27 Gani gin-untay ni Moises ang iya kamot sa ibabaw sang dagat, kag sang pagkaaga ang tubig nagbalik sa iya kinaandan nga lugar. Ang mga Egiptohanon, sa ila pagtinguha sa pagpalagyo nasugata nila ang tubig, kag ang GINOO nagtagbong sa ila sa tunga sang dagat.
28 Nag-uli ang tubig kag nagtabon sang mga karuwahi, sang mga soldado nga nagasakay sa kabayo, kag sang tanan nga mga hangaway ni Paraon nga naglagas sa ila sa dagat, kag wala gid sing isa nga nabilin sa ila.
29 Pero ang mga Israelinhon naglakat sa mamala nga duta sa tunga sang dagat nga ang tubig nahimo nga daw mga pader sa sa tuo kag sa wala nila.
30 Sa sadto nga adlaw, ang GINOO nagluwas sang mga Israelinhon sa mga Egiptohanon, kag nakita sang mga Israelinhon ang mga bangkay sang mga Egiptohanon nga nagahalal-id sa baybayon.
31 Nakita nila ang daku nga gahom sang GINOO nga iya ginhimo batok sa mga Egiptohanon, kag ang mga tawo nagkahadlok sa GINOO. Nagtuo sila sa
GINOO kag sa iya alagad nga si Moises.
ksa idalom sang pag-apin sang GINOO; ukon sing madinalag-on.
No comments:
Post a Comment