●●●●●
Ginlutos ni David ang mga Amonhon kag ang mga Sirianhon
(1 Cron. 19:1-19)
1 Sang ulihi, si Nahas nga hari sang mga Amonhon napatay, kag ang iya anak nga si Hanun amo ang naghari.2 Si David nagsiling, “Pakitaan ko sing kaayo si Hanun, subong sang ginhimo sa akon sang iya amay nga si Nahas.” Gani si David nagpadala sing mga mensahero sa pagpakita sang iya pagbuylog sa kalisod ni Hanun. Pero sang pag-abot nila,
3 ang Amonhon nga mga pangulo nagsiling sa hari, "Nagahunahona ka bala nga si David nagpadala sini nga mga tawo sa pagbuylog sa imo kalisod sa kadungganan sang imo amay? Indi! Ginpadala niya sila diri subong mga espiya sa pag-usisa sang siyudad, agod ila ini maagaw sa aton!”
4 Si Hanun nagpadakop sang mga mensahero ni David, kag ginpakiskisan ang pihak nga bahin sang ila bungot, gingutrab ang katunga sang ila bayu tubtob sa ila balikawang, kag iya sila ginpapauli.
5 Sang pagkabati sini ni David, nagpadala sia sing mga tawo sa pagsugata sa ila, kay ang mga tawo nahuya sa pagkadto sa iya. Nagtugon sia nga magpabilin sila sa Jerico tubtob magtubo ang ila bungot, kag dayon magpauli.
6 Nahibal-an sang mga Amonhon nga nanginkaaway na nila si David, gani nagsuhol sila sing 20,000 ka Sirianhon nga mga hangaway halin sa Betrehob kag Soba, 12,000 ka mga tawo halin sa Tob, kag sang hari sang Maaca nga may 1,000 ka mga tinawo.
7 Nabatian ini ni David kag ginpadala niya si Joab upod ang iya pinakamaayo nga mga hangaway.
8 Ang mga Amonhon naggwa kag naghanda sa pagpakig-away sa puwertahan pakadto sa Raba, ang kapital nga siyudad, samtang ang iban, ang mga Sirianhon, kag ang mga tawo halin sa Tob kag Maaca naghanda sa pagpakig-away sa kawayangan.
9 Sang pagkakita ni Joab nga ang iya mga kaaway magasalakay sa atubangan kag sa likod, nagpili sia sang labing maayo nga mga soldado sang Israel kag ginpaatubang sila sa mga Sirianhon.
10 Ang iban niya nga mga hangaway ginpadumalahan niya kay Abisai nga iya utod, nga nagpaatubang sa ila sa mga Amonhon.
11 Si Joab nagsiling sa iya, "Kon makita mo nga ginalutos ako sang mga Sirianhon, magkari ka sa pagbulig sa akon, kag kon ang mga Amonhon magalutos sa imo kadtuan ko ikaw kag buligan.
12 Magpakaisog ka! Magpakig-away kita sing tudotudo para sa aton mga tawo kag para sa mga siyudad sang aton Dios, kag kabay nga himuon sang Ginoo ang iya ginahunahona nga labing maayo.”
13 Si Joab kag ang iya mga soldado nag-abanse sa pagsalakay, kag ang mga Sirianhon nagpalagyo.
14 Sang pagkakita sang mga Amonhon nga ang mga Sirianhon nagpalagyo, nagpalagyo man sila kay Abisai kag nagbalik sa siyudad. Dayon si Joab nag-untat sa iya pagpakig-away batok sa mga Amonhon kag nagpauli sa Jerusalem.
15 Ang mga Sirianhon nakatalupangod nga nalutos sila sang mga Israelinhon, kag gintipon nila ang tanan nila nga mga hangaway.
16 Si Haring Hadadezer nagpasugo sa mga Sirianhon nga yara sa sidlangan sang Suba sang Eufrates, kag nagkadto sila sa Elam sa pagpangulo ni Sobac, nga pangulo sang mga hangaway ni Hadadezer.
17 Sang pagkabati sini ni David, gintipon niya ang mga hangaway sang Israel, gintabok ang Suba sang Jordan kag nagkadto sa Elam, sa diin ang mga Sirianhon naghanda sa pagpakig-away batok sa iya. Ang inaway nagsugod,
18 kag ang mga Sirianhon ginlagas sang mga Isrealinhon. Si David kag ang iya mga tinawo nagpatay sang 700 ka mga Sirianhon nga nagasakay sa ila karuwahi, 40,000 ka mga hangaway nga nagasakay sa kabayo, kag napilasan nila si Sobac, ang pangulo sang ila mga kaaway nga napatay didto sa patag-awayan.
19 Sang matalupangdan sang mga hari nga sakop ni Hadadezer nga nalutos na sila sang mga Israelinhon, nagpakighidait sila kag nanginsakop sa mga Israelinhon. Kag ang mga Sirianhon nahadlok na gid magbulig sa mga Amonhon.
No comments:
Post a Comment