1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
○○○○○
1 "Si Besalel, si Oholiab, kag ang tanan nga mga sampaton nga mga manug-obra ginhatagan sang Ginoo sing abilidad kag kaalam. Makahibalo sila sa paghimo sang tanan nga butang nga kinahanglanon sa pagpatindog sang santuaryo, kag dapat nila himuon ang tanan suno sa ginsugo sang Ginoo."
Ang mga Tawo Nagdala sing Madamo nga mga Dulot
2 Gintawag ni Moises si Besalel, Oholiab, kag ang tanan nga mga sampaton nga mga tawo nga ginhatagan sang Ginoo sing abilidad, ang tanan nga handa magbulig, kag ginsingganan sila sa pagsugod sa pag-obra.
3 Ginbaton nila halin kay Moises ang tanan nga mga dulot nga gindala sang mga Israelinhon sa pagpatindog sang santuaryo. Ang mga tawo sang Israel nagpadayon sa pagdala sang ila mga dulot kada aga kay Moises.
4 Dayon ang sampaton nga mga tawo nga nagaobra sang santuaryo, nagbiya sa ila mga obra, nagkadto
5 kay Moises kag nagsiling, "Sobra na ang ginadala sang mga tawo sang sa kinahanglanon para sa bulohaton nga ginsugo sang GINOO nga himuon.”
6 Gani si Moises nagsugo nga ipahibalo sa bug-os nga kampamento nga wala na sing isa, lalaki ukon babayi, nga magdugang sa pag-amot para sa santuaryo. Tungod sini nag-untat ang mga tawo sa pagdala sang bisan ano.
7 Ang mga naamot sobra na sa pagpahuman sang tanan nga bulohaton.
Ang Paghimo sang Tolda nga Tilipunan
(Ex. 26:1-37)
8 Ang tanan nga labing sampaton nga mga tawo sa mga nag-ulobra naghimo sang Tolda nga Tilipunan. Nahimo ini sa napulo ka panid nga tela sang mapino kag nagakunotkunot nga lino, delana nga asol, granate, kag mapula nga nabordahan sing matahom sang mga laragway sang kerubin.
9 Ang kada panid may 14 ka yarda ang kalabaon kag duha ka yarda ang kasangkaron, ang tanan may pareho nga takos.
10 Ang lima ka panid gintahi nila, kag nangin-isa ka tinambitambi, kag ang lima sa isa man ka tinambitambi.
11 Naghimo sila sing sulosingsing nga tela nga asol sa punta nayon sang kurtina sa kada tinambitambi.
12 Ginbutangan nila sing 50 ka mga sulosingsing sa nahauna nga panid sang nahauna nga tinambitambi, kag 50 ka sulosingsing sa katapusan nga panid sa ikaduha nga tinambitambi, agod magkita sila.
13 Naghimo sila sing 50 ka mga kaw-it nga bulawan, kag paagi sini gintabid ang duha ka tinambitambi. Kag ini nangin-isa ka Tolda nga Tilipunan.
14 Dayon naghimo sila sing onse ka panid nga tela nga nahimo sa bulbol sang kanding nga mangin-atop sang Tolda nga Tilipunan.
15 Ang tagsa ka panid kinse ka yarda ang kalabaon kag duha ka yarda ang kasangkaron, ang tanan pareho ang takos.
16 Gintahi nila ang lima ka tela kag nangin-isa ini ka tinambitambi, kag ang anom nga nabilin sa isa man ka tinambitambi.
17 Ginbutangan nila sing 50 ka sulosingsing ang punta sang katapusan nga panid sang nahauna nga tinambitambi, kag 50 ka sulosingsing ang punta sang isa ka tinambitambi.
18 Naghimo sila sing 50 ka mga kaw-it nga saway sa pagtabid sang duha ka tinambitambi, agod mahimo nga isa ka tolda.
19 Naghimo sila sang inugtaklap para sa tolda nga nahimo sa panit sang karnero nga lalaki nga linugom sa pula, kag sang mapino nga panit nga isampaw sa ibabaw sini.
20 Naghimo sila sing dingding nga tapi gikan sa kahoy nga akasya para sa Tolda nga Tilipunan.
21 Ang kalabaon sang tagsa ka dingding nga tapi 15 ka tapak kag 27 ka pulgada ang kasangkaron,
22 nga may duha ka diladila sa punta kag punta nga nagaangot sa ila. Ginhimuan nila sing diladila ang tanan nga dingding nga tapi sang Tolda nga Tilipunan.
23 Naghimo sila sing 20 ka dingding nga tapi sa nabagatnan nga bahin,
24 kag 40 ka mga sadsaran nga pilak sa idalom sa tagsa ka dingding nga tapi, agod maangot sang duha ka diladila ang dingding nga tapi.
25 Naghimo man sila sing 20 ka dingding nga tapi sa naaminhan nga bahin sang Tolda,
26 kag 40 ka sadsaran nga pilak, duha ka sadsaran sa idalom sang tagsa ka dingding nga tapi.
27 Sa likod sang Tolda sa nakatundan, naghimo sila sing anom ka dingding nga tapi,
28 kag naghimo pa gid sila sing duha ka dingding nga tapi sa pamusod nayon sa likod sang Tolda.
29 Ining dingding nga tapi sa mga pamusod naangot sa idalom tubtob sa ibabaw, sa nahauna nga sulosingsing. Sa sini nga paagi ginhimo nila ining duha ka dingding nga tapi sa duha man ka pamusod.
30 Gani may walo ka dingding nga tapi kag 16 ka mga sadsaran nga mga pilak, duha sa idalom sang tagsa ka dingding nga tapi.
31 Naghimo sila sing balabag nga mga tapi nga kahoy gikan sa akasya, lima para sa mga dingding nga tapi sa isa ka kilid sang Tolda,
32 lima para sa dingding nga tapi sa pihak nga kilid, kag lima para sa dingding nga tapi sa nakatundan nga kilid sa likod nayon.
33 Ginhimuan nila sing balabag nga mga tapi sa tungatonga sang dingding nga tapi halin sa isa ka punta pakadto sa isa.
34 Ginhaklapan nila sing mga bulawan ang mga tapi kag gintakdan sing mga sulosingsing nga bulawan nga guloan sang balabag nga mga tapi, nga ginhaklapan man sing bulawan.
35 Naghimo sila sing kurtina nga delana nga asol, granate, kag pula kag mapino nga lino nga nagakunotkunot, nga nabordahan sing matahom sang mga laragway sang kerubin.
36 Naghimo sila sing apat ka mga haligi nga akasya nga tabiran sang kurtina. Ginhaklapan nila ini sing bulawan, kag gintakdan sing mga kaw-it man nga bulawan. Naghimo man sila sing apat ka mga sadsaran nga pilak nga natungtongan sang mga haligi.
37 Para sa puwertahan sang tolda naghimo sila sang kurtina nga delana nga asol, granate, pula, kag mapino nga lino nga nagakunotkunot, nga nabordahan.
38 Naghimo man sila sing lima ka haligi nga natakdan sang mga kaw-it. Ginhaklapan ang ila mga uloulo kag ang ila mga liogliog sing bulawan. Naghimo man sila sing lima ka mga sadsaran nga saway para sa mga haligi.
No comments:
Post a Comment