1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Ikaduha nga mga Malapadlapad nga Bato sang Kasugtanan
(Deut. 10:1-5)
1 Ang Ginoo nagsiling kay Moises, “Basbas ka sing duha ka malapadlapad nga bato sang kasugtanan pareho sang nahauna, kag isulat ko sa sini ang mga pulong nga nasulat sa nahauna nga malapadlapad nga bato nga imo ginbuka.
2 Maghanda ka buas sa aga, kag magtaklad ka sa Bukid sang Sinai kag magpakigkita ka sa akon didto sa putokputokan.
3 Wala sing bisan sin-o nga magtaklad upod sa imo, kag wala sing bisan sin-o nga makita sa bisan diin nga bahin sang bukid. Wala man sing mga karnero ukon mga baka nga pahalbon sa atubang sang bukid.”
4 Gani nagbasbas si Moises sing duha ka malapadlapad nga bato subong sang nahauna, kag aga pa gid sa madason nga adlaw nagtaklad sia sa Bukid sang Sinai, nga nagadala sang duha ka malapadlapad nga bato suno sa ginmando sa iya sang GINOO.
5 Ang Ginoo nagpanaog sa dagway sang panganod, kag nagtindog upod sa iya didto, kag naghambal sang iya ngalan, ang Ginoo.a
6 Ang Ginoo nag-agi sa atubangan niya kag nagsiling, “Ako ang Ginoo, ako amo ang Dios nga maluloy-on kag mainawaon, indi madali mangakig kag nagapakita sang malig-on nga gugma kag katutom.
7 Nagatuman ako sang akon saad sa mga linibo,b kag nagapatawad ako sang mga kalautan, kalainan, kag sala. Pero indi ko pagpabay-an kundi akon silutan ang mga kaanakan kag mga kaapuhan tubtob sa ikatlo kag ikaapat ka kaliwatan tungod sang mga sala sang ila mga ginikanan."
8 Si Moises nagluhod sa duta kag nagsimba.
9 Nagsiling sia, "Ginoo, kon nahamuot gid ikaw sa akon, ginaampo ko nga mag-upod ka sa amon. Ining mga tawo matig-a gid sang ulo, pero patawara ang amon kalautan, kag kasal-anan, kag batuna kami subong imo kaugalingon nga mga tawo."
Ang Kasugtanan Ginbag-o
(Ex. 23:14-19; Deut. 7:1-5; 16:1-17)
10 Ang Ginoo nagsiling, "Magahimo ako sing isa ka kasugtanan sa imo. Sa atubangan sang imo tanan nga mga tawo, magapakita ako sang gamhanan nga mga buhat nga wala pa gid mahimo sa bug-os nga duta, sa bisan diin nga pungsod. Ang tanan nga mga tawo nga kaupod nimo makakita kon ano ang mahimo sang Ginoo, kay ako magahimo sang isa ka makakulogmat nga butang para sa inyo.
11 Tumana ang mga sugo nga ihatag ko sa imo karon nga adlaw. Sa wala pa kamo makaabot didto tabugon ko ang mga Amornon, ang mga Canaanhon, ang mga Hethanon, ang mga Peresnon, ang mga Hebhanon, kag ang mga Jebusnon.
12 Tandaan mo nga indi ka maghimo sing kasugtanan sa mga tawo sa pungsod nga imo pagakadtuan, kay amo ini ang manginkabangdanan sang imo kalaglagan.
13 Sa baylo, imo panggub-on ang ila mga altar, laglagon mo ang ila ginapakabalaan nga mga bato, kag panapson ang ila ginapakabalaan nga mga kahoy.
14 "Indi ka magsimba sa iban nga dios, kay ang ngalan sang Ginoo si 'Maimon.' Sia maimon nga Dios.
15 Indi ka maghimo sing kasugtanan sa mga tawo sang pungsod, kay kon magginawi sila subong sang malain nga babayi paagi sa pagsimba sa ila mga dios sa pagdulot sing mga halad sa ila, agdahon nila kamo, kag basi magkaon kamo sang ila mga kalan-on nga nahalad.
16 Basi pangasaw-on sang inyo mga anak nga lalaki ang ila mga anak nga babayi, kag ini nga mga dumoluong nga babayi magaginawi subong sang malain nga mga babayi paagi sa pag-alagad sa ila mga dios, kag magadala sang inyo mga anak nga lalaki sa paghilayo sa akon kag sa pag-alagad sa ila mga dios.
17 "Indi ka maghimo sing dios para sa imo kaugalingon gikan sa tinunaw nga metal.
18 "Saulogon mo ang Piesta sang Tinapay nga wala sing Lebadora, suno sa ginsugo ko sa imo. Magkaon ka sang tinapay nga wala sing lebadora sa sulod sang pito ka adlaw sa bulan sang Abib, kay amo ini ang bulan nga naggwa ka sa Egipto.
19 "Ang tagsa ka panganay sang tawo ukon sang hayop mangin-akon: ang tagsa ka panganay nga lalaki, ang panganay sang imo mga kabakahan, kag sang imo mga karnero.
20 Pero imo gawaron ang tagsa ka panganay sang imo asno paagi sa pagbaylo sini sang isa ka karnero. Kon indi mo ini paggawaron, lunggoon mo ang iya liog. Imo gawaron ang tagsa ka panganay nga anak nga lalaki. Wala sing isa nga magpalapit sa akon nga wala sing dala nga halad.
21 “Mag-obra ikaw sa sulod sang anom ka adlaw, pero indi ikaw mag-obra sa ikapito nga adlaw, bisan pa tig-alarado ukon tig-alani.
22 "Saulogon mo ang Piesta sang mga Simana, ang nahauna nga patubas sang trigo, kag saulogon mo man ang Piesta sang Pagtipon sang mga Patubas sa katapusan sang tuig.
23 "Makatlo sa isa ka tuig ang tanan mo nga mga lalaki magaatubang sa akon, ang GINOONG Dios sang Israel.
24 Sa tapos ko matabog ang mga pungsod sa atubangan mo, kag mapasangkad ko ang imo kadutaan, wala sing may magtinguha sa pag-agaw sang imo duta sa sulod sang makatlo ka beses sa kada tuig nga ikaw mag-atubang sa akon, ang GINOO nga imo Dios.
25 “Indi ka maggamit sang tinapay nga wala sing lebadora kon ikaw magdulot sing sapat nga halad sa akon. Indi ka magbilin tubtob sa aga sang bisan ano nga sapat nga naihaw sa Piesta sang Pascua.
26 "Dalhon mo ang labing maayo sang nahauna nga patubas sang imo duta sa balay sang Ginoo. "Indi mo paglutoon ang kordero sa gatas sang iya inang."
27 Ang Ginoo nagsiling kay Moises, "Isulat ini nga mga pulong, kay sa sini nga mga pulong magahimo ako sing kasugtanan sa imo kag sa Israel."
28 Nagpabilin si Moises upod sa Ginoo sa sulod sang 40 ka adlaw kag 40 ka gab-i, nga wala magkaon ukon mag-inom. Ginsulat niya sa malapadlapad nga bato ang mga pulong sang kasugtanan, ang napulo ka sugo.
Si Moises Nagdulhog sa Bukid
29 Sang pagdulhog ni Moises sa Bukid sang Sinai nga nagadala sang duha ka malapadlapad nga bato sang kasugtanan, wala sia makahibalo nga ang iya nawong nagasilak bangod kay nagpakighambal sia sa Ginoo.
30 Si Aaron kag ang tanan nga mga tawo nagtulok kay Moises, kag nakita nila nga ang iya nawong nagasilak, kag nahadlok sila magpalapit sa iya.
31 Pero gintawag ni Moises si Aaron kag ang tanan nga mga pangulo sang katilingban kag nagbalik sila sa iya. Dayon si Moises naghambal sa ila.
32 Sa tapos sadto, ang tanan nga mga tawo sang Israel nagpalapit kay Moises, kag iya ginhatag sa ila ang tanan nga mga sugo nga ginhambal sang Ginoo sa iya didto sa Bukid sang Sinai.
33 Sa tapos si Moises makahambal sa ila, gintabunan niya ang iya guya.
34 Kon magsulod si Moises sa Tolda sa atubang sang Ginoo sa pagpakighambal sa iya, ginakuha ni Moises ang tabon sa iya guya tubtob maggwa sia. Kon maggwa na sia, ginasugid niya sa mga Israelinhon ang tanan nga ginsugo sang Ginoo sa iya nga isiling,
35 kag ila makita nga ang iya guya nagasilak. Dayon iya tabunan liwat ang iya guya tubtob sa iya madason nga pagpakighambal sa Ginoo.
aANG GINOO: Tan-awa ang 3:14 kag ang Lista sang mga Pulong.
bsa mga linibo; ukon sa mga linibo nga mga kaliwatan.
No comments:
Post a Comment