EXODO - Kapitulo 4

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

○○○○○

1 Si Moises nagsabat, "Pero kon ang mga Israelinhon indi magpati sa akon, kag indi magpamati sa akon ginasiling, kundi magsiling sila, 'Ang Ginoo wala magpakita sa imo,' ano ang akon himuon?"

2 Ang Ginoo nagpamangkot sa iya, "Ano bala ang ginauyatan mo?" Nagsabat sia, "Isa ka sungkod."

3 Ang Ginoo nagsiling, "Ihaboy ina sa duta.” Sang nahaboy na ini ni Moises sa duta, nahimo ini nga man-og, kag nagpalagyo si Moises gikan sini.

4 Dayon ang GINOO nagsiling kay Moises, "Dakpa sa ikog." Gani gindakop ini ni Moises kag nahimo ini liwat nga isa ka sungkod sa iya kamot.

5 Ang Ginoo nagsiling, "Himoa ini, agod nga magtuo sila nga ang Ginoo, ang Dios sang ila mga katigulangan, ang Dios ni Abraham, ang Dios ni Isaac, kag ang Dios ni Jacob, nagpakita sa imo. 6 Ang Ginoo naghambal liwat kay Moises, "Isuksok ang imo kamot sa sulod sang imo bayu." Gintuman niya ini, kag sang pagwaon niya ang iya kamot, puno na ini sing mga lamuti kag maputi gid kaayo.

7 Ang Ginoo nagsiling, "Isuksok liwat ang imo kamot sa sulod sang imo bayu.” Gintuman niya ini, kag sang pagwaon niya ang iya kamot, nag-ayo na ini subong sang iban nga bahin sang iva lawas.

8 Ang Ginoo nagsiling, "Kon indi sila magpati sa imo kag indi madala sa nahauna nga katingalahan nga buhat, magapati sila tungod sang ikaduha.

9 Kon indi pa gid sila magpati sa sining duha ka mga katingalahan nga buhat, kag indi magpamati sa imo ginsiling, kuha ka sing tubig halin sa suba kag ibubo mo sa mamala nga duta. Ina nga tubig mahimo nga dugo.”

10 Nagsiling si Moises sa Ginoo, “Pasayluha ako, Ginoo; indi ako maayo nga manughambal, kag wala gid ako makaagi sa pagpamulongpulong halin sang una tubtob karon sa imo paghambal sa akon. Indi ako maayo nga manughambal, kay nagautol-utol-ako kon maghambal."

11 Ang Ginoo nagsiling sa iya, "Sin-o bala ang naghimo sang baba sang tawo? Sin-o bala naghimo sa iya nga bungol ukon apa? Sin-o bala ang nagbuot nga makakita sia ukon mabulag? Ako, ang Ginoo!

12 Karon lakat ka, kay ako ang magabulig sa imo sa paghambal, kay ako ang magadikta sa imo!"

13 Pero nagsiling si Moises,"Kon mahimo, O Ginoo, iban lang ang ipadala kag indi lang ako.”

14 Ang GINOO naakig kay Moises kag nagsiling, "Indi bala nga may utod ikaw nga si Aaron nga Levita? Nahibal-an ko nga maayo sia maghambal. Kon sa bagay nagapakari sia sa pagsugat sa imo, kag malipay sia sa pagpakigkita sa imo. 

15 Hambala sia kag isugid sa iya ang imo inughambal. Buligan ko kamo nga duha sa paghambal, kag tudloan ko kamo sang inyo himuon.

16 Sarang sia makahambal sa mga tawo para sa imo, kay sia amo ang imo manughambal, kag manginkaangay ikaw sa Dios nga magadikta sa iya sang iya inughambal.

17 Dalha ini nga sungkod, kag paagi sini magahimo ikaw sing mga milagro.”

Ang Pagbalik ni Moises sa Egipto

18 Nagbalik si Moises kay Jetro nga iya ugangan, kag nagsiling sa iya, "Kon mahimo tugoti ako sa pagbalik sa akon mga himata sa Egipto sa pagtan-aw sa ila kon buhi pa sila.” Si Jetro nagsabat, "Maayo lang nga paglakat."

19 Sang didto na si Moises sa Midian, ang Ginoo nagsiling sa iya, “Karon balik ka sa Egipto kay ang tanan nga luyag magpatay sa imo nagkalamatay na.”

20 Gindala ni Moises ang iya asawa kag ang iya mga kabataan nga lalaki, ginpasakay niya sila sa asno, kag nagbalik sila sa Egipto. Gindala man niya ang sungkod nga ginhatag sang Dios sa iya.

21 Ang Ginoo nagsiling kay Moises, "Karon kay manugbalik ka na sa Egipto, himuon mo gid ang mga milagro sa atubangan ni Paraon paagi sa gahom nga ginhatag ko sa imo. Patig-ahon ko ang iya tagipusoon, kag indi niya pagtugotan ang mga tawo sa paglakat.

22 Dayon amo ini ang dapat mo isiling kay Paraon, 'Amo ini ang ginasiling sang Ginoo: si Israel panganay ko nga anak nga lalaki.

23 Nagsiling ako sa imo, palakta ang akon anak nga lalaki, agod makasimba sia sa akon, pero indi ka magtugot. Karon patyon ko ang imo panganay nga anak nga Ialaki.’”

24 Sa duog nga ila ginpahuwayan sing isa ka gab-i sa ila pagpanglakaton, ginkadtuan sang Ginoo si Moises, kag patyon sia kuntani.

25 Si Sipora nagkuha sing matalom nga bato, kag gintuli ang iya anak nga lalaki, kag paagi sini gintandog niya ang paa^f ni Moises. Nagsiling sia, "Ikaw ang dugoon ko nga bana."

26 Gani wala ginpatay sang GINoo si Moises. Tungod sini si Sipora nagsiling sa iya, "dugoon ko nga bana,” tungod sang pagtuli.

27 Ang Ginoo nagsiling kay Aaron, "Kadto ka sa desierto sa pagsugata kay Moises."Naglakat sia sa pagsugata kay Moises sa bukid sang Dios, kag sang masugata niya si Moises, ginhalukan niya sia.

28 Ginsugiran ni Moises si Aaron sang tanan nga ginsiling sang GINOO sa iya, sang pagpadala sa iya sang Ginoo, kag sang tanan nga mga milagro nga ginsugo sang Ginoo sa iya nga iya himuon.

29 Si Moises kag si Aaron naglakat kag nagtipon sang tanan nga mga pangulo sang Israel.

30 Ginsugid ni Aaron sa ila ang tanan nga ginsiling sang Ginoo kay Moises, kag naghimo si Moises sang tanan nga mga milagro sa atubangan sang mga tawo.

31 Nagtuo sila, kag sang pagkabati nila nga ang Ginoo nagkari sa ila, kag nakakita kon daw ano ang pagpintas sa ila, nagluhod sila kag nagsimba sa Dios. 

^fPAA: Ginapanghunahona sang iban nga ini mapino nga pulong para sa kinatawo.

EXODO - Kapitulo 3 <<<   >>> EXODO - Kapitulo 5