MGA SALMO - Kapitulo 25

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30

31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60

61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90

91 92 93 94 95 96 97 98 99 100 101 102 103 104 105 106 107 108 109 110 111 112 113 114 115

116 117 118 119 120 121 122 123 124 125 126 127 128 129 130 131 132 133 134 135

136 137 138 139 140 141 142 143 144 145 146 147 148 149 150 

Pangamuyo agod Tuytoyan kag Apinan

1 Sa imo, O Ginoo, nagapangamuyo ako.

2   O Dios, sa imo nagasalig ako. 

     Luwasa ako sa kahuloy-an sang pagkalutos; 

     indi ako  pagpakadlawi sa akon mga kaaway!

3 Indi malutos ang mga nagasalig sa imo, 

     kundi ang madali magbato sa imo.

4 Tudloi ako sang imo mga dalan, O Ginoo, 

     ipakilala man ini sa akon.

5 Tudloi ako sa pagkabuhi suno sa imo kamatuoran, 

     kay ikaw ang akon Dios nga nagaluwas sa akon. 

     Sa bug-os nga adlaw nagasalig ako sa imo.

6 Ginoo, dumdoma man ang imo kaayo kag mapinadayunon nga gugma, 

     nga imo ginpakita halin pa gid sang una.

7 Patawara man ang akon mga sala kag kasaypanan sang akon pagkapamatan-on, 

     tungod sang imo mapinadayunon nga gugma kag kaayo, 

     dumdoma man ako, O Ginoo!

8 Ang Ginoo matarong kag maayo, 

     ginatudloan niya ang mga makasasala sang dalan nga ila pagaagyan.

9 Ginatuytoyan niya ang mapainuboson sa matadlong nga dalan, 

     kag iya sila ginatudloan sang iya kabubot-on.

10 Sa gugma kag katutom iya ginatuytoyan 

     ang tanan nga nagatuman sang iya kasugtanan kag mga kasugoan.

11 Tumana man ang imo ginsaad, O Ginoo, kag patawara man ang akon mga sala, 

       kay tama ini kadamo.

12 Ang mga nagatuman sa Ginoo 

       pagatudloan niya sang dalan nga dapat nila agyan.

13 Magamainuswagon sila sa gihapon, 

       kag ang ila mga kaanakan magapuyo nga indi maano sa duta.

14 Ang Ginoo abyan sang tanan nga nagatuman sa iya,

       kag ginatudloan niya sila sang iya kasugtanan.

15 Sa tanan nga tion nagapabulig ako sa Ginoo, 

       kag iya ako ginaluwas sa katalagman.

16 Tamda ako, O Ginoo, kag kaluoyi ako, 

       kay isahanon lang ako kag maluya.

17 Kuhaa man ang akon mga palaligban, 

       kag sa tanan nga mga kagamo luwasa ako.

18 Talupangda ang akon kalisod kag pag-antos, 

       kag patawara ang tanan ko nga mga sala.

19 Tan-awa bala ang tanan ko nga mga kaaway, 

       tan-awa kon daw ano ang ila pagdumot sa akon!

20 Apini kag luwasa ako, 

       ipahilayo sa akon ang kalutosan, 

       kay nagadangop ako sa imo agod apinan.

21 Kabay nga ang akon kaayo kag pagkamasaligan magtipig sa akon, 

       kay nagasalig ako sa imo.

22 Sa tanan nila nga mga kalisdanan, 

       luwasa man ang imo mga tawo nga Israelinhon, O Dios!

iTITULO SA HEBREO: Ni David.

MGA SALMO - Kapitulo 24 <<<   >>> MGA SALMO - Kapitulo 26