1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Mando sa Paglakat
1 Ang GINOO nagsiling kay Moises, "Halin ka sa sini nga duog, upod sa mga tawo nga imo ginpagwa sa Egipto, kag kadto sa duta nga akon ginsaad nga ihatag kay Abraham, Isaac, kag kay Jacob, sang pagsiling ko sa ila, 'Ihatag ko ini nga duta sa imo mga kaliwat.'
2 Magapadala ako sing anghel nga magauna sa imo. Tabugon ko ang mga Canaanhon, ang mga Amornon, ang mga Hethanon, ang mga Peresnon, ang mga Hebhanon, kag ang mga Jebusnon.
3 Magakadto kamo sa duta nga maayo kag mapatubason. Pero indi ako mag-upod sa inyo, kay kamo mga tawo nga matig-a sing ulo, kag basi kon ako magalaglag sa inyo sa dalanon."
4 Sang mabatian sang mga tawo ining malain nga balita, nagkasubo sila, kag wala sing isa sa ila nga naggamit sing mga alahas.
5 Ang Ginoo nagsiling kay Moises, “Singgana ang mga tawo sang Israel, ‘Kamo mga tawo nga matig-a sing ulo. Kon mag-upod ako sa inyo, bisan sa malip-ot lang nga tion, pagalaglagon ko kamo sing bug-os. Karon, huksa ang inyo mga alahas, kag akon mahibaluan kon ano ang akon himuon sa inyo.' "
6 Gani halin sa Bukid sang Horeb, ang mga tawo sang Israel wala na maggamit sang ila mga alahas.
Ang Tolda nga Tilipunan
7 Kinabatasan ni Moises ang pagkuha sang tolda kag ang pagpatindog sini sa gwa sang kampamento sa uloonhan. Iya ini ginhingalanan "Ang Tolda nga Tilipunan.” Ang bisan sin-o nga luyag magpangita sa Ginoo dapat sia maggwa sa kampamento kag magkadto sa Tolda nga Tilipunan.
8 Kon maggwa si Moises pakadto sa Tolda, ang tanan nga mga tawo nagatindog, kag ang tagsatagsa nagatindog sa puwertahan sang iya kaugalingon nga tolda kag nagabantay kay Moises tubtob nga makasulod sia sa Tolda.
9 Sa tapos makasulod si Moises sa Tolda, ang haligi nga panganod nagapanaog kag nagapundo sa puwertahan sang tolda, kag ang Ginoo nagahambal kay Moises gikan sa panganod.
10 Kon makita sang tanan nga mga tawo ang haligi nga panganod sa puwertahan sang Tolda, nagatindog sila, kag ang tagsatagsa nagaluhod sa puwertahan sang iya kaugalingon nga Tolda.
 |
| Ang tagsatagsa nagaluhod. (33:10) |
11 Ang Ginoo nagahambal kay Moises sing tampad, subong sang isa ka tawo nga nagahambal sa iya abyan. Dayon si Moises nagabalik sa kampamento. Pero ang isa ka pamatan-on nga si Josue nga iya alagad, nga anak ni Nun, wala nagahalin sa Tolda.
Ang Saad sang Presensya sang GINOO
12 Si Moises nagsiling sa Ginoo, "Matuod nga ikaw nagsiling sa akon nga pangulohan ko ini nga mga tawo pakadto sa duta, pero wala ka magsiling kon sin-o ang imo ipadala upod sa akon. Pero nagsiling man ikaw, 'Nakilala ko gid ikaw, kag ako nahamuot gid sa imo.'
13 Karon kon nahamuot ka sa akon, ginapangayo ko nga isugid mo sa akon ang imo mga ginabuko, agod nga makilala ko ikaw, kag magapadayon ako sa pagpahamuot sa imo. Dumdoma man nga ini nga pungsod imo mga tawo.”
14 Ang Ginoo nagsiling, "Ako magaupod sa imo, kag padag-on ko ikaw."
15 Si Moises nagsiling sa iya, "Kon indi ikaw mag-upod sa amon, indi kami pagpahalina sa sini nga duog.
16 Kay kon indi ikaw mag-upod sa amon, ano ang pagkahibalo sang bisan sin-o nga ikaw nahamuot sa imo mga tawo kag sa akon. Kon ikaw mag-upod sa amon, ako kag imo mga tawo manginpinasulabi sa tanan nga mga katawuhan sa duta.”
17 Ang Ginoo nagsiling kay Moises, “Himuon ko ang imo ginsiling, kay nahamuot gid ako sa imo, kag nakilala ko gid ikaw.”
18 Si Moises nagpangabay, "Kon mahimo ipakita sa akon ang imo himaya.”
19 Ang Ginoo nagsabat, “ Paagihon ko sa imo atubangan ang bug-os ko nga katahom, kag ihambal ko sa imo atubangan ang akon ngalan, ang Ginoo. Magakaluoy kag magakaawa ako sa akon nahamut-an.”
20 Ang Ginoo nagpadayon, “Indi ikaw makakita sa akon nawong, kay wala sing tawo nga makakita sa akon kag mabuhi.”
21 Nagpadayon pa gid sia sa pagsiling, “Tan-awa, may duog diri sa luyo ko sa diin makatindog ka sa daku nga bato.
22 Kon mag-agi ang akon himaya, ibutang ko ikaw sa gikab sang daku nga bato, kag tabunan ko ikaw sang akon mga kamot tubtob nga makaligad ako.
23 Dayon kuhaon ko ang akon kamot kag makita mo ang akon likod, pero indi ang akon nawong.”
No comments:
Post a Comment