1 MGA CRONICA - Kapitulo 4

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang mga Kaliwat ni Juda 

1 Ang iban nga mga kaliwat ni Juda amo sanday Perez, Hezron, Car, Hur, kag Sobal.
2 Si Sobal amay ni Reaya, nga amay ni Jahat, nga amay ni Ahumai kag ni Lahad, ang mga katigulangan sang mga tawo nga nagpuyo sa Zora.
3-4 Si Hur amo ang kamagulangan nga anak sang asawa sang iya amay nga si Efrata, kag ang iya mga kaliwat amo ang nagpasad sang siyudad sang Betlehem. Si Hur may tatlo ka mga anak nga lalaki nga amo sanday Etam, Penuel, kag Ezer. Si Etam may tatlo ka mga anak nga lalaki, nga amo sanday Jezreel, Isma, kag Idbas, kag isa ka anak nga babayi, nga si Hazelelponi. Si Penuel amo ang nagpasad sang siyudad sang Gedor, kag si Ezer amo ang nagpasad sang Husa.
5 Si Asur, nga nagpasad sang banwa sang Tecoa, may duha ka asawa nga amo sanday Hela kag Naara.
6 Sia kag si Naara may apat ka mga anak nga lalaki, nga amo sanday Ahuzam, Hefer, Temeni, kag Haahastari.
7 Si Asur kag si Hela may tatlo ka mga anak nga Ialaki nga amo sanday Zeret, Ishar, kag Etnan.
8 Si Coz amo ang amay ni Anub kag Zobeba, kag ang ginhalinan sang mga kabaranggayan nga mga kaliwat ni Aharhel nga anak nga lalaki ni Harum.
9 May isa ka tawo nga si Jabes,^d nga amo ang labing talahuron nga katapo sang iya panimalay. Ginhingalanan sia sang iya iloy, "Jabes," kay ang pagpanganak sa iya tama gid kasakit.
10 Si Jabes nagpangamuyo sa Dios sang Israel "O Dios, bendisyuni ako, kag hatagi ako sang malapad nga duta. Ubayi kag tipigi ako sa tanan nga kahalitan kag kasakitan." Gani ang Dios naghatag sa iya sang iya ginpangayo.

Ang Iban nga mga Listahan sang Panimalay 

11 Si Caleb, ang utod ni Suha, may isa ka anak nga lalaki nga si Mehir. Si Mehir amo ang amay ni Eston,
12 nga may tatlo ka mga anak nga lalaki nga amo sanday Betrapa, Pasea, kag Tehina. Si Tehina amo ang nagpasad sang siyudad sang Nahas. Ang mga kaliwat sini nga mga tawo nagpuyo sa Reca.
13 Si Kenas may duha ka anak nga lalaki nga amo sanday Otniel kag Seraya. Si Otniel may duha man ka anak nga lalaki nga amo sanday Hatat kag Meonatai.^e
14 Si Meonatai amo ang amay ni Ofra. Si Seraya amo ang amay ni Joab, nga nagpasad sang Kapatagan sang mga Panday, sa diin ang tanan nga mga tawo sampaton nga mga panday.
15 Si Caleb nga anak ni Jefone may tatlo ka mga anak nga amo sanday Iru, Ela, kag Naam. Si Ela amay ni Kenas.
16 Si Jahalelel may apat ka mga anak nga lalaki nga amo sanday Zif, Sifa, Tirias, kag Asarel.
17-18 Si Esra may apat ka mga anak nga lalaki nga amo sanday Jeter, Mered, Efer, kag Jalon. Si Mered nagpangasawa kay Bitia, anak nga babayi sang hari sang Egipto, kag may anak sila nga babayi nga si Miriam, kag duha ka anak nga lalaki, nga amo sanday Samai kag Isba. Si Isba amo ang nagpasad sang banwa sang Estemoa. Si Mered nagpangasawa man sang isa ka babayi halin sa tribo ni Juda, kag may tatlo sila ka mga anak nga lalaki nga amo si Jered, ang nagpasad sang banwa sang Gedor, si Heber, ang nagpasad sang banwa sang Soco, kag si Jecutiel, ang nagpasad sang banwa sang Zanoa.
19 Si Hodia nagpangasawa sang utod nga babayi ni Naham. Ang ila mga kaliwat nagpasad sang mga kabaranggayan sang mga Garminhon, nga nagpuyo sa banwa sang Ceila, kag sang mga kabaranggayan sang mga Maacatnon, nga nagpuyo sa banwa sang Estemoa.
20 Si Simon may apat ka mga anak nga lalaki, nga amo sanday Amnon, Rina, Benhanan, kag Tilon. Si Isi may duha ka anak nga lalaki, nga amo sanday Zohet kag Benzohet.

Ang mga Kaliwat ni Sela 

21 Si Sela isa sang mga anak nga lalaki ni Juda. Ang iya mga kaliwat nagalakip kay Er, ang nagpasad sang banwa sang Leca; si Laada, ang nagpasad sang banwa sang Maresa; ang mga kabaranggayan sang mga manughabol sang lino nga nagpuyo sa banwa sang Betasbea;
22 si Joquim kag ang mga tawo nga nagpuyo sa banwa sang Cozeba; kag sanday Joas kag Saraf, nga nagpalangasawa sing mga babayi nga Moabnon kag nagpuyo dayon sa Betlehem. (Ini mga hitabo sang una nga panahon.)
23 Ini sila mga maninihon nga nagaalagad sa hari, kag nagpuyo sa mga banwa sang Netaim kag Gedera.

Ang mga Kaliwat ni Simeon 

24 Si Simeon may lima ka mga anak nga lalaki, nga amo sanday Nemuel, Jamin, Jarib, Zera, kag Saul.
25 Ang anak nga lalaki ni Saul amo si Sallum, ang iya apo amo si Mibsan, kag ang iya apo sa tuhod amo si Misma.
26 Dayon halin sa kay Misma, ang mga kaliwat amo sanday Hamuel, Zacur, Simei.
27 Si Simei may 16 ka mga anak nga lalaki kag anom ka mga anak nga babayi, pero diutay lang ang mga kabataan sang iya mga paryente, kag ang tribo ni Simeon wala gid magdamo subong sang tribo ni Juda.
28 Tubtob sang panahon ni Haring David nagpuyo sila sa masunod nga mga banwa: Beerseba, Molada, Hazarsual,
29 Bilha, Esem, Tolad,
30 Betuel, Horma, Siclag,
31 Betmarcabot, Hazarsusim, Betbiri, kag Saaraim.
32 Nagpuyo man sila sa lima pa gid ka mga duog nga amo ang masunod: Etam, Ain, Rimon, Toquen, kag Asan,
33 kag sa palibot nga mga baryo, tubtob sa nabagatnan-nakatundan sa banwa sang Baalat. Amo ini ang mga listahan nga ila gintago nahanungod sang ila mga panimalay kag sang mga duog nga ila ginpuy-an.
34-38 Ang masunod nga mga tawo amo ang pangulo sang ila mga kabaranggayan: Mesobab, Jamlec, Josa nga anak ni Amasias, Joel, Jehu, anak ni Josibias, nga anak ni Seraya, ang anak ni Asiel. Elioenai, Jaacoba, Jesohaya, Asaya, Adiel, Jesimiel, Benaya, Ziza nga anak ni Sifi, ang anak ni Allon, isa ka kaliwat ni Jedaya, Simri, kag Semaya. Tungod sang padayon nga pagdamo sang ila mga panimalay,
39 naglapta sila pakadto sa nakatundan tubtob sa duog nga malapit na gid sa Gerar,^f kag ginpahalab nila ang ila mga karnero sa sidlangan nga bahin sang kapatagan sa diin yara ang siyudad.

Ginpahalab nila ang ila mga karnero. (4:39)

40 Didto nakakita sila sing madabong kag maayo nga halalban, sa diin malapad ang duta nga malinong kag mahidaiton. Ang mga tawo nga nagpuyo didto sang una, mga kaliwat ni Ham.
41 Sang panahon ni Ezequias nga hari sang Juda, ang nasambit nga mga tawo nagkadto sa Gerar kag ginlaglag ang mga tolda kag mga payagpayag sang mga tawo nga nagpuyo didto. Gintabog nila ang mga pumoluyo didto, kag sila amo ang nagpuyo, tungod kay madamo didto ang halalbon para sa ila mga karnero.
42 Ang 500 sang mga katapo sang tribo ni Simeon nagpadulong sa sidlangan pakadto sa Edom. Ginpangulohan sila sang mga anak nga lalaki ni Isi nga amo sanday Palatias, Nearias, Refaias, kag Uziel.
43 Didto ginpatay nila ang nabilin nga mga Amalecnon, kag nagpuyo sila didto tubtob karon.


^dJABES: Ini nga ngalan kon ihambal daw pareho sang Hebreo nga pulong nga kon sayuron “kasakit."
^eAng iban nga dumaan nga pagbadbad Meonatai; ang Hebreo wala sini nga ngalan.
^fAng iban nga dumaan nga pagbadbad Gerar; sa Hebreo Gedor.

1 MGA CRONICA - Kapitulo 3 <<<   >>> 1 MGA CRONICA - Kapitulo 5