1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Ambahanon ni Moises
1 Dayon si Moises kag ang mga Israelinhon nagkanta sini nga ambahanon sa GINOO: “Magaamba ako sa GINOO, kay mahimayaon ang iya pagdaog; gintagbong niya sa dagat ang mga kabayo kag ang ila manugsakay.
2 Ang GINOO naghatag sa akon sing kusog kag gahom, sia amo ang nagluwas sa akon. Sia ang akon Dios, gani dayawon ko sia; sia ang Dios sang akon amay, gani ambahanon ko ang iya pagkagamhanan.
3 Ang GINOO isa ka hangaway; ang GINOO amo ang iya ngalan.
4 “Gintagbong niya sa dagat ang mga karuwahi kag ang mga hangaway ni Paraon; nagkalalumos sa Mapula nga Dagat ang iya mga pinili nga mga opisyales.
5 Ang madalom nga dagat nagtabon sa ila; naglugdang sila sa kaidadalman subong sang bato.
6 Ang kusog sang imo tuo nga kamot makatilingala, O GINOO, nga nagalaglag sang imo mga kaaway.
7 Sa imo gamhanan nga pagdaog ginlutos mo ang imo kaaway, ang imo kaakig naghingalayo, kag nagasunog sa ila subong sang dagami.
8 Naghuyop ka, kag ang imo ginhawa nagpahawa sang tubig; ang nagailig nga tubig nagdulog, kag nagtindog subong sang pader, ang madalom nga dagat nagtig-a tubtob sa iya kaidadalman.
9 Ang kaaway nagsiling, ‘Lagson ko sila, kag dakpon; bahinbahinon ko ang ila mga manggad, kag kuhaon ko sa ila ang tanan ko nga naluyagan, gabuton ko ang akon espada, kag sa akon kusog kuhaon ko ang tanan nga yara sa ila.'
10 Pero sa isa mo ka paghuyop, ang dagat nagtabon sa ila, naglugdang sila subong sang tingga, sa makakulogmat nga dagat.
11 “O Ginoo, sin-o bala nga diosdios ang makatupong sa imo? Sin-o bala ang makapareho sa imo nga makatilingala ang pagkabalaan? Sin-o bala ang makapareho sa imo, nga nagahimo sang mga milagro nga ginakahadlukan sang tanan sa imo mga buhat nga gamhanan?
12 Gin-untay mo ang imo tuo nga kamot, kag ang duta naglamon sa ila.
13 Matutom ka sa imo mga saad, gintuytoyan mo ang imo mga gintubos. Sa imo kusog gindala mo sila sa imo balaan nga puloy-an.
14 Ang mga pungsod nakabati, kag nagakurog sila sa kahadlok. Ang kahadlok naglambot sa Filistinhon, subong sang pagpasakit sang manug-anak,
15 ang mga pangulo sang Edom ginakugmat, ang mga maisog sa Moab ginakurog. Ang mga pumoluyo sa Canaan, nadulaan sing kaisog,
16 ang kakugmat kag kahadlok nagaabot sa ila, kay ang pagkadaku sang imo gahom nagpahimuyong sa ila subong sang bato. Tubtob nakaagi ang imo mga tawo, O Ginoo, tubtob nakaagi ang imo kaugalingon gid nga mga tawo.
17 Pagadalhon mo sila sa imo duta, kag itanom sa imo kaugalingon nga bukid, sa duog nga imo ginhimo nga puloy-an, O GINOO, sa templo, O GINOO, nga imo ginpatindog.
18 Ang GINOO manginhari sa walay katubtoban.”
19 Ang mga kabayo ni Paraon, upod sang iya mga karuwahi kag sang iya mga soldado nga nagasakay sa kabayo, nagpadayon sa paglakat sa dagat kag ang Ginoo nagpabalik sang tubig, kag gintabunan sila. Pero ang mga Israelinhon naglakat sa dagat paagi sa mamala nga duta.
20 Si Miriam nga propeta, ang utod ni Aaron, nagkuha sing panderita, kag ang tanan nga mga babayi naggwa nga nagasunod sa iya nga nagatukar sang ila panderita kag nagasaot.
21 Si Miriam nag-amba sa ila sang masunod: “Magkanta sa Ginoo, kay mahimayaon ang iya pagdaog, gintagbong niya sa dagat, ang mga kabayo kag ang ila mga manugsakay.”
Ang Tubig sa Mapait nga Tuboran
22 Ginpahanda ni Moises ang mga Israelinhon kag naghalin sila sa Mapula nga Dagat, kag nagpakadto sa desierto sang Sur. Sa sulod sang tatlo ka adlaw naglakat sila sa desierto, kag wala sila sing nakita nga tubig.
23 Sang ulihi nakaabot sila sa Mara, pero ang tubig mapait sa bagay nga indi sila makainom sini. Gani gintawag ini nga Mara.l
24 Ang mga tawo nagreklamo kay Moises kag nagpamangkot, "Ano bala ang amon imnon?” 25 Si Moises nagpangamuyo sing hugot sa Ginoo, kag ginpakita sang Ginoo sa iya ang isa ka kahoy. Ginhaboy niya ini sa tubig kag ang tubig indi na mapait. Didto ang Ginoo naghatag sa ila sing pat-od nga mga pagsulondan, kag iya man sila gintilawan.
26 Nagsiling sia, "Kon kamo magtuman sing bug-os sa akon, ang Ginoo nga inyo Dios, kag maghimo sang ginakabig ko nga matarong, kag magtuman sang akon mga sugo, kag magbantay sang akon tanan nga pagsulondan, indi ako magsilot sa inyo paagi sining mga balatian nga ginpadala ko sa mga Egiptohanon. Ako amo ang Ginoo nga nagaayo sa inyo.”
27 Karon nag-abot sila sa Elim, sa diin may 12 ka mga tuboran kag 70 ka mga kahoy nga palma. Didto nagpatindog sila sang ila mga tolda sa ubay sang tubig.
lMARA: Ini nga ngalan sa Hebreo nagakahulogan "mapait."
No comments:
Post a Comment