EXODO - Kapitulo 37

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

○○○○○

Ang Paghimo sang Kaban sang Kasugtanan

(Ex. 25:10-22)

1 Si Besalel naghimo sang kaban  sang kasugtanan gikan sa kahoy nga akasya, 45 ka pulgada ang kalabaon, 27 ka pulgada ang kasangkaron, kag 27 ka pulgada ang kataason.

2 Ginhaklapan niya ini sing puraw nga bulawan sa sulod kag sa gwa, kag ginhimuan niya sing molde nga bulawan ang palibot sini.

3 Ginhimuan niya ini sing apat ka dalagku nga mga sulosingsing nga bulawan kag gin-angot niya ini sa iya apat ka mga tiil, duha ka dalagku nga sulosingsing sa kada kilid.

4 Naghimo sia sing mga yayungan gikan sa kahoy nga akasya kag ginhaklapan niya ini sing bulawan.

5 Gingulo niya ini sa mga sulosingsing sa kada kilid sang kaban sang kasugtanan sa pagdala sini.

6 Naghimo sia sing takop gikan sa puraw nga bulawan, 45 ka pulgada ang kalabaon, kag 27 ka pulgada ang kasangkaron.

7 Sa duha ka punta sang takop, naghimo sia sing duha ka kerubin nga pinapa nga bulawan,

8 isa ka kerubin sa kada punta. Ginhimo niya ini nga unay sa takop.

9 Ang mga kerubin nagahumlad sang ila mga pakpak sa ibabaw, agod nga ila matabunan ang takop. Nagaatubangay sila, kag ang kada isa sa ila nagatamod sa takop.

Ang Paghimo sang Lamisa

(Ex. 25:23-30)

10 Naghimo sia sing lamisa gikan sa kahoy nga akasya, 36 ka pulgada ang kalabaon, 18 ka pulgada ang kasangkaron, kag 27 ka pulgada ang kataason.

11 Ginhaklapan niya ini sing puraw nga bulawan kag ginhimuan sing molde nga bulawan ang palibot sini.

12 Ginhimuan niya ini sing sanipa nga apat ka pulgada ang kalaparon palibot, kag ginhimuan niya sing molde nga bulawan ang sanipa.

13 Naghimo sia sing apat ka dalagku nga mga sulosingsing nga bulawan para sa sini, kag gintakod niya sa apat ka pamusod sa iya sini mga tiil.

14 Ang dalagku nga mga sulosingsing nga ginaguloan sang mga yayungan sa pagdala sang lamisa gintakod malapit sa sanipa.

15 Naghimo sia sing mga yayungan gikan sa kahoy nga akasya, kag ginhaklapan niya ini sing bulawan.

16 Naghimo sia sing mga kasangkapan nga puraw nga bulawan para sa lamisa: mga pinggan, mga tasa, mga tibod, kag mga yahong nga gamiton para sa halad nga ilimnon.

Ang Paghimo sang Kandilerohan

(Ex. 25:31-40)

17 Naghimo sia sang kandilerohan nga puraw nga bulawan. Ginhimo niya ang tiil kag ang lawas sini sa pinapa nga bulawan. Unay ang iya adorno nga mga bulak lakip ang iya mga bukol kag ang mga nagabuskad na.

18 May anom ka mga sanga nga nagagaway sa magtimbang nga kilid, tag-tatlo kada kilid.

19 Ang kada isa sang anom ka mga sanga may tatlo ka adorno nga mga bulak nga ang iya korte kaangay sang mga bulak sang almendro, nga ang iban bukol pa kag ang iban buskad na.

20 Ang lawas sang kandilerohan may apat ka adorno nga mga bulak nga ang korte kaangay sang mga bulak sang almendro nga ang iban bukol pa, kag ang iban buskad na.

21 May isa ka bukol sa idalom sang tagsa ka paris sang tatlo ka paris nga mga sanga.

22 Ang mga bukol kag ang mga sanga unay sa kandilerohan. Nahimo ini sa puraw kag pinapa nga bulawan.

23 Naghimo sia sang pito ka suga para sa kandilerohan, kag naghimo sia sing mga inugpalong kag sang iya mga inugsalod nga puraw nga bulawan.

24 Naggamit sia sing 100 ka libras nga puraw nga bulawan sa paghimo sang kandilerohan kag sang tanan nga iya mga gamit.

Ang Paghimo sang Altar sang Insyenso

(Ex. 30:1-5)

25 Naghimo sia sing altar para sunogan sang insyenso gikan sa kahoy nga akasya. Kwadrado ini, 18 ka pulgada ang kalabaon, 18 ka pulgada ang kasangkaron, kag tatlo ka tapak ang kataason. Ang iya mga sungaysongay unay sa sini.

26 Ginhaklapan niya sing puraw nga bulawan ang ibabaw sini, ang apat ka mga kilid, kag ang iya mga sungaysongay kag ginhimuan niya sing molde nga bulawan ang palibot sini.

27 Ginhimuan niya ini sing duha ka dalagku nga mga sulosingsing nga bulawan, kag gintakod ini sa idalom sang molde sa duha ka kilid, agod nga guloan sang yayungan sa pagdala sini.

28 Naghimo sia sing mga yayungan sa kahoy nga akasya kag ginhaklapan ini sing bulawan.

Ang Paghimo sing Lana nga Inughaplas kag Insyenso

29 Naghimo man sia sing balaan nga lana nga inughaplas kag puraw nga insyenso nga mahamot, nga ginmiskla subong sang paghimo sang manughimo sing agwa.

EXODO - Kapitulo 36 <<<   >>> EXODO - Kapitulo 38