"Ining Imol nga Balo Naghatag sing mas Madamo sang sa Tanan"

Liturhiya sang Pulong

(Domingo, Nobyembre 11, 2018)

Ang Pagbasa gikan sa Nahauna nga Libro sang:

Mga Hari 17:10-16

Gani si Elias nagkadto sa Sarepta, kag sang pag-abot niya sa puwerta sang banwa nakita niya ang isa ka babayi nga nagapangahoy. Nagsiling sia sa babayi, “Palihog paimna ako.” Sang nagalakat ang babayi sa pagkuha sing tubig nagsiling pa gid sia, “Kag dalhi man ako sing kalan-on.” Nagsabat sia, “Sa ngalan sang buhi nga GINOO nga imo Dios, nagasumpa ako nga wala ako sing kalan-on. Ang nabilin ko nga arina isa na gid lang ka hakop sa yahong kag diutay nga lana sa tibod. Nagkari ako diri sa pagpangahoy agod sa akon pagpauli maluto ko ang diutay nga nabilin para sa akon kag sa akon anak nga lalaki. Amo na ini ang katapusan namon nga pagkaon kag dayon mapatay kami sa gutom.” Si Elias nagsiling sa iya, “Indi ka magpalibog. Lakat ka kag magluto sang inyo pagkaon. Pero lutoi anay ako sing diutay nga tinapay sa imo arina kag dalha diri sa akon, kag dayon lutoa ang nabilin para sa imo kag sa imo anak. Kay amo ini ang ginasiling sang GINOO, ang Dios sang Israel, ‘Ang yahong indi maubosan sing arina kag ang tibod indi maubosan sing lana tubtob sa adlaw nga ako, ang GINOO, magapadala sing ulan.’” Ang balo naglakat kag ginhimo niya ang ginsiling ni Elias, kag tanan sila wala mawad-i sing pagkaon sa sulod sang madamo nga mga inadlaw. Subong sang ginsaad sang GINOO paagi kay Elias,  ang yahong wala maubosi sing arina kag ang tibod wala maubosi sing lana.

Salmo sa Pagsabat:

Mga Salmo 146:7, 8-9, 9-10

(S) Dayawa ang Ginoo, O kalag ko! 

Ginatuman gid niya sa gihapon ang iya mga saad; nagahukom sia pabor sa mga ginapigos, kag nagahatag sia sing kalan-on sa mga ginagutom. (S)
Ang Ginoo nagahilway sang mga binilanggo kag nagaayo sang mga bulag. Ginabayaw niya ang mga ginapaubos, ginahigugma niya ang iya matarong nga mga tawo. (S)
Ginabuligan niya ang mga balo nga babayi kag mga ilo, pero ginaguba niya ang mga plano sang mga malaut. Ang Ginoo magahari sa walay katubtoban! Ang imo Dios, O Sion, magagahom sa tanan nga panahon! (S)

2. Ang Pagbasa gikan sa Sulat sa mga:

Hebreo 9:24-28

Kay si Cristo wala magkadto sa isa ka balaan nga duog nga ginhimo sang mga tawo, nga amo ang larawan sang isa nga matuod. Nagsulod sia didto gid sa langit, sa diin nagapangatubang sia sa Dios tungod sa aton. Ang Pinakamataas nga Pari nga Judio nagasulod sa Balaan nga Duog sa tagsa ka tuig nga nagadala sang dugo sang sapat. Pero si Cristo wala magsulod sa paghalad sang iya kaugalingon sing madamo nga beses. Kay kon amo ini, kinahanglan mag-antos sia sing madamo nga beses halin sa pagtuga sang kalibutan. Sa baylo, nagkari sia sing makaisa gid lang, sa katapusan sining mga panahon, sa pagkuha sang sala paagi sa paghalad sang iya kaugalingon. Gintalana sa tagsa ka tawo nga mapatay sing makaisa, kag sa tapos sini pagahukman sia sang Dios. Sa amo man nga bagay, si Cristo ginhalad sing makaisa sa pagkuha sang mga sala sang madamo. Magakari sia liwat, indi sa pagkuha sang sala, kundi sa pagluwas sang mga nagahulat sa iya.

Aleluya:

Mateo 5:3

Bulahan ang mga nagakilala sang kinahanglanon sang ila mga kalag, kay ila ang Ginharian sang Dios.

Ang Pagbasa sang Santos nga Ebanghelyo suno kay:

San Marcos 12:38-44

Sang nagpanudlo sia sa ila, nagsiling sia, “Mag-andam kamo sa mga manunodlo sang Kasugoan nga luyag maglagawlagaw nga may malaba nga bayu, kag luyag nga ang mga tawo magsaludo sa ila sa mga tiyendahan, kag nagapili sang pinasulabi nga mga pulongkoan sa mga sinagoga kag sang mga pulongkoan sang mga dungganon sa mga punsyon. Ini sila nagapamintaha sa mga balo nga babayi paagi sa pagkuha sang ila mga pagkabutang, kag dayon ginatabuntabonan nila ang ila hinimuan paagi sa malawig nga mga pangamuyo. Mas daku pa ang silot nga ila batunon.” Sang nagalingkod si Jesus sa tupad sang kolektahan sa templo, ginbantayan niya ang paghulog sang mga tawo sang ila kuwarta. Madamo nga mga manggaranon ang naghulog sing madamo nga kuwarta. Dayon may nagpalapit nga isa ka imol nga babayi nga balo kag naghulog sing duha gid lang ka sentimos. Gintipon ni Jesus ang iya mga gintuton-an kag ginsingganan sila, “Ginasiling ko sa inyo nga ining imol nga balo naghatag sing mas madamo sa kolektahan sang sa tanan. Ang iban naghatag kay sobra na ang ila manggad, pero ang balo, sa iya kaimulon, naghatag sang tanan niya nga pangabuhian.”

Nobyembre 10 | Nobyembre 12