2 SAMUEL - Kapitulo 8

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

●●●●●

Si David Nagpasangkad sang Iya Ginharian 

(1 Cron. 18:1-17) 

1 Sang ulihi, nalutos ni David ang mga Filistinhon, gingamhan sila, kag gin-agaw ang ila paggahom sa duta.
2 Dayon ginlutos niya ang mga Moabnon; ginpahigda niya sila sa duta, gintakos sila sing lubid, kag ginpamatay ang duha sang tatlo ka parti sa ila. Gani ang mga Moabnon nanginsakop niya kag nagbayad sila sing buhis sa iya.
3 Dayon ginlutos niya ang hari sang Soba, si Hadadezer nga anak ni Rehob, sang nagkadto si Hadadezer sa paggahom liwat sang duta sa higad sang Eufrates.
4 Si David nag-agaw sing 1,700 sang iya mga tawo nga nagasakay sa kabayo, kag 20,000 sang iya mga soldado nga nagalakat lang. Ginpamiang man niya ang mga kabayo nga nagaguyod sing karuwahi, kag nagbilin sang mga kabayo para lamang sa 100 ka mga karuwahi.
5 Ang mga Sirianhon gikan sa Damasco nag-abot sa pagbulig kay Hadadezer, kag ginpamatay ni David ang 22,000 sa ila.
6 Dayon nagpatindog sia sing kampamento para sa mga hangaway sa ila kadutaan kag nangin-iya sila mga sakop kag nagbayad sila sing buhis sa iya. Bisan diin ang Ginoo nagpadaog kay David.
7 Si David nag-agaw sang mga taming nga bulawan nga gindala sang mga opisyales ni Hadadezer kag gindala ini sa Jerusalem.
8 Nagkuha man sia sing madamo nga mga saway halin sa Beta kag sa Berotai, mga siyudad nga gingamhan ni Hadadezer.
9 Si Haring Toi nga taga-Hamat nakabati nga ginlutos ni David ang bug-os nga hangaway ni Hadadezer.
10 Gani ginpadala niya ang iya anak nga si Joram kay Haring David sa pagpangibulahan tungod sa iya pagdaog batok kay Hadadezer, nga gin-away ni Toi sing madamo nga beses. Si Joram nagdala sing mga sulodlan nga nahimo sa pilak, bulawan, kag saway.
11 Ginhalad ini ni Haring David agod gamiton sa pagsimba, pati pilak kag bulawan nga iya, gin-agaw sa mga pungsod nga iya ginlutos—
12 ang Edom, Moab, Amon, Filistia, Amalec kag subong man ang bahin nga iya gin-agaw kay Hadadezer.
13 Si David ginbantog pa gid sang iya pagbalik sa tapos niya mapamatay ang 18,000 ka mga Edomnon sa kapatagan sang Asin.
14 Nagpatindog sia sing mga kampamento para sa mga hangaway sa bug-os nga Edom, kag ang mga tawo didto nangin-iya mga sakop. Bisan diin ang Ginoo nagpadaog kay David.
15 Si David naggahom sa bug-os nga Israel, kag gintinguhaan niya nga ang iya mga tawo pagatratahon sing maayo kag matarong.
16 Si Joab nga anak ni Sarvia amo ang pangulo sang mga hangaway; si Josafat nga anak ni Ahilud amo ang gintugyanan sang mga listahan;
17 si Zadok nga anak ni Ahitub kag si Ahimelec nga anak ni Abiatar amo ang mga pari; si Seraya amo ang sekretaryo sang korte;
18 si Benaya nga anak nga lalaki ni Joiada amo ang pangulo sang mga gwardya ni David, kag ang mga anak ni David, mga pari.

2 SAMUEL - Kapitulo 7 <<<   >>> 2 SAMUEL - Kapitulo 9