○○○○○
Pag-inaway batok sa mga Amaleknon
1 Nagsiling si Samuel kay Saul, "Ako amo ang ginpadala sang Ginoo sa paghaplas sa imo nga hari sang mga tawo sang Israel. Karon pamatii ang ginasiling sang GINOO nga Makagagahom.2 Pagasilutan niya ang mga Amaleknon tungod kay ginsumpong nila ang mga Israelinhon sang nagapanglakaton sila halin sa Egipto.
3 Lakat ka, kag salakaya ang mga Amaleknon, kag laglaga sing bug-os ang tanan nila nga pagkabutang. Indi sila pagbilini bisan ano. Pamatya ang tanan nga mga lalaki, mga babayi, mga kabataan, kag mga lapsag, ang mga baka kag mga karnero, mga kamelyo kag mga asno.”
4 Gintipon ni Saul ang iya mga hangaway, kag gin-isip sila sa Telaim: may 200,000 ka mga hangaway halin sa Israel kag 10,000 halin sa Juda.
5 Dayon sia kag ang iya mga hangaway nagkadto sa siyudad sang Amalek, kag ginbanggaan nila sila sa namalhan nga suba.
6 Ginpaandaman niya ang mga Kenhanon nga nagasiling, “Lakat kamo kag bayai ninyo ang mga Amaleknon, agod indi ko kamo pagpamatyon upod sa ila. Nanginmaayo kamo sa mga Israelinhon sang paggwa nila sa Egipto." Gani naghalin ang mga Kenhanon.
7 Ginlutos ni Saul ang mga Amaleknon, halin sa Habila tubtob sa Sur, nga nasidlangan sang Egipto.
8 Gindakop niya nga buhi si Agag nga hari sang Amalek, pero ginpamatay niya ang tanan nga mga tawo.
9 Si Saul kag ang iya mga tinawo nagluwas sang kabuhi ni Agag, kag wala nila pagpamatya ang pinakamaayo nga mga karnero, mga baka, pinakamaayo nga mga tinday sang baka, mga kordero, ukon ang bisan ano nga maayo, pero ginlaglag nila ang tanan nga indi mapuslan ukon wala sing pulos.
Si Saul Ginsikway subong Hari
10 Ang Ginoo nagsiling kay Samuel,11 “Nagahinulsol ako nga ginhimo ko si Saul nga hari kay nagtalikod sia sa akon kag, wala magtuman sang akon mga sugo.” Naakig si Samuel, kag sa bilog nga gab-i nagpakiluoy sia sa Ginoo tungod kay Saul.
12 Aga pa sa madason nga adlaw naglakat sia sa pagpangita kay Saul. Nakabati sia nga si Saul nagkadto sa banwa sang Karmel, sa diin nagpatindog sia sing monyomento para sa iya kaugalingon, kag sa tapos nagkadto sia sa Gilgal.
13 Si Samuel nagkadto kay Saul, kag gin-abiabi sia ni Saul nga nagasiling, “Samuel, ang Ginoo magbendisyon sa imo! Gintuman ko ang iya mga sugo.”
14 Nagpamangkot si Samuel, "Ngaa man nga may mga baka pa nga nagamama kag may mga karnero nga nagababa?"
15 Nagsabat si Saul, "Ang akon mga tinawo nagkuha sina sa mga Amaleknon. Ginbilin nila ang pinakamaayo nga mga karnero kag mga baka nga idulot subong halad sa Ginoo nga imo Dios, kag ang iban ginlaglag namon sing bug-os.”
16 Nagsiling si Samuel, "Maghipos ka, kay sugiran ko ikaw sang ginsiling sang Ginoo sa akon kagab-i.” Nagsiling si Saul, "Sugiri ako."
17 Nagsabat si Samuel, "Bisan ginkabig mo ang imo kaugalingon nga indi importante, pero ikaw ang pangulo sang mga tribo sang Israel. Ang Ginoo naghaplas sa imo nga manginhari sang Israel,
18 kag nagsugo sa imo nga laglagon yadtong mga malaut nga mga tawo sang Amalek. Ginsingganan niya ikaw sa pagpakig-away tubtob nga mapamatay nimo sila tanan.
19 Karon, ngaa bala nga wala ka magtuman sa iya? Ngaa bala nga nagdinaguso kamo sa pag-agaw sang ila mga pagkabutang, kag naghimo sang kontra sa Ginoo?”
20 Nagsabat si Saul, "Nagtuman ako sa Ginoo. Naglakat ako suno sa iya ginsiling, kag gindala ko diri si Haring Agag, kag ginpamatay ang tanan nga mga Amaleknon.
21 Pero ang akon mga tinawo wala magpamatay sang pinakamaayo nga mga karnero kag mga baka nga ila gin-agaw, sa baylo gindala nila ini diri sa Gilgal agod idulot subong halad sa GINOO nga imo Dios."
22 Nagsiling si Samuel, "Ano bala ang ginapasulabi sang Ginoo? Ang pagtuman bala ukon ang mga dulot kag mga halad? Labing maayo pa ang pagtuman sa iya sang sa paghalad sa iya sang pinakamaayo nga karnero.
23 Ang pagsupak sa iya pareho kalain sang pagkababaylan, kag ang pagkadi-matinumanon pareho kalaut sang pagsimba sa mga diosdios. Tungod kay ginsikway mo ang mga sugo sang Ginoo, ginsikway ka man niya subong hari."
24 Nagsabat si Saul, “Nakasala ako, wala ako magtuman sa sugo sang Ginoo kag sang imo mga ginsiling sa akon. Nahadlok ako sa akon mga tinawo kag ginhimo ko ang ila luyag.
25 Pero karon nagapakiluoy ako sa imo, patawara ako sang akon sala kag mag-upod ka sa akon pabalik, agod nga makasimba ako sa Ginoo.”
26 Nagsabat si Samuel, "Indi ako mag-upod sa imo pabalik. Ginsikway mo ang sugo sang Ginoo, kag ginsikway ka niya subong hari sang Israel."
27 Dayon nagtalikod si Samuel sa paglakat, pero ginhawiran sia ni Saul sa bayu kag nagisi ini.
28 Si Samuel nagsiling sa iya, "Ang Ginoo nagkuha sang ginharian sang Israel gikan sa imo karon nga adlaw kag ginhatag sa isa nga maayo pa sa imo.
29 Ang gamhanan nga Dios sang Israel wala nagabutig, ukon nagabaylo sang iya panghunahona. Indi sia tawo nga nagabaylo sang iya panghunahona."
30 Nagsabat si Saul, "Nakasala ako, pero karon padunggi ako sa atubangan sang mga pangulo sang akon mga tawo kag sang bug-os nga Israel. Mag-upod ka sa akon pabalik agod makasimba ako sa Ginoo nga imo Dios."
31 Gani si Samuel nag-upod sa iya pabalik, kag si Saul nagsimba sa Ginoo.
32 Nagmando si Samuel, "Dalha diri si Haring Agag sa akon." Si Agag nagpalapit nga nahadlok kag nagakurog, nga naghunahona sa iya kaugalingon, "Daw ano kapait ang mapatay!"
33 Si Samuel nagsiling, "Subong nga ang imo espada nagkuha sa mga babayi sang ila mga bata, amo man karon ang imo iloy manginwala sing bata." Kag ginhatukhatok niya si Agag sa atubangan sang altar sa Gilgal.
34 Dayon si Samuel nagkadto sa Rama, kag si Haring Saul nagpauli sa Gabaa.
35 Tubtob sang pagkapatay ni Samuel wala na gid sia magpakigkita sa hari, pero nagpangasubo gid sia nahanungod kay Saul, kay ang Ginoo naghinulsol nga ginhimo niya si Saul nga hari sang Israel.
No comments:
Post a Comment