2 SAMUEL - Kapitulo 12

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

●●●●●

Ang Mensahi ni Natan kag ang Paghinulsol ni David

1 Ang Ginoo nagpadala kay Natan nga propeta kay David. Si Natan nagkadto sa iya kag nagsiling, “May duha ka tawo nga nagpuyo sa isa ka banwa; ang isa manggaranon kag ang isa imol.
2 Ang manggaranon may madamo nga mga baka kag mga karnero,

Ang manggaranon may madamo nga mga baka kag mga karnero. (12:2)

3 samtang ang imol may isa lang ka cordero nga iya ginbakal. Ginsagod niya ini kag nagdaku sa iya balay upod sa iya mga kabataan. Iya ini ginapakaon sang iya kaugalingon nga pagkaon, ginapainom sa iya kaugalingon nga kupa, kag iya ini ginasabaksabak. Para sa iya ang cordero daw pareho sang bata niya nga babayi.

Ang imol may isa lang ka cordero nga iya ginbakal. (12:3)

4 Sang isa ka adlaw, may bisita nga nag-abot sa balay sang manggaranon. Ang manggaranon nga tawo indi luyag mag-ihaw sang isa sang iya kaugalingon nga mga sapat agod ipakaon sa iya bisita; sa baylo, ginkuha niya ang cordero sang imol nga tawo kag ginluto ini para sa iya bisita.”
5 Si David naakig gid sa tawo nga manggaranon kag nagsiling, “Ginasumpa ko sa buhi nga Ginoo nga ang tawo nga naghimo sina dapat patyon!
6 Dapat sia magbayad sing apat ka pilo sang iya ginkuha, tungod sining iya ginhimo nga wala sing patugsiling.”
7 Si Natan nagsiling kay David, “Ikaw amo ang tawo. Kag amo ini ang ginasiling sang Ginoong Dios sang Israel, ‘Ginhimo ko ikaw nga hari sang Israel kag ginluwas ko ikaw kay Saul.
8 Ginhatag ko sa imo ang iya ginharian kag ang iya mga asawa; ginhimo ko ikaw nga hari sa Israel kag sa Juda. Kon kulang pa ini kuntani ginhatagan ko ikaw sing pilo.
9 Ngaa bala ginlapas mo ang akon mga sugo? Ngaa ginhimo mo ining malaut nga butang? Ginpapatay mo si Urias sa inaway; ginpapatay mo sia sa mga Amonhon, dayon ginkuha mo ang iya asawa!
10 Karon sa tagsa ka kaliwatan, ang iban sang imo mga kaliwat mapatay sa makangilidlis nga kamatayon, tungod kay wala mo ako gintuman kag ginkuha mo ang asawa ni Urias.
11 Ginasumpa ko sa imo nga ang isa ka katapo sang imo panimalay magagamo sa imo. Makita mo ini kon kuhaon ko ang imo mga asawa kag ihatag sila sa iban nga tawo; kag magapakighilawas sia sa ila sing dayag.
12 Nagpakasala ka sing tago, pero himuon ko nga matabo ini sing dayag, agod nga makita sang bug-os nga Israel.’”
13 Si David nagsiling, “Nakasala ako batok sa Ginoo.” Nagsabat si Natan, “Ang Ginoo nagapatawad sa imo; indi ikaw mapatay.
14 Pero tungod kay ginlalis mo ang Ginoo sa paghimo sini, ang imo anak mapatay.
15 Dayon si Natan nagpauli.

Ang Pagkapatay sang Anak ni David

Ang Ginoo nagpamasakit sang bata nga ginbun-ag sang asawa Urias kay David.
16 Si David nagpangamuyo sa Dios nga ang bata magaayo. Wala sia magkaon bisan ano kag sa kada gab-i nagasulod sia sa iya kuwarto kag maghapaon sa salog.
17 Ang iya mga opisyales sa korte nagkadto sa iya sa pagtinguha nga magbangon sia, pero indi gid sia kag wala sia magkaon sing bisan ano upod sa ila.
18 Sa tapos ang isa ka simana ang bata napatay, kag ang mga opisyales ni David nahadlok magsugid sa iya sang balita. Nagsiling sila ,"Sang buhi pa ang bata, si David indi magsabat sa aton kon maghambal kita sa iya. Ano karon ang aton pagsugod sa iya nga ang bata napatay? Basi malain ang himuon niya!"
19 Sang matalupangdan ni David nga nagahinutikay sila, nahangpan niya nga ang bata patay na. Gani nagpamangkot sia, “Patay na bala ang bata?” Nagsabat sila, "Huo, patay na sia."
20 Si David nagbangon kag nagpaligo, nanghusay sang buhok kag nag-ilis sang iya bayu. Dayoo nagkadto sia sa balay sang GINOO kag nagsimba. Sang pagbalik niya sa palasyo nagpangayo sia sing pagkaon kag iya ginkaon ang ginhatag sa iya.
21 Ang mga opisyales nagsiling sa iya, "Natingala kami nga sang buhi pa ang bata nagahibi ka kag indi magkaon; pero sang pagkapatay sang bata, nagbangon ka kag nagkaon!"
22 Si David nagsabat, "Huo, nagpuasa ako kag naghibi sang buhi pa sia. Naghunahona ako nga ayhan ang GINOO magkaluoy sa akon kag indi niya pagpatyon ang bata.
23 Pero karon nga patay na sia, ngaa bala mapuasa pa ako? Sarang ko pa bala mapabalik ang kabuhi sang bata? Sa pila ka adlaw maapas ako sa iya, pero indi na sia makabalik sa akon.”

Natawo si Salomon

24 Dayon ginlipay ni David ang iya asawa nga si Batseba. Naghiusa sia sa iya, kag nagbata sia sing lalaki, nga ginhingalanan ni David kay Salomon. Ginhigugma sang GINOO ang bata,
25 kag nagsugo kay Natan nga propeta nga hingalanan ang bata kay Jedidia^o kay ang Ginoo naghigugma sa iya.

Si David Nag-agaw sang Raba

(1 Cron. 20:1-3)

26 Sa pihak nga bahin, si Joab nagpadayon sa pagsalakay sang Raba, ang siyudad nga kapital sang Amon, kag buot na niya agawon ini.
27 Nagpadala sia sing mga tawo sa pagsugid kay David, "SinaIakay ko ang Raba kag gin-agaw ko ang ila ginakuhaan sing tubig.
28 Karon tipuna ang nabilin mo nga mga hangaway, salakaya ang siyudad kag ikaw gid ang mag-agaw sini, kay indi ako luyag nga ako ang mabantugan sa pag-agaw sini."
29 Gani si David nagtipon sang iya mga hangaway kag nagkadto sa Raba. Dayon ginsalakay kag gin-agaw niya ini.
30 Ang ila diosdios nga si Moloc^p may korona nga bulawan nga nagabug-at sang 34 ka kilo kag may malahalon ini nga bato. Ginkuha ni David ang malahalon nga bato kag ginbutang sa iya korona. Madamo man ang iya ginpanguha nga mga pagkabutang sa siyudad.
31 Gindala niya ang mga pumoluyo kag ginhimo nga manuglagari, manughimo sang salsalon nga sadol, kag mga wasay, kag ginpahimo sang mga tisa. Amo man ang iya ginhimo sa tanan nga mga pumoluyo sang iban nga mga kabanwahanan sang Amon. Dayon sia kag ang iya mga tinawo nagbalik sa Jerusalem.


^oJEDIDIA: Ini nga ngalan sa Hebreo nagakahulogan "Pinalangga sang GINOO." 
^pAng ila diosdios nga si Moloc; ukon Ang Amonhon nga hari.

2 SAMUEL - Kapitulo 11 <<<   >>> 2 SAMUEL - Kapitulo 13