○○○○○
Gin-uli ang Kaban sang Kasugtanan
1 Sa tapos ang pito ka bulan nga pagtener sang Kaban sang Kasugtanan sang Ginoo sa Filistia,2 ang mga pangulo nagtawag sang mga pari kag mga salamangkero kag nagpamangkot, "Ano ang aton himuon sa Kaban sang Kasugtanan sang Ginoo? Kon iuli naton ini sa iya kaugalingon nga duog, ano ang ipadala naton upod sini?"
3 Nagsabat sila, "Kon iuli ninyo ang Kaban sang Kasugtanan sang Dios sang Israel, iuli ninyo ini nga may dala nga dulot para sa iya sa pagbayad sang inyo sala. Indi gid ninyo pag-ibalik ang Kaban sang Kasugtanan nga wala sing dala nga dulot. Sa sini nga paagi magaayo kamo, kag mahibaluan ninyo kon ngaa nga nagapadayon sia sa pagsilot sa inyo."
4 Nagpamangkot sila, "Ano nga dulot ang amon ipadala sa iya?" Nagsabat sila, "Lima ka bulawan nga ang ila korte daw hubag kag lima ka bulawan nga ang ila korte daw mga ilaga, isa sa tagsa ka pangulo sang mga Filistinhon. Ang amo nga kalalat-an ginpadala sa inyo tanan kag sa lima ka pangulo nga mga Filistinhon.
5 Dapat ninyo himuon ini nga mga bulawan nga ang ila mga korte daw mga hubag kag daw mga ilaga nga nagahalit sang inyo pungsod, kag magtuad kamo sang inyo sala sa Dios sang Israel. Ayhan magauntat sia sa pagsilot sa inyo, sa inyo mga dios, kag sa inyo duta.
6 Ngaa nga magpatig-a kamo sang inyo tagipusoon subong kay Faraon kag sa mga Egiptohanon? Indi pagkalimti kon daw ano ang pagsilot sang Dios sa ila tubtob nga gintugotan nila ang mga Israelinhon sa paglakat.
7 Gani mag-aman kamo sing bag-o nga karo kag duha ka baka nga wala pa gid matakdi. Itakod sa ila ang karo, kag tabuga ang ila mga tinday pabalik sa toril.
8 Kuhaa ninyo ang Kaban sang Kasugtanan sang Ginoo kag ikarga sa karo, kag ibutang sa sulodlan sa kilid sini ang bulawan nga ang ila mga korte daw hubag kag daw mga ilaga nga inyo ginapadala sa iya subong dulot sa pagbayad sang inyo mga sala. Palakta ninyo ang mga baka, kag pabayai lang kon diin sila makadto.
9 Bantayi ini samtang nagalakat. Kon magkadto ini sa banwa sang Betsemes, ini nagakahulogan nga ang dios sang Israel amo ang nagpadala sa aton sining tama nga kalalat-an. Pero kon indi, dayon mahibaluan naton nga sia wala magpadala sini nga kalalat-an, kundi isa lamang ini ka hitabo nga wala ginhungod."
10 Gintuman nila ang ginsiling sa ila. Nagkuha sila sing duha ka baka kag gintakdan sang karo, kag ginsirahan ang mga tinday sa toril.
11 Ginkarga nila ang Kaban sang Kasugtanan sa karo upod ang sulodlan nga may bulawan nga ang ila mga korte daw mga ilaga kag daw mga hubag.
12 Ang mga baka naglakat sing deretso padulong sa Betsemes nga wala nagalipas sa dalan. Nagaima sila samtang nagalakat. Ang lima ka mga pangulo nga Filistinhon nagsunod sa ila tubtob sa dulonan sang Betsemes.
13 Ang mga tawo sa Betsemes nagaani sing trigo sa kapatagan. Gilayon nagtungkaaw sila kag nakita nila ang Kaban sang Kasugtanan, kag nagkasadya gid sila sang makita nila ini.
14 Ang karo nag-abot sa uma ni Josue sang Betsemes kag nagdulog sa luyo sang daku nga bato. Ang mga tawo nagbis-ak sang karo nga kahoy, nag-ihaw sang mga baka kag naghalad sini subong halad nga sinunog sa GINOO.
15 Ginhakwat sang mga Lebinhon ang Kaban sang Kasugtanan sang Ginoo kag ang kaban nga may bulawan sa sulod, kag ginbutang sa daku nga bato. Dayon ang mga tawo sa Betsemes naghalad sang halad nga sinunog kag sang iban nga mga halad sa Ginoo sa sadto nga adlaw.
16 Ang lima ka mga pangulo sang Filistinhon nagtan-aw sa ila samtang ginahimo nila ini, kag nagbalik dayon sila sa Ecron sa amo nga adlaw.
17 Ang mga Filistinhon nagpadala sa Ginoo sing lima ka bulawan nga daw mga hubag subong ila dulot sa pagbayad sang ila mga sala, tag-isa para sa Asdod, Gasa, Askalon, Gat, kag Ecron.
18 Nagpadala man sila sing bulawan nga daw mga ilaga, tag-isa para sa mga banwa nga ginagamhan sang lima ka mga panguIo nga Filistinhon, ang banwa nga nalibutan sang pader kag ang mga baryo nga wala sing pader. Ang daku nga bato sa uma ni Josue sang Betsemes, nga ginbutangan nila sang Kaban sang Kasugtanan sang Ginoo, yara pa gihapon subong isa ka pamatuod nahanungod sa nahanabo.
19 Ang Ginoo nagpatay sang iban nga mga tawo sang Betsemes tungod kay nagtan-aw sila sang Kaban sang Kasugtanan sang Ginoo—ginpatay niya ang 70 sa ila. Naglalaw ang mga tawo kay ang Ginoo nagpamatay sang madamo sa ila.
Ang Kaban sang Kasugtanan sa Siyudad sang Kiryatjearim
20 Ang mga tawo sang Betsemes nagsiling, "Sin-o bala ang makatindog sa atubangan sang Ginoo, ining balaan nga Dios? Diin bala naton sia ipadala agod makapalayo sia sa aton?"21 Nagpadala sila sing mga mensahero sa mga tawo sang siyudad sang Kiryatjearim nga nagasiling, "Ang mga Filistinhon nag-uli sang Kaban sang Kasugtanan sang GINOO. Kari kamo kag kuhaa ninyo ini.”
No comments:
Post a Comment