1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
Si Jetro Nagduaw kay Moises
1 Si Jetro nga pari sang Midian, nga amo ang ugangan ni Moises, nakabati sang tanan nga ginhimo sang Dios tungod kay Moises kag sa mga Israelinhon nga iya mga tawo, kag kon paano ang pagpagwa sang Ginoo sa ila sa Egipto.
2 Gani gindala niya si Sipora, ang asawa ni Moises, nga ginpapauli anay ni Moises.
3 Gindala man ni Jetro si Gersom kag si Eliezer, ang duha ka mga anak nga lalaki ni Moises. (Si Moises nagsiling, “Nangindumoluong ako sa iban nga duta,” gani ginhingalanan niya ang isa niya ka anak nga lalaki kay Gersom.o
4 Nagsiling man sia, "Ang Dios sang akon amay amo ang akon kabulig kag nagluwas sa akon sa espada ni Paraon," gani ginhingalanan niya ang isa niya ka anak nga lalaki kay Eliezer.p
5 Nagkadto si Jetro sa desierto upod sa asawa ni Moises kag sang duha niya ka mga anak nga lalaki, diin si Moises nagpatindog sing tolda sa bukid sang Dios.
6 Ginpatundaan niya si Moises nga nagasiling, "Ako, ang imo ugangan nga si Jetro, nagapakadto dira upod sa imo asawa kag sang iya duha ka mga anak nga Ialaki."
7 Naggwa si Moises sa pagsugata sa iya, nagluhod sa atubangan niya, kag naghalok sa iya. Nagtamyawanay sila kag nagsulod sa tolda.
8 Ginsugiran sia ni Moises sang tanan nga ginhimo sang Ginoo kay Paraon kag sa mga Egiptohanon tungod sa mga Israelinhon. Ginsugiran niya sia sang mga kabudlayan sa ila dalanon, kag kon daw ano ang pagluwas sang Ginoo sa ila.
9 Nalipay gid si Jetro tungod sang kaayo sang Ginoo sa iya pagluwas sa ila sa mga Egiptohanon.
10 Nagsiling sia, "Dalayawon ang Ginoo nga nagluwas sa inyo sa mga Egiptohanon kag kay Paraon. Dalayawon ang Ginoo nga nagluwas sang iya mga tawo gikan sa pag-ulipon sang mga Egiptohanon.
11 Karon akon nahibaluan nga ang Ginoo gamhanan pa sa tanan nga mga diosdios, kay ginhimo niya ini sa mga Egiptohanon sang maakig sila sa mga Israelinhon."
12 Dayon nagdala si Jetro sang mga halad sa Dios kag sang dulot nga pagasunogon. Si Aaron kag ang tanan nga mga pangulo sang Israel nag-abot sa pagkaon upod sa ugangan ni Moises sing kalan-on sa atubangan sang Dios.
Ang Pagpili sang mga Hukom
(Deut. 1:9-18)
13 Sa madason nga adlaw, si Moises naglingkod sa paghusay sang mga palaligban sang mga tawo, kag wala nagakahubas ang mga tawo sa iya atubangan halin sa aga tubtob sa gab-i.
14 Sang makita ni Jetro nga ugangan ni Moises ang iya ginahimo nagpamangkot sia, "Ano bala ining imo ginahimo sa mga tawo? Ngaa ikaw lang ang nagahukom, samtang ang mga tawo wala nagakahubas sa atubangan mo halin sa aga tubtob sa gab-i?"
15 Nagsabat si Moises, "Kinahanglan nga himuon ko ini, kay ang mga tawo nagapalapit sa akon sa paghibalo sang kabubot-on sang Dios.
16 Kon may duha ka tawo nga nagabangig, nagakari sila sa akon, kag ako nagahusay sa ila kon sin-o ang matarong sa ila, kag ginatudloan ko sila sang mga sugo kag kasugoan sang Dios.”
17 Dayon si Jetro nagsiling sa iya, "Indi husto ang imo ginahimo.
18 Makakalapoy ini para sa imo kag subong man ang mga tawo. Tama ini ka budlay para sa imo kag indi mo ini mahimo nga ikaw lang.
19 Karon pamatii ako, yari ang maayo nga himuon mo, kag ang Dios magaupod sa imo. Ikaw ang magatiglawas sa mga tawo sa atubangan sang Dios, kag ikaw magadala sang ila mga kasuayon sa iya.
20 Ikaw ang dapat magtudlo sa ila sang mga sugo kag mga kasugoan, kag magsaysay kon paano sila magkabuhi kag kon ano ang ila dapat himuon.
21 Pero magpili ka sing pila ka mga tawo nga makasarang, kag himoa sila subong mga pangulo sang mga tawo: mga pangulo sang tag-isa ka libo, tag-isa ka gatos, tag-kalim-an, kag tagnapulo. Kinahanglan mga tawo sila nga mahinadlukon sa Dios kag masaligan, kag indi mahamhaman.
22 Dapat sila mag-alagad subong permanente nga mga manughusay para sa mga tawo. Sarang nila madala ang dalagku nga mga kaso sa imo, pero ang magamay nga mga kaso sila na lang ang maghusay. Ini manginmahapos para sa imo, sa nagabulig sila sa imo.
23 Kon himuon mo ini subong sang ginsugo sang Dios sa imo, indi ka pagkapuyan, kag ini nga mga tawo makapauli nga nahusayan ang ila mga gamo.”
24 Nagpamati si Moises kay Jetro kag gintuman ang iya ginsiling.
25 Nagpili sia sing mga tawo nga makasarang gikan sa mga Israelinhon, kag ginhimo sila nga mga pangulo sa mga tawo: mga pangulo sang tag-isa ka libo, tag-isa ka gatos, tagkalim-an, kag tagnapulo.
26 Nag-alagad sila subong permanente nga mga manughusay para sa mga tawo. Ang mga dalagku nga mga kaso ginadala nila kay Moises, pero ang mga magamay nga mga kaso sila na lang nagahusay.
27 Dayon nagpaalam si Moises sa iya, kag si Jetro nagpauli sa iya kaugalingon nga duta.
oGERSOM: Tan-awa ang 2:22.
pELIEZER: Ini nga ngalan kon ihambal sa Hebreo daw pareho sang Hebreo nga pulong nga kon sayuron "ang Dios nagabulig sa akon."
No comments:
Post a Comment