●●●●●
Ang Mensahi ni Natan kay David
(1 Cron. 17:1-15)
1 Karon malig-on na ang paggahom ni David sa iya ginharian, kag ang Ginoo nag-apin sa iya sa tanan niya nga mga kaaway.2 Dayon ang hari nagsiling kay Natan nga propeta, “Tan-awa! Ako iya nagapuyo sa palasyo nga nahimo sa kahoy nga sedro, pero ang Kaban sang Kasugtanan sang Dios yara lang sa tolda!”
3 Si Natan nagsabat, “Himoa ang tanan nga luyag mo, kay ang Ginoo nagaupod sa imo.”
4 Pero sa sadto nga gab-i ang Ginoo nagsiling kay Natan,
5 “Lakat ka kag singgana ang akon alagad nga si David nga ako nagasiling sa iya, ‘Indi ikaw ang magapatindog sang isa ka templo nga akon pagapuy-an.
6 Halin sang pagpagwa ko sang mga tawo sang Israel sa Egipto tubtob karon nga adlaw, wala ako magpuyo sa templo; nagpanglakaton ako nga nagapuyo sa isa ka tolda.
7 Sa akon pagpanglakaton upod sa mga tawo sang Israel wala ako magreklamo sa mga panguloj nga akon gintugyanan kon ngaa wala sila magpatindog para sa akon sang templo nga nahimo sa sedro.’
8 Gani singgana ang akon alagad nga si David nga ako, ang Ginoo nga Makagagahom nagasiling sa iya, ‘Halin sa pagkamanugbantay sang mga karnero sa latagon, ginpili ko ikaw nga manginpangulo sang akon mga tawo nga Israel.
9 Gin-updan ko ikaw bisan diin ikaw magkadto, kag ginlutos ko ang tanan mo nga mga kaaway sa atubangan mo. Himuon ko ikaw nga gamhanan subong ka gamhanan sa labing gamhanan nga mga pangulo sang duta.
10-11 Magapili ako sing isa ka duog para sa akon mga tawo nga Israel kag paestaron ko sila didto, sa diin magapuyo sila nga indi na gid pagtublagon. Sugod sang ila pagsulod sa sini nga duta, ginsalakay sila sang mapintas nga mga tawo, pero indi na ini matabo liwat sa ila. Nagasaad ako nga apinan ko kamo nga indi maano batok sa tanan ninyo nga mga kaaway, kag hatagan ko ikaw sing mga kaliwat.
12 Kon mapatay ka kag ilubong upod sa imo mga katigulangan, himuon ko ang isa sang imo mga kaliwat nga hari, kag palig-unon ko ang iya ginharian.
13 Magapatindog sia sing isa ka templo para sa akon, kag himuon ko nga ang iya mga kaliwat magagahom sa walay katapusan.
14 Ako mangin-iya amay, kag sia mangin-akon anak. Kon maghimo sia sing malain, ako magasilot sa iya subong sang isa ka amay nga nagasilot sang iya anak.
15 Pero indi ko sia pagpatumbayaan subong sang akon ginhimo kay Saul, nga akon ginsikway agod ikaw manginhari.
16 Indi ka mawad-an sing mga kaliwat, kag himuon ko ang imo ginharian nga manginwalay katapusan. Ang imo harianon nga paggahom wala sing katapusan.’”
17 Ginsugid ni Natan kay David ang tanan nga ginpahayag sang Dios sa iya.
Ang Pangamuyo ni David sa Pagpasalamat
(1 Cron. 17:16-27)
18 Dayon si Haring David nagsulod sa balaan nga tolda, naglingkod kag nagpangamuyo, "O GINOONG Dios, ako kag ang akon panimalay indi takos sang tanan nga imo ginhimo sa akon.19 Pero karon, O GINOONG Dios, sobra pa ang imo ginhimo; nagsaad ka nahanungod sa akon mga kaliwat sa palaabuton nga panahon. Kag imo ini ginpakita sa isa ka tawo.k O GINOONG Dios!
20 Karon, ano pa bala ang akon masiling sa imo! Imo ako nakilala, ang imo alagad.
21 Imo kabubot-on kag tinutoyo ang paghimo sini; ginpakilala mo sa akon ini tanan nga dalagku nga mga butang.
22 Daw ano ka gamhanan sa imo, O GINOONG Dios! Wala sing isa nga kaangay sa imo; wala sing iban nga dios kundi ikaw lamang suno sa amon gid nabatian.
23 Wala sing iban nga pungsod sa duta nga kaangay sa Israel, nga imo ginluwas gikan sa pagkaulipon agod imo manginkaugalingon nga mga tawo. Nanginbantog ka tungod sang dalagku kag makatilingala nga mga butang nga imo ginhimo para sa ila,l paagi sa pagtabog pagwam sang mga kapungsoran kag sang ila mga dios sa atubangan sang imo mga tawo, nga imo ginpagwa sa Egipto agod mangin-imo kaugalingon nga mga tawo.
24 Ginhimo mo ang Israel nga mangin-imo kaugalingon nga mga tawo sa walay katubtoban, kag ikaw, O Ginoo, nangin-ila Dios.
25 "Kag karon, O GINOONG Dios, tumana sa gihapon ang imo ginsaad sa akon kag sa akon kaliwatan kag himoa ang imo ginsiling.
26 Ang imo pagkabantog magalapnag, kag ang mga tawo magasiling sa walay katapusan, 'Ang Ginoo nga Makagagahom amo ang Dios sa Israel.' Kag himuon mo gid nga ang akon mga kaliwat magahari sa gihapon.
27 O GINOO nga Makagagahom, Dios sang Israel! Tungod kay imo ini ginpahayag sa akon nga imo alagad, nga himuon mo ang akon mga kaliwat nga mga hari, may kaisog ako sa pagpangamuyo sini sa imo.
28 ''Kag karon, O GINOONG Dios, ikaw amo ang Dios; ginatuman mo sa gihapon ang imo mga saad, kag ginhimo mo ining makatilingala nga saad sa akon.
29 Karon kon mahimo bendisyuni ang akon mga kaliwat agod sila magapadayon sa pagbaton sang imo mga kaayuhan. Ikaw, O Ginoo nga Gamhanan, ang nagsaad sini, kag kabay ang imo pagpakamaayo sa akon mga kaliwat manginwalay katapusan.”
jmga pangulo (tan-awa ang 1 Cron 17:6); sa Hebreo mga tribo.
kimo ini ginpakita sa mga tawo; sa Hebreo ini kasugoan para sa mga tawo.
lila: sa Hebreo inyo.
mAng isa ka dumaan nga pagbadbad pagtabog pa gwa (tan-awa ang 1 Cron. 17:21); sa Hebreo para sa inyo duta.
No comments:
Post a Comment