1 SAMUEL - Kapitulo 11

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 

○○○○○

Si Saul Naglutos sang mga Amonhon

1 Sang makaligad ang isa ka bulan, si Nahas nga Amonhon naggubat sang banwa sang Jabes, sa kadutaan sang Galaad. Ang iya mga hangaway nagkibon sang banwa kag ang mga tawo sang Jabes nagsiling kay Nahas, "Maghimo ka sa amon sing kasugtanan kag ikaw mangin-amon pangulo.”
2 Si Nahas nagsabat, "Magahimo ako sa inyo sing kasugtanan sa sini nga kondisyon: pagalukaton ko ang tuo nga mata ninyo tanan, kag paagi sini mahuy-an ang bug-os nga Israel."
3 Ang mga pangulo sang Jabes nagsiling, "Hatagi kami sing pito ka adlaw sa pagpahibalo sa bug-os nga Israel. Kon wala sing isa nga magbmg sa amon, magaampo kami sa imo.”
4 Ang mga mensahero nag-abot sa Gabaa sa diin si Saul nagaestar, kag sang pagsugid nila sang balita ang mga tawo naghinibi sing tudo.
5 Si Saul bag-o lang mag-abot halin sa uma upod sa iya mga baka, kag nagpamangkot, "Anong natabo? Ngaa nga nagahinibi kamo? "Ginsugid nila sa iya ang ginbalita sang mga mensahero halin sa Jabes.
6 Sang pagkabati sini ni Saul, gingamhan sia sang espiritu sang Dios kag nagbalingaso sia sa kaakig.
7 Nagkuha sia sing duha ka baka, ginlasa ini kag ginpadala ini palibot sa Israel sa mga mensahero nga nagasiling, “Ang bisan sin-o nga indi mag-upod kay Saul kag kay Samuel pakadto sa inaway amo man ini ang pagahimuon sa iya mga baka!" Ang mga tawo sang Israel nahadlok gid sang pagahimuon sang Ginoo, kag tanan sila nagkari kag naghiliugyon.
8 Gindala sila tanan ni Saul sa Besek: may 300,000 gikan sa Israel kag 30,000 gikan sa Juda.
9 Nagsiling sila sa mga mensahero halin sa Jabes, "Singgana ang inyo mga tawo nga sa wala pa ang udto buas maluwas sila." Ang mga tawo sang Jabes nagkalipay gid sang mabaton nila ang mensahi,
10 kag nagsiling sila kay Nahas, “Buas magaampo kami sa imo kag mahimo mo ang imo luyag sa amon.”
11 Sang madason nga aga ginpartida ni Saul sing tatlo ka grupo ang iya mga tawo, kag sang kaagahon ginsulod nila ang kampamento kag ginsalakay ang mga Amonhon. Sang udto madamo na ang napamatay nila kag ang nabilin nga buhi nag-alaplaag, kag masigpalagyo na lang sila.
12 Dayon ang mga tawo sang Israel nagsiling kay Samuel, "Sin-o yadtong mga tawo nga nagsiling nga si Saul indi dapat mangin-aton hari? Itugyan sila sa amon kay pamatyon namon sila!"
13 Pero si Saul nagsiling, "Wala sing isa nga pagapatyon karon nga adlaw, kay amo ini ang adlaw nga ang Ginoo nagluwas sa Israel."
14 Kag si Samuel nagsiling sa ila, "Makadto kita tanan sa Gilgal kag didto iproklamar naton liwat nga si Saul aton hari.”
15 Gani nagkadto sila tanan sa Gilgal, kag didto sa balaan nga duog ginproklamar nila si Saul nga hari. Nagdulot sila sing mga halad sa paghiambit, kag si Saul kag ang tanan nga mga tawo nagsaulog sing malipayon sadto nga hitabo.

1 SAMUEL - Kapitulo 10 <<<   >>> 1 SAMUEL - Kapitulo 12