□□□□□
Ang Katapusan nga mga Inadlaw ni Haring David
1 Karon si Haring David tigulang na gid, kag ginatugnawan sia bisan ginahabulan nila sia sing madamo nga mga habol.
2 Gani ang iya mga opisyales nagsiling sa iya, "Mahal nga Hari, mangita kita sing isa ka dalaga nga magaupod kag magaatipan sa imo. Magahulid sia sa imo agod indi ka pagtugnawan."
3 Nagpangita sila sing isa ka matahom nga babayi sa bug-os nga Israel, kag sa Sunem nakita nila si Abisag, kag gindala nila sia sa hari.
4 Tama gid sia katahom. Nag-alagad kag nag-atipan sia sa hari, pero ang hari wala maghiusa sa iya.
Si Adonias Nag-agaw sang Trono
5-6 Si Adonias, nga anak ni David kag ni Haguit, isa ka guwapo nga lalaki kag may handom nga manginhari. Sia ang pinakamagulang sang buhi nga mga anak ni David, kag wala gid sia maakigi ni David. Nag-aman sia para sa iya kaugalingon sing mga karuwahi kag mga kabayo kag 50 ka mga tinawo.
7 Nagpakighambal sia kay Joab (nga anak ni Sarvia) kag kay Abiatar nga pari, kag nagsugot sila sa pagsakdag sang iya tuyo.
8 Pero si Sadoc nga pari, si Benaya nga anak ni Joiada, si Natan nga propeta, si Simei, si Rei kag ang mga gwardya ni David wala magbuylog kay Adonias.
9 Isa ka adlaw si Adonias naghalad sing mga karnero, mga baka nga toro, kag mga pinatambok nga tinday sang baka sa Man-og nga Bato, malapit sa tuboran sang Enrogel. Gin-agda niya ang iban nga mga anak ni Haring David kag ang mga opisyales sang hari nga taga-Juda sa pagtambong sa sining punsyon sang mga halad,
10 pero wala niya gin-agda ang iya utod sa amay nga si Salomon, ukon si Natan nga propeta, ukon si Benaya, ukon ang mga gwardya sang hari.
Si Salomon Ginhimo nga Hari
11 Si Natan nagkadto kay Batseba, ang iloy ni Salomon, kag ginpamangkot sia, "Wala ka bala makahibalo nga si Adonias nga anak ni Haguit naghimo sang iya kaugalingon nga hari? Si Haring David wala makahibalo sini!
12 Kon luyag mo magluwas sang imo kabuhi, kag sang kabuhi sang imo anak nga si Salomon amo ini ang dapat mo himuon:
13 Kadto ka gilayon kay Haring David kag singganon sia, 'Mahal nga Hari, wala ka bala magsumpa sa akon nga ang akon anak nga si Salomon amo ang magabulos sa aimo nga hari? Karon, ngaa si Adonias amo ang nanginhari?'"
14 Si Natan nagsiling pa gid, "Dayon sa nagapakighambal pa ikaw kay Haring David, magasulod ako kag pamatud-an ko ang imo ginahambal."
15 Gani si Batseba naglakat sa pagpakigkita sa hari sa iya kuwarto. Tigulang na gid sia, kag si Abisag, ang dalaga nga taga-Sunem, amo ang nagaatipan sa iya.
16 Si Batseba nagsaludo sa atubangan sang hari, kag ginpamangkot sia sang hari, "Ano ang kinahanglan mo?"
17 Nagsabat sia, "Mahal nga Hari, nagsumpa ka sa akon sa ngalan sang GINOO nga imo Dios nga ang akon anak nga si Salomon amo ang magabulos sa imo nga hari.
18 Pero si Adonias amo na karon ang hari, kag wala gid ikaw makahibalo nahanungod sini.
19 Naghalad sia sing madamo nga mga baka nga toro, mga karnero, mga pinatambok nga tinday sang baka, kag gin-agda niya ang imo mga anak, si Abiatar nga pari, kag si Joab nga pangulo sang imo mga soldado sa punsyon, pero wala niya gin-agda ang imo anak nga si Salomon.
20 Mahal nga Hari, ang tanan nga mga tawo sang Israel nagapaabot sa imo nga singganon sila kon sin-o ang magabulos sa imo subong nga hari.
21 Kon indi ikaw magsiling sa ila, ang akon anak nga si Salomon kag ano pagakabigon nga mga traidor kon patay ka na."
22 Nagahambal pa sia
23 sang ginsugiran ang hari nga nag-abot si Natan nga propeta. Si Natan nagsulod kag nagsaludo sa atubangan sang hari.
24 Dayon nagsiling sia, "Mahal nga Hari, nagpahibalo ka bala nga si Adonias amo ang magabulos sa imo subong nga hari?
25 Karon gid nga adlaw naglakat sia kag naghalad sing madamo nga mga baka nga toro, mga karnero, kag mga tinday sang baka, kag gin-agda niya ang tanan mo nga mga anak, si Joab nga pangulo sang imo mga soldado,a kag si Abiatar nga pari. Nagakinaon sila didto kag nagasinggit, 'Mabuhay si Haring Adonias!'
26 Pero wala niya ako gin-agda, ukon si Sadoc nga pari, ukon si Benaya, ukon si Salomon.
27 Mahal nga Hari, gintugotan mo bala ini, kag wala ka gid magsiling sa imo mga opisyales kon sin-o ang magabulos sa imo subong nga hari?"
28 Si Haring David nagsiling, "Singgana si Batseba nga magbalik diri." Dayon nagbalik si Batseba kag nagtindog sa atubangan sang Hari.
29 Si David nagsiling sa iya, "Nagsaad ako sa imo sa ngalan sang buhi nga GINOO nga nagluwas sa akon sa madamo ko nga mga kabudlayan,
30 nga karon nga adlaw tumanon ko ang ginsaad ko sa imo sa ngalang sang GINOO, ang Dios sang Israel, nga ang imo anak nga si Salomon magabulos sa akon subong nga hari."
31 Si Batseba nagsaludo kag nagsiling, "Kabay nga ang akon agalon nga hari magkabuhi sa walay katubtoban!"
32 Dayon si Haring David nagsugo nga tawgon sanday Sadoc, Natan kag Benaya. Sang pagsulod nila,
33 nagsiling sia sa ila, "Dalha ang akon mga opisyales sa korte upod sa inyo, pasakya ang akon anak nga si Salomon sa akon kaugalingon nga kabayo, kag updi ninyo sia pakadto sa tuboran sang Gihon,
34 sa diin si Sadoc kag si Natan magahaplas sa iya subong nga hari sang Israel. Dayon patungga ang trumpeta kag magsinggit, 'Mabuhay si Haring Salomon!'
35 Sunda ninyo sia pabalik diri, kon magkari sia sa pagpungko sa akon trono. Magabulos sia sa akon subong nga hari, kay sia ang akon ginpili nga manginpangulo sang Israel kag Juda."
36 Si Benaya nagsabat, “Matuman ini, kag kabay nga ang GINOO nga imo Dios magapamatuod sini.
37 Subong nga ang GINOO nangin-upod sa imo, Mahal nga Hari, kabay nga mangin-upod man sia kay Salomon, kag magahimo sang iya paggahom nga mainuswagon pa sang sa imo.”
38 Gani sanday Sadoc, Natanm Benaya, ka gang mga gwardya sang hari nagpasakay kay Salomon sa kabayo sang hari, kag gin-updan sia pakadto sa tuboran sang Gihon.
39 Ginkuha ni Sadoc ang sulodlan sang lana nga olivo nga iya gindala halin sa balaan nga tolda, kag ginhaplas niya kay Salomon. Ginpatunog nila ang trumpeta kag ang mga tawo nagsinggit, “Mabuhay si Haring Salomon!”
40 Dayon tanan sila nagsunod sa iya pabalik, nga nagahinugyaw sa kalipay kag nagatukar sing mga plawta nga ang ila kagahod nagapakurog sang duta.
41 Samtang si Adonias kag ang iya mga inagda nagahingapos sang ila punsyon, nabatian nila ang ginahod. Kag sang pagkabati ni Joab sang trumpeta nagsiling sia, “Ngaa bala nagaginahod sa siyudad?”
42 Wala pa gani sia makatapos hambal sang mag-abot si Jonatan nga anak ni Abiatar nga pari. Si Adonias nagsiling, “Sulod. Maayo ka nga tawo. Sa walay duhaduha may dala ka nga maayo nga balita.”
43 Si Jonatan nagsabat, “Indi maayo nga balita, kay ang Mahal nga Hari nga si David naghimo kay Salomon nga hari.
44 Ginpadala niya sanday Sadoc, Natan, Benaya, kag ang harianon nga mga gwardya sa pag-ubay kay Salomon. Ginpasakay nila sia sa kabayo sang hari,
45 kag si Sadoc kag si Natan naghaplas sa iya didto sa tuboran sa Gihon agod manginhari. Dayon nagkadto sila sa siyudad nga nagahinugyaw. Kag ang mga tawo nagakinagula karon. Amo inang kinagahod nga inyo nabatian.
46 Si Salomon amo na karon ang hari.
47 Wala labot sini, ang mga opisyales sa korte nagkadto didto sa pagpahayag sang ila pagtahod sa Mahal nga Hari nga si David, kag nagsiling sila, ‘Kabay ang imo Dios maghimo kay Salomon nga sobra pa ka bantog sa imo, kag ang iya paggahom magmainuswagon pa sang sa imo.’ Dayon si Haring David nagluhod sa iya higdaan sa pagsimba,
48 kag nagpangamuyo, ‘Dayawon ta ang GINOO, ang Dios sang Israel, nga naghimo karon nga adlaw sang isa sang akon mga kaliwat sa pagbulosa sa akon subong hari, kag ginpalawig niya ako nga makakita pa sini!’”
49 Dayon ang mga inagda ni Adonias hinadlukan, kag tanan sila nagtindog kag naglakat sa ila kaugalingon nga dalanon.
50 Si Adonias hinadlukan gid kay Salomon. Nagkadto sia sa balaan nga tolda kag nag-uyat sa mga pamusod sang altar,b
51 ginsugiran si Haring Salomon nga si Adonias nahadlok sa iya kag naga-uyat sia sa mga pamusod sang altar kag nagsiling, “Nahauna, gusto ko nga si Haring Salomon magsumpa sa akon nga indi niya ako pag-ipapatay.”
52 Si Salomon nagsabat, “Kon indi sia magtraidor bisan isa ka nahot sang iya buhok indi pagtandugon, pero kon magtraidor sia, pagapatyon sia.”
53 Si Haring Salomon nagpatawag kay Adonias kag ginkuha sia didto sa altar. Si Adonias nagkadto sa Hari, nagsaludo tubtob sa duta sa atubangan niya kag ang hari nagsiling sa iya, “Sarang ka na makapauli.”
aAng isa ka dumaan nga pagbadbad si Joab nga pangulo sang imo mga soldado; sa Hebreo ang mga pangulo sang imo mga soldado.
bMGA PAMUSOD SANG ALTAR: Magamay ini nga daw mga sungay nga nagalabaw sa apat ka pamusod. Ang bisan sin-o nga nagauyat sa sini indi pagapatyon.
aAng isa ka dumaan nga pagbadbad si Joab nga pangulo sang imo mga soldado; sa Hebreo ang mga pangulo sang imo mga soldado.
bMGA PAMUSOD SANG ALTAR: Magamay ini nga daw mga sungay nga nagalabaw sa apat ka pamusod. Ang bisan sin-o nga nagauyat sa sini indi pagapatyon.
No comments:
Post a Comment