○○○○○
Ang Pangamuyo ni Ana
1 Nagpangamuyo si Ana: "Ang Ginoo nagpuno sang akon tagipusoon sing kasadya, nagakalipay ako tungod sang iya nahimo. Ginakadlawan ko ang akon mga kaaway. Nagakasadya ako tungod kay ang Dios nagbulig sa akon.2 "Wala sing balaan kaangay sa Ginoo; wala sing kaangay sa iya, wala sing mangangapin nga kaangay sang aton Dios.
3 Untati na ang inyo pagpahambog indi maghambal sing matinaastaason. Kay ang Ginoo isa ka Dios nga nakahibalo, kag ginahukman niya ang tanan nga ginahimo sang mga tawo.
4 Ang mga pana sang isganan nga mga soldado nagkalabali, pero ang mga maluya nagabaskog.
5 Ang mga busog anay nagapamugon na karon para sa ila pagkaon, pero ang mga gutom may tuman nga kalan-on. Ang baw-as nga asawa nagbata sing pito. Pero ang iloy sang madamo nawad-an sing anak.
6 Ang Ginoo nagapatay kag nagahatag sing kabuhi sia ang nagapadala sang mga tawo sa Iulobngan, kag sia nagabanhaw sa ila.
7 Ginapaimol niya ang iban kag ang iban iya ginapamanggad; ginapaubos niya ang iban kag ang iban iya ginapataas.
8 Ginabayaw niya ang mga imol gikan sa yab-ok, kag ginabayaw niya ang mga nawad-an gikan sa ila pag-antos. Ginapalingkod niya sila upod sa mga prinsipe, kag ginapahamtang niya sila sa duog sang kadungganan. Ang mga sadsaran sang duta iya sang Ginoo, sa ibabaw sini ginpasad niya ang kalibutan.
9 "Ginatipigan niya ang kabuhi sang matutom niya nga mga tawo, pero ang mga malaut nagakawala sa kadudolman. Ang isa ka tawo wala nagadaog paagi sa iya kaugalingon nga kusog.
10 Ang mga kaaway sang GINOO pagalaglagon, magadaguob sia batok sa ila gikan sa langit. Ang Ginoo magahukom sang bug-os nga kalibutan, nagahatag sia sing gahom sa iya hari, himuon niya nga madinalag-on ang iya pinili nga hari."
11 Dayon si Elcana nagpauli sa Rama, pero ang bata nagpabilin sa Silo, kag nag-alagad sa Ginoo sa idalom ni Eli nga pari.
Ang mga Anak nga Lalaki ni Eli
12 Ang mga anak nga lalaki ni Eli abusador. Wala sila nagatahod sa Ginoo,13 kag sa mga pagsulondan nga ginapatuman sang mga pari sa mga tawo. Kon ang tawo nagadulot sang iya halad, ang alagad sang pari nagakari nga may dala nga daku nga tinidor nga may tatlo ka ngipon. Samtang ginalaga pa ang karne,
14 ginatuslok niya ini sa ginalagaan, kag ang bisan ano nga madala sang tinidor iya ini sang pari. Amo ini ang ila ginahimo sa Silo sa tanan nga mga Israelinhon nga magkari sa pagdulot sang ila mga halad.
15 Wala labot sini bisan wala pa makuha ang sapay kag masunog, ang alagad sang pari nagakari kag nagasiling sa tawo nga nagadulot, "Hatagi ako sing karne para sa pari nga asalon, indi sia magbaton sing linaga gikan sa imo, kundi hilaw lang."
16 Kon ang tawo magsabat, "Himuon ta ang husto kag sunogon anay ang sapay, kag dayon kuhaon mo ang imo naluyagan,” ang alagad sang pari magasiling, "Indi mahimo! Ihatag ina sa akon gilayon! Kon indi ka, kuhaon ko ina sa pakusog!"
17 Ang sala sang mga anak ni Eli tama kalaut sa atubangan sang Ginoo, kay gintamay nila ang mga dulot sa Ginoo.
Si Samuel sa Silo
18 Ang bata nga si Samuel nagpadayon sa pag-alagad sa Ginoo nga nagabayu sing epod nga lino.19 Ang iya iloy nagahimo sing diutay nga sutana kag ginadala ini sa iya tagsa ka tuig kon sia mag-upod sa iya bana sa pagdulot sang tuigan nga halad.
20 Si Eli nagabendisyon kay Elcana kag sang iya asawa, kag nagasiling kay Elcana, "Kabay nga ang Ginoo maghatag pa gid sa imo sing mga kabataan paagi sini nga babayi nga magasalili sa isa nga imo ginhalad sa iya.” Pagkatapos nagapauli sila dayon.
21 Ang Ginoo nagbendisyon kay Ana kag nag-anak pa gid sia sing tatlo ka bata nga lalaki kag duha ka babayi. Ang bata nga si Samuel nagdaku nga nagaalagad sa Ginoo.
Si Eli kag ang Iya mga Anak nga Lalaki
22 Karon si Eli tigulang na gid kaayo, kag pirme lang sia makabati nahanungod sang tanan nga mga butang nga ginahimo sang iya mga anak nga lalaki sa mga Israelinhon, kag nagahulid pa gani sila sa mga babayi nga nagaalagad sa puwertahan sang Tolda nga Tilipunan.23 Gani ginsingganan niya sila, "Ngaa ginahimo ninyo ini nga mga butang? Ang tanan nagasugid sa akon sang malaut nga mga butang nga inyo ginahimo.
24 Mga toto, untati ninyo ini! Tama kalain ini nga butang ang ginahambal sang mga tawo sang Ginoo!
25 Kon ang isa ka tawo makasala batok sa isa ka tawo, ang Dios makaapin sa iya, pero sin-o ang makaapin sang tawo nga makasala batok sa Ginoo?" Pero indi sila magpamati sa ila amay, kay ang Ginoo nagpamat-od sa pagpatay sa ila.
26 Ang bata nga si Samuel nagpadayon sa pagdaku kag nagdugang ang kahamuot sang Ginoo kag sang mga tawo sa iya.
Ang Tagna batok sa Panimalay ni Eli
27 May isa ka propeta nga nagkadto kay Eli nga ginsugo sang Ginoo sa pagsiling sa iya sini nga mga pulong, "Sang si Aaron nga isa sang imo katigulangan kag ang iya panimalay mga ulipon pa ni Faraon didto sa Egipto, ginpahayag ko ang akon kaugalingon kay Aaron.28 Gikan sa tanan nga mga tribo sang Israel ginpili ko ang iya panimalay nga mangin-akon mga pari, sa pag-alagad sa altar, sa pagsunog sang insyenso, kag sa pagdala sang balaan nga Kaban sa pag-alagad sa akon. Kag ginhatagan ko sila sing parti sa mga halad nga ginasunog sa altar.
29 Karon, ngaa bala nga nagadinalukdalok kamo sa akon mga halad kag mga dulot nga akon ginsugo? Eli, ngaa ginapadunggan mo ang imo mga anak nga lalaki labaw sang sa akon, paagi sa imo pagtugot sa ila sa pagpatambok sang ila kaugalingon sa maayo nga mga bahin sang mga halad nga ginadulot sang akon mga tawo sa akon?
30 Ako, ang Ginoo nga Dios sang Israel, nagsaad sang una nga ang mo panimalay kag imo mga kabaranggayan magaalagad sa akon subong mga pari sa wala sing katapusan. Pero karon nagasiling ako nga indi ko na ini pagpadayunon! Sa baylo, padunggan ko ang nagapadungog sa akon, pagatamayon ko ang nagatamay sa akon.
31 Tandai ini! Magaabot ang tion nga ang tanan nga mga pamatan-on sa imo panimalay kag sa imo kabaranggayan pagapamatyon ko, agod nga wala sing lalaki sa imo panimalay nga magkabuhi sing malawig.
32 Magasakit ang imo buot kag magakahisa sang mga kaayuhan nga ihatag ko sa lsrael, pero wala sing isa sa imo panimalay nga magakabuhi sing malawig.
33 Pero tugotan ko ang isa sang imo mga kaliwat nga mabuhi, kag sia magaalagad sa akon subong pari, pero mabulag sia kag madulaan sing paglaom; ang nabilin sang imo mga kaliwat mapatay paagi sa hilaw nga kamatayon.
34 Kag kon ang imo duha ka anak nga lalaki nga si Opni kag si Pines mapatay sa isa lamang ka adlaw, ini magapakilala sa imo nga ang akon ginsiling manginmatuod.
35 Magapili ako sang isa ka pari nga manginmatutom sa akon kag magatuman sang tanan nga luyag ko. Hatagan ko sia sing mga kaliwat, nga magaalagad sa gihapon sa atubangan sang akon pinili nga hari.
36 Ang mabilin sang imo mga kaliwat magakadto sa pari kag magapangayo sa iya sing kuwarta kag pagkaon, kag magapakiluoy nga tugotan sia sa pagbulig sa mga pari, agod nga makakaon sia."
No comments:
Post a Comment