1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Ang Altar sang Insyenso
(Ex. 37:25-28)
1 "Maghimo ka sing altar nga sunogan sang insyenso. Himuon mo ini gikan sa kahoy nga akasya.
2 Kinahanglan kwadrado ini, 18 ka pulgada ang kalabaon, kag 18 ka pulgada ang kasangkaron, kag tatlo ka tapak ang kataason. Kinahanglan ang iya mga sungaysongay unay sa sini.
3 Haklapan mo sing puraw nga bulawan ang ibabaw, ang iya apat ka kilid, kag ang iya sungaysongay himuan mo sing molde nga bulawan sa palibot sini.
4 Himuan mo sing duha ka sulosingsing nga bulawan kag itakod mo sa idalom sang molde sa duha sini ka kilid, agod nga pagaguloan sang yayungan kon ini pagadal-on.
5 Himuon mo ini nga yayungan gikan sa kahoy nga akasya kag haklapan mo ini sing bulawan.
6 lbutang mo ini nga altar sa atubangan sang kurtina nga nagakabit sa luyo sang kaban nga nasudlan sang malapadlapad nga bato sang kasugtanan nga sa ibabaw sini yara ang takop. Amo ini ang duog sa diin magapakigkita ako sa imo.
7 Si Aaron magasunog sang insyenso nga mahumot sa ibabaw sini kada aga, kon nagaaman sia sang mga suga.
8 Iya man ini pagasunogon kon sia magsindi sang mga suga sa kahapunanon. Ini nga paghalad sang insyenso dapat magpadayon nga wala sing untat sa tanan ninyo nga mga kaliwatan.
9 Indi ka maghalad sa sini sang insyenso nga ginadilian, ukon bisan ano nga sapat nga halad nga sinunog, ukon bisan ano nga halad nga kalan-on, kag indi ka magbubo sa sini sang bisan ano nga halad nga ilimnon.
10 Makaisa sa isa ka tuig si Aaron magahiwat sang seremoniya para sa kapatawaran sang sala sa mga sungaysongay sini. Makaisa sa isa ka tuig, himuon niya ini para sa altar sa dugo sang mga sapat nga ginahalad tungod sa sala kag sa kapatawaran. Dapat man ini himuon sa masunod nga mga kaliwatan. Kinahanglan manginbalaan gid ini nga altar nga nahalad sa Ginoo.”
Buhis para sa Templo
11 Ang Ginoo nagsiling kay Moises,
12 "Kon magkuha ka sang mga senso sang mga tawo sang Israel, ang tagsa ka tawo magbayad sa Ginoo sang bili para sa iya kabuhi, agod nga wala sing halit nga magaabot sa ila samtang ginasenso mo sila.
13 Ang tagsatagsa nga nalakip sa senso, dapat magbayad sang balayran nga ginapangayo suno sa talaksan sang templo. Ang tagsatagsa dapat magbayad sini subong nga dulot sa Ginoo.
14 Ang tagsatagsa nga naisip sa senso, nga nagaedad sang 20 ka tuig pa ibabaw, magabayad sini nga kantidad sa Ginoo.
15 Ang manggaranon indi magbayad sang sobra, ukon ang imol sing kulang, kon kamo magbayad sini sa Ginoo para sa inyo kabuhi.
16 Batunon mo ini nga kuwarta gikan sa mga tawo sang Israel kag gamiton ini sa pag-alagad sang Tolda nga Tilipunan. Tungod sini ang Ginoo magadumdom sang mga tawo sang Israel, kag manginbayad ini para sa inyo mga kabuhi."
Ang Labador nga Saway
17 Ang Ginoo nagsiling kay Moises,
18 "Maghimo ka sing labador nga saway, nga may tulongtongan nga saway. Ibutang mo ini sa ulot sang Tolda nga Tilipunan kag sang altar, kag sudlan mo ini sing tubig.
19 Sa sini si Aaron kag ang iya mga anak nga lalaki magapanghinaw sang ila mga kamot kag sang mga tiil.
20 Kon magsulod sila sa Tolda nga Tilipunan, kag magpalapit sa altar sa pag-alagad subong mga pari, sa paghalad sa Ginoo sang dulot nga ginasunog paagi sa kalayo, indi sila mapatay kon makapanghinaw sila sa tubig.
21 Dapat sila magpanghinaw sang ila mga kamot kag sang ila mga tiil, agod indi sila mapatay. Amo ini ang pagsulondan nga dapat nila tumanon kag sang ila mga kaliwatan sa walay katapusan.”
Ang Lana nga Inughaplas kag ang Insyenso
22 Ang Ginoo nagsiling kay Moises,
23 "Magkuha ka sing pinakamaayo nga mga pahamot: 20 ka libra nga mira nga agwa, 10 ka libra nga mahamot nga kanela, 10 ka libra nga mahamot nga kalamo,
24 baynte ka libra nga kasiya (tanan napilo suno sa talaksan sang templo), kag duha ka galon nga lana sang olibo.
25 Gikan sini maghimo ka sing balaan nga lana nga inughaplas, subong sang pagmiskla sang manughimo sing agwa. Kinahanglan manginbalaan ini nga lana nga inughaplas.
26 Haplasan mo sini ang Tolda nga Tilipunan, ang kaban nga nasudlan sang malapadlapad nga bato sang kasugtanan.
27 Ang lamisa kag ang tanan sini nga mga gamit, ang kandilerohan kag ang mga gamit sini, ang altar nga ginasunogan sang insyenso,
28 ang altar para sa mga halad nga pagasunogon kag ang tanan nga mga gamit, kag ang labador lakip ang iya tulongtongan.
29 Sa sini nga paagi ihalad mo ini nga mga butang, kag kinahanglan manginbalaan gid ini tanan. Ang bisan ano nga makatandog sini manginbalaan.w
30 Dayon haplasan mo si Aaron kag ang iya mga anak nga lalaki, kag ihalad mo sila nga magaalagad sa akon subong mga pari.
31 Singganon mo ang mga tawo sang Israel, 'Ining balaan nga lana nga inughaplas kinahanglan manginbalaan para sa inyo, kag sa inyo palaabuton nga mga kaliwatan.
32 Indi mo dapat ini pag-ibubo sa ordinaryo nga mga tawo, kag indi kamo maghimo sing kaangay sini nga pagmiskla. Balaan ini, kag dapat ninyo kilalahon nga ini balaan.
33 Ang bisan sin-o nga maghimo sing bisan ano nga kaangay sini, ukon maggamit sini sa bisan kay sin-o nga indi pari pagaseparahon sia sa iya mga kahimataan.'”
34 Ang Ginoo nagsiling kay Moises, "Magkuha ka sing pareho nga kadamuon sa sining masunod nga mga pahamot: estakte, onika, galbano, mga pahamot kag puraw nga insyenso.
35 Gikan sa sini maghimo ka sing insyenso, subong sang paghimo sang manughimo sing agwa. Kinahanglan asinan ini, puraw kag balaan.
36 Bukbokon mo sing mapino ang bahin sini, kag ibutang mo ang bahin sini sa atubangan sang kaban nga nasudlan sang mga malapadlapad nga bato sang kasugtanan sa Tolda nga Tilipunan, ang duog sa diin ako magapakigkita sa imo. Kabigon mo ini nga insyenso nga labi ka balaan.
37 Indi ka maghimo sang bisan ano nga insyenso kaangay sini nga pagmiskla nga imo gamiton. Kinahanglan kabigon mo ini nga isa ka balaan nga butang nga nahalad sa Ginoo.
38 Ang bisan sin-o nga maghimo kaangay sini nga pahumot para sa iya kaugalingon, pagaseparahon sa iya mga kahimataan.”
wManginbalaan: Tan-awa ang 29:37.
No comments:
Post a Comment